Genesisy 5 - Baiboly Katolika

Ireo patriarka talohan’ny safodrano

¹ Ity no boky misy ny tantaran’i Adama. Tamin’ny naharian’Andriamanitra ny olombelona dia nataony manahaka an’Andriamanitra izy.

² Lahy sy vavy no nahariany azy; ary notsofiny rano izy, ary nomeny anarana hoe Olombelona, tamin’ny nahariany azy.

³ Telopolo amby zato taona ny andro niainan’i Adama vao nitera-dahy anankiray manahaka azy sy mitovy tarehy aminy, ka nomeny anarana hoe Seta.

⁴ Ary ny andron’i Adama taorian’ny niterahany an’i Seta dia valon-jato taona, sady niteraka zazalahy aman-jazavavy izy.

⁵ Telopolo amby sivin-jato taona no andro rehetra niainan’i Adama; dia maty izy.

⁶ Dimy amby zato taona ny andro niainan’i Seta vao niteraka an’i Enôsy izy.

⁷ Mbola velona fito amby valon-jato taona i Seta taorian’ny niterahany an’i Enôsy, sady niteraka zazalahy aman-jazavavy.

⁸ Roa ambin’ny folo sy sivin-jato taona no andro rehetra niainan’i Seta, dia maty izy.

⁹ Sivy folo taona ny andro niainan’i Enôsy vao niteraka an’i Kainany izy.

¹⁰ Mbola velona dimy ambin’ny folo amby valon-jato taona i Enôsy taorian’ny niterahany an’i Kainany, sady niteraka zazalahy aman-jazavavy.

¹¹ Dimy amby sivin-jato taona ny andro rehetra niainan’i Enôsy, dia maty izy.

¹² Fitopolo taona ny andro niainan’i Kainany vao niteraka an’i Malaleela izy.

¹³ Mbola velona efapolo sy valon-jato taona i Kainany taorian’ny niterahany an’i Malaleela, sady niteraka zazalahy aman-jazavavy.

¹⁴ Folo amby sivin-jato taona no andro rehetra niainan’i Kainany; dia maty izy.

¹⁵ Dimy amby enimpolo taona ny andro niainan’i Malaleela, vao niteraka an’i Jareda izy.

¹⁶ Mbola velona telopolo amby valon-jato taona i Malaleela taorian’ny niterahany an’i Jareda, sady niteraka zazalahy aman-jazavavy.

¹⁷ Dimy amby sivifolo sy valon-jato taona no andro rehetra niainan’i Malaleela; dia maty izy.

¹⁸ Roa amby enimpolo amby zato taona ny andro niainan’i Jareda vao niteraka an’i Enôka izy.

¹⁹ Mbola velona valon-jato taona i Jareda taorian’ny niterahany an’i Enôka, sady niteraka zazalahy aman-jazavavy.

²⁰ Roa amby enimpolo amby sivin-jato taona no andro rehetra niainan’i Jareda, dia maty izy.

²¹ Dimy amby enimpolo taona ny andro niainan’i Enôka vao niteraka an’i Matosalema izy.

²² Mbola nizotra nifanaraka tamin’Andriamanitra telon-jato taona i Enôka, taorian’ny niterahany an’i Matosalema, sady niteraka zazalahy aman-jazavavy.

²³ Dimy amby enimpolo sy telon-jato taona no andro rehetra niainan’i Enôka.

²⁴ Nizotra nifanaraka tamin’Andriamanitra i Enôka, dia tsy hita intsony, fa nentin’Andriamanitra izy.

²⁵ Fito amby valopolo amby zato taona ny andro niainan’i Matosalema vao niteraka an’i Lameka izy.

²⁶ Mbola velona roa amby valopolo sy fiton-jato taona Matosalema taorian’ny niterahany an’i Lameka, sady niteraka zazalahy aman-jazavavy.

²⁷ Sivy amby enimpolo sy sivin-jato taona no andro rehetra niainan’i Matosalema; dia maty izy.

²⁸ Roa amby valopolo amby zato taona ny andro niainan’i Lameka vao niteraka zazalahy anankiray izy,

²⁹ nataony hoe Nôe no anarany, fa hoy izy: Ity no hanamaivana antsika amin’ny fahasasarantsika sy amin’ny asa tanana mahasasatra avy amin’ity tany efa voaozon’i Iaveh ity.

³⁰ Mbola velona dimy amby sivy folo sy dimanjato taona Lameka taorian’ny niterahany an’i Nôe, sady niteraka zazalahy aman-jazavavy.

³¹ Ary fito amby fitopolo sy fiton-jato taona no andro rehetra niainan’i Lameka; dia maty izy.

³² Rehefa dimanjato taona i Nôe, dia niteraka an’i Sema sy i Kama ary i Jafeta.