Josoa 9 - Baiboly Katolika

6. FIFANEKEM-PIHAVANAN’I ISRAELY SY NY GABAONITA Fiandaniana nanoherana an’i Israely

¹ Nony nandre izany ny mpanjaka rehetra atỳ an-dafin’i Jordany, na ny eny amin’ny tendrombohitra na ny eny amin’ny tany lemaka na ny amoron-tsiraky ny ranomasina lehibe, tandrifin’i Libàna, ny Amôreana, ny Kananeanina, ny Ferezeanina, ny Heveanina, ary ny Jeboseanina,

² dia niray hina hiara-miady amin’i Jôsoe sy i Israely.

Hafetsena nataon’ny Gabaônita

³ Fa ny mponina tao Gabaôna kosa, nony nandre ny nanaovan’i Jôsoe an’i Jerikô sy i Haia,

⁴ dia nanao hafetsena. Niainga handeha izy ka nitondra vatsy ho eny an-dalana; lasàka tonta sy siny hoditra fasian-divay efa rovitra sy mizaitra no nataony teo ambonin’ny ampondrany,

⁵ kapa tranainy sy mitampitampina no teo amin’ny tongony, lamba tonta no teo an-kodiny, ny mofo hohaniny dia maina sy efa potipotika avokoa.

⁶ Dia nankany amin’i Jôsoe tao an-toby tany Galgalà izy ireo, ka niteny taminy sy tamin’ny lehilahy rehetra tamin’i Israely hoe: «Avy any an-tany lavitra izahay; koa ankehitriny, aoka mba hanao fanekena aminay ianareo.»

⁷ Fa namaly ireto Heveanina ny lehilahy tamin’i Israely: «Sao dia monina eto aminay ihany ianareo, ka ahoana no hanaovanay fanekem-pihavanana aminareo?»

⁸ Dia hoy ireo tamin’i Jôsoe: «Mpanomponao izahay.» Ary hoy i Jôsoe taminy: «Iza moa ianareo, ary avy aiza?»

⁹ Dia hoy izy ireo: «Tonga avy any an-tany lavitra indrindra ny mpanomponao noho ny Anaran’i Iaveh Andriamanitrareo, fa nandre ny lazany izahay sy izay rehetra nataony tany Ejipta,

¹⁰ ary ny nanaovany ny mpanjakan’ny Amôreana roa lahy tany an-dafin’i Jordany, dia i Sehôna mpanjakan’i Hesebona sy i Oga mpanjakan’i Basàna, izay nonina tany Astarôta.»

¹¹ Ka hoy ny loholonay sy ny mponina rehetra amin’ny taninay taminay: Mitondrà vatsy ho any an-dalana, ka mandehana mitsena azy ireo, ary lazao aminy hoe: Mpanomponareo izahay, koa ankehitriny aoka mba hanao fanekem-pihavanana aminay ianareo.

¹² Jereo ny mofonay, vao nafana itony no nalainay tany an-tranonay hatao vatsy, tamin’ny andro niainganay ho atỳ aminareo, ary izao kosa dia indro fa efa maina sy potipotika.

¹³ Mbola vao ireto siny hoditra fasiana divay ireto no nofenoinay azy, nefa he, rovitra izy ankehitriny, ary ny lamba aman-kapanay dia mihatonta, fa lavitra dia lavitra ny dia nalehanay.

¹⁴ Dia nangalan’ny lehilahy tamin’i Israely ny vatsin’izy ireo, nefa tsy nanontany izay tenin’i Iaveh izy;

¹⁵ ary nanaiky hihavana amin’izy ireo i Jôsoe, sy nanao fanekem-pihavanana taminy fa hovelominy izy; sady nianiana taminy araka izany koa ny lohan’ny fiangonana.

¹⁶ Kanjo, hateloana taorian’ny nanaovana ny fanekem-pihavanana dia re fa mifanakaiky aminy sy monina eo aminy ihany ireo.

¹⁷ Koa niainga ny zanak’i Israely dia tonga tany an-tanànan’izy ireo nony afaka hateloana; ny tanànany dia i Gabaôna, i Kafira, i Berôta ary i Kariatiarima.

¹⁸ Noho ny fianianana nataon’ny lohan’ny fiangonana taminy tamin’ny Anaran’i Iaveh Andriamanitr’i Israely dia tsy namely azy ireo izy, nefa nimonomonona tamin’ny filohany, ny fiangonana rehetra.

Ny nanovana ny Gabaônita

¹⁹ Ka hoy ny filohany rehetra tamin’ny fiangonana rehetra: «Efa nanao fianianana taminy izahay tamin’i Iaveh Andriamanitr’i Israely, ary izao tsy mahazo mikasika azy isika.

²⁰ Fa izao no hanaovantsika azy: Havelantsika ho velona ihany izy, mba tsy hitarika ny fahatezeran’i Iaveh amintsika noho ny fianianana efa nataonay taminy.»

²¹ «Ka aoka ho velona àry izy», hoy ireto filohany tamin’izy ireo. Dia natao mpikapa hazo sy mpantsaka rano ho an’ny fiangonana rehetra ireo, araka ny voalazan’ny filohany taminy.

²² Ary nampiantso ny Gabaônita i Jôsoe ka niteny taminy hoe: «Ahoana no namitahanareo anay hoe: Lavitra anareo indrindra izahay, nefa ianareo monina atỳ afovoanay ihany?

²³ Koa ankehitriny, voaozona ianareo, ka tsy misy aminareo tsy ho andevo, hikapa hazo sy hantsaka rano ho an’ny tranon’Andriamanitra».

²⁴ Dia izao no navalin’izy ireo an’i Jôsoe: «Nambara tamin’ny mpanomponao ny didy nomen’i Iaveh Andriamanitrao an’i Môizy mpanompony mba hanolotra anareo avokoa ny tany rehetra ary mba handringananareo eo anoloanareo ny mponina rehetra amin’ny tany. Nony mby akaiky ianareo, dia natahotra mafy ny ho faty izahay, ka izany no nanaovanay toy izao.

²⁵ Indreto izahay ankehitriny eo an-tananao, ka ataovy aminay izay ataonao ho mety sy marina hanaovana anay.»

²⁶ Nataon’i Jôsoe tamin’izy ireo ny voalazany: nanafaka azy teo an-tanan’ny zanak’i Israely izy mba tsy hataony maty.

²⁷ Hatramin’izay andro izay ihany, dia naraikitr’i Jôsoe izy ho mpikapa hazo sy mpantsaka rano ho an’ny fiangonana sy ny ôtelin’i Iaveh any amin’ny fitoerana izay hofidin’i Iaveh, ary mbola nanao izany mandraka androany izy.