Marka 1 - DIEM PROTESTANTA

Ny vontoatin’ny fampianaran’i Jôhany Mpanao batisa

¹ Manomboka eto ny Vaovao Mahafaly momba an’i Jesoa Kristy Zanak’Andriamanitra.

² Izao no voalazan’ny Soratra Masina ao amin’ny bokin’i Isaià mpaminany: «Indro alefako hialoha Anao ny irako, hoy Andriamanitra, mba hanomana ny lalanao.»

³ «Injany misy feon’olona miantso mafy ao an-taniefitra hoe: Amboary ny lalan’ny Tompo; ahitsio ny hizorany!»

⁴ Araka izany, dia niseho i Jôhany ka nanao batisa tany an-taniefitra sy nanao antso avo hoe: –Ialao ny toe-dratsy, meteza hatao batisa, dia havelan’Andriamanitra ny helokareo.

⁵ Nirohotra nankeo amin’i Jôhany avokoa ny olona avy any Jodea lafy valo sy avy any Jerosalema; ary niaiky heloka ireo ka dia nataon’i Jôhany batisa tao amin’ny ony Jôrdàna.

⁶ Akanjo volon-drameva ary fehikibo hoditra no fanaovan’i Jôhany; valala sy tantely remby no fihinany.

⁷ Ary hoy ny antso avo nataony: –Tamy aoriako Ilay mahery noho izaho, ka tsy mendrika hiondrika hamaha ny fehikapany akory aho.

⁸ Ny ahy, rano no nanaovako batisa anareo; ny Azy kosa, ny Fanahy Masina no hanaovany batisa anareo.

Ataon’i Jôhany batisa i Jesoa

⁹ Tamin’izany andro izany, dia tonga avy any Nazareta tanàna any Galilea i Jesoa ary nataon’i Jôhany batisa tao Jôrdàna.

¹⁰ Vantany vao niakatra avy ao anaty rano i Jesoa, dia nahita ny lanitra nitriatra sy ny Fanahy Masina nidina teo aminy tahaka ny voromahailala.

¹¹ Ary nisy feo avy tany an-danitra nanao hoe: –Ianao no Zanako, ilay Malalako; Ianao no sitrako.

Alaim-panahy any an-taniefitra i Jesoa

¹² Ary niaraka tamin’izay dia nasesiky ny Fanahy Masina hankany an-taniefitra i Jesoa

¹³ ka nijanona efapolo andro tany, nalain’i Satàna fanahy, niara-nonina tamin’ny bibidia, ary notompoin’ny anjely.

Manomboka ny asany any Galilea i Jesoa

¹⁴ Ary naiditra am-ponja i Jôhany. Taorian’izay, dia nankany Galilea i Jesoa, nanao antso avo ny Vaovao Mahafaly avy amin’Andriamanitra

¹⁵ ka nilaza hoe: –Tonga ny fotoanandro; efa akaiky ny Fanjakàn’Andriamanitra, ialao ny toe-dratsy ary minoa ny Vaovao Mahafaly.

Antsoin’i Jesoa ireo mpanarato efa-dahy

¹⁶ Ary nandalo teo amoron’ny farihin’i Galilea i Jesoa ka nahita an’i Simôna sy i Andrea mirahalahy; nanipy harato tao anaty farihy izy roa lahy fa mpanarato no raharahany.

¹⁷ Dia hoy i Jesoa taminy: –Andao hiaraka amiko fa hataoko mpanarato olona ianareo.

¹⁸ Dia nilaozany avy hatrany ny haratony, ka lasa izy roa lahy niaraka tamin’i Jesoa.

¹⁹ Ary nony nandroso kelikely i Jesoa, dia nahita an’i Jakôba sy i Jôhany mirahalahy, zanak’i Zebedeo. Nanamboatra ny haratony tao an-tsambokely izy roa lahy tamin’izay.

²⁰ Ary nantsoin’i Jesoa avy hatrany izy mirahalahy; dia nilaozany teo an-tsambokely i Zebedeo rainy mbamin’ireo mpikarama, fa lasa izy roa lahy niaraka tamin’i Jesoa.

Sitranin’i Jesoa ilay olona azon’ny fanahy maloto

²¹ Dia nankany an-tanàna atao hoe Kafarnahòma i Jesoa mbamin’ireo mpianany efa-dahy; ary raha vao tonga ny sabata, dia niditra tao amin’ny sinagôga i Jesoa ka nampianatra tao.

²² Talanjona ny olona nihaino ny fampianarany, satria nampianatra azy tamin-pahefana i Jesoa, fa tsy tahaka ireo mpahay lalàna.

²³ Tamin’izay indrindra, tao amin’ny sinagôgan-dry zareo, dia nisy lehilahy azon’ny fanahy maloto

²⁴ ka niantsoantso mafy hoe: –Fa hataonao inona izahay, ry Jesoa avy any Nazareta? Tonga handringana anay ve Ianao? Fantatro anie fa Ianao no ilay Masina avy amin’Andriamanitra e!

²⁵ Notenenin’i Jesoa mafy kosa ilay fanahy maloto ka nataony hoe: –Mangina, ary mialà amin-dralehilahy io.

²⁶ Dia nampifanintontsintona an-dralehilahy ny fanahy maloto ary nikiakiaka sady niala taminy.

²⁷ Raiki-tahotra ny olona rehetra ka nifanontany hoe: –Inona ity? Izany ka fampianarana vaovao ombàm-pahefana! Na dia ny fanahy maloto aza, baikon’ity olona ity ka manaiky Azy!

²⁸ Ary poatoizay dia niely eran’ny faritany Galilea manontolo ny lazan’i Jesoa.

Sitranin’i Jesoa ny marary marobe

²⁹ Vantany vao nivoaka ny sinagôga i Jesoa, dia niantrano tao amin-dry i Simôna sy i Andrea; niaraka taminy koa i Jakôba sy i Jôhany.

³⁰ Ary nandry teo am-pandriana ny rafozambavin’i Simôna fa voan’ny tazo, ka nampahafantarina an’i Jesoa avy hatrany.

³¹ Dia nanatona azy i Jesoa ka nandray ny tanany ary nampitsangana azy. Nialan’ny tazo ravehivavy, ka nandroso sakafo ho an’ireo vahiny.

³² Nony hariva efa maty masoandro, dia nentin’ny olona teo amin’i Jesoa avokoa izay mety ho marary sy azon’ny demony.

³³ Ka dia vory teo anoloan’ny varavarana ny vahoaka rehetra tao an-tanàna.

³⁴ Olona maro ianjadian’ny aretina isan-karazany no sitran’i Jesoa, ary demony maro no voaroakany; tsy navelany hiteniteny kosa ireo demony ireo, satria nahalala Azy.

Mitory ny Vaovao Mahafaly eran’i Galilea i Jesoa

³⁵ Ny ampitso maraina mbola maizina, dia nifoha i Jesoa ka niala tao an-tanàna ary lasa nivavaka tany amin’ny toerana mangina.

³⁶ Dia nitotototo nizaha Azy ry i Simôna sy ireo namany telo lahy;

³⁷ ka nony nahita an’i Jesoa izy efa-dahy, dia nilaza taminy hoe: –Mitady Anao ny olona rehetra.

³⁸ Fa hoy ny navaliny azy efa-dahy: –Andeha isika ho any an-toeran-kafa, any amin’ny tanàna akaiky manodidina, mba hitoriako teny any koa; izany manko no nialako tao an-tanàna.

³⁹ Dia lasa i Jesoa nitety an’i Galilea manontolo, nitoriteny tany amin’ny sinagôgan-dry zareo Jiosy sady nandroaka ny demony.

Sitranin’i Jesoa ilay lehilahy marary hoditra

⁴⁰ Ary nanatona an’i Jesoa ity lehilahy marary hoditra ka nitalaho taminy sady nandohalika teo anatrehany ka nanao taminy hoe: –Raha sitrakao, dia hainao diovina aho.

⁴¹ Onena azy i Jesoa ka nanatsotra tanana nikasika azy sady niteny hoe: –Sitrako, madiova ianao.

⁴² Avy hatrany dia nialan’ny aretin-koditra nahazo azy ralehilahy ka nadio.

⁴³ Dia nasain’i Jesoa nandeha niaraka tamin’izay izy sady nofeperany mafy

⁴⁴ nataony hoe: –Tandremo mihitsy ny milaza izao na amin’iza na amin’iza; fa mandehana miseho amin’ny mpisorona ary ento ny fanatitra voadidin’i Mosesy mba ho vavolombelona amin’ny olona fa madio ianao.

⁴⁵ Kanjo raha vao niala teo ralehilahy, dia nanao antso avo izay nitranga taminy ary nampiely izany. Koa tsy afa-niditra an-tanàna tamin’ny fomba miharihary intsony i Jesoa; fa dia any amin’ny toerana mangina ivelan-tanàna any foana Izy, kanefa mbola nohatonin’ny olona avy eny rehetra eny.