NEHEMIA 2 - ASII LAKDAP Bible (BSI)

Nehemia Ka Jerusalem Na Kihoto

¹ Jipi lüblai sijai na, ranaiq shi, Ajong Hokhamwe Artajarses ka dungsea ngato. Kiijaq ngi raq chekok ka apaiq ma kuq kang. Armaq kongkhu ji niika, apaiq raq ngi ka jangshi ra min tsanbi wokti ka chhimak riito.

² Kriikha maq, “Ümnaq miina ümtsan abi jaro?” nguta apaiq raq ngi ma waito. “Ümhan miina phintsaqtsaq. Arka ümtsan mong na phanshi ra chapa asi.” Kra tai lata ngi ka ihaisi riilatli riito.

³ Kiimaq ngi raq, “O, Chaü lei, rilung alu maq silaq! Iti iwi sichang changkhü chela ka wiita she then wanto. Chela trotam na long maq aruk khetuk thun kriimin wa maq chaq baiq raüta wiita she thenkito,” nguta apaiq bom ka trekang.

⁴ Kiijiishe hokhamwe raq, “Riita ümchaü ümniiriika jam lai phan jaüro wa?” nguta ngi ma waito. Kiijiishe ngi raq sanseng ramungtan na siti Shiikeawe jaq wa achu jaükang.

⁵ Lata ngi raq hokhamwe ma akha chongkang, “O, Chaü lei, ümniiraq lungwii tlaü jiika, kiimaq ngi raq tiipaiq nea tiikang jaüjaü bomtsi ara mitre kuq haü jiika, Juda mung na, iti iwi maa lap wan chang chela kiina kai miitu aming kuq laq. Kiimaq kra athen arki chela kra ngi raq tiihea hai wan nong miitu aming kuq laq.”

⁶ Kra tiipaiqnea lata tiitai wan kang krai mren, hokhamwe raq tsangnyung hokham nyung kiimin apaiq tho na ngashat asi na, “Riita ümniika ümchu ranaiq miitu wa mikiho haü. Kiimaq ümtincho wa mijang wa haü?” nguta hokhamwe raq ibom ka treto. Ngi raq apaiq ma nai mung na kai miitu bom tiitai wan kang kra, apaiq raq ahea nguta bom ka tre wanto. Krai mren, ngi raq apaiq ma kaisea walam akhing kriishe khamkuq wan kang.

⁷ Kra latiishe, ngi ka lam maq jam tiibanbi min ahü maq, jojuju hea maq, Judia wang na saüho miitu, lam lemat lak Euphretis jürai maq Shenyap Mung pengti wanghuptitiim ma keho chang lak kriiri waiqkuq haü jaq ahea nguta chongkang.

⁸ Kiimaq hali, ngi raq hokhamwe jaq wa, rum wa pe kra liiwantiwe Asaph ma, rum na pe sitlaq kiiwa pehü pan ma lam raüta, Shomjam tro na long peruk kiijaq kilam chong thun kra hai wan miitu, kiimaq chela khetuk thun kra tiihea wan miitu kiimaq ngi miitu jamhai wan tiikang kiijaq lang miitu, pe raa tlaq kra, Asaph raq michom kuq laq nguta, aming kewan lak ashi kri waiqkuq haü jaq ahea nguta, bom ka tiitai kang. Shiikeawe ka ngi rai asi. Kiimaq, ngi raq ümchuwa jaü kang kra, hokhamwe raq ngi ma kunkun tiihong kuqto.

⁹ Hokhamwe raq, ngi rai kongshi maq kaidam miitu, rewetubi phong wa wiijam, kiimaq kumrang thaq na chaoti rewebi wa kongshi kri tiiki damto. Krai mren, ngi riimin wanhiq khum ka tiichap pha wan kang. Lata Euphretis jürai maq Shenyap Mung kiina kaiho wanhiq khum kra pha wan kang. Lata, kra mung pengti wanghuptibi ma hokhamwe raq atiiho lak thun kriishe kuq kang.

¹⁰ Shatmaq Beth Horon chela na sitiwe Sanballat raq, nai Ammon wang na sitiwe siihiipjong weshi, amang min Tobia nguta kra wenai raq, Israilnok mungmaiqse miitu jaqsham ahea shamketi maiq weshi she saühoto nguta, tsütsa ka taito. Raüta tsangnai ka pinthum makshu she khiqriqto.

¹¹ Lata, ngi ka Jerusalem chela niishe saühokang. Kiimaq, kiijaq ranaiq tsam haikang.

¹² Shiikeawe raq ngi ma Jerusalem chela miitu jamlai jaqsham wan chang ngutiiwa, itsan ka tiichhii wantlii maq chongkuqtaq, kra bomtsi ka maiq ahinti ju miimin chongmang dam thü kang. Kra latiishe ngi ka rawa wathung wakham na tiido lata, ngi rai kongtibi shea lata, chela tro wa longruk thun kra shrira liikang. Kiimaq ngi ka kumtoq kaüse thaq na nga latli kikang.

¹³ Ngi ka rawa mong niili tiido lata, chela tro ruk kra ahukse maq sisin wan wan shrira liikang. Shenyap nü na Jüwii Kilam Chong kriimaq liiphaho lata, hiqmai nü na Pren Kaü Khamdü nü na liiwan kang. Lata Shinchiitsap Phong Kilam Chong nü na liiwan kang. Ngi raq kra chela tro na ashthen arbaiq peruk thun ka, kiimaq wa maq chaq raüta ashthen baiq thun kra sidi liiwan kang.

¹⁴ Kra latiishe chela maq shedong nü siim maq riita hiqkhu nü na Khamdü Kilam Chong kiinü niishe liiwan kang. Lata Hokhamwe Khamchum nü kiiniishe liiwan kang. Kriiba niika, long peruk ashthenbaiq long rong ka riiphongki raüta, longrong thaq maq, ngi chao tiikang kumtoq kaü ka khum wan chang lam ahü riito.

¹⁵ Kriikha miishe, ngi ka Kidron jüwii lam kriimaq she kumtoq kaü raikhu na chao lata, peruk kra shrira liiwan kang. Latiishe, ngi ka chela mong niishe hali Jüwii Kilam Chong kra lam maq lata, ngi kai chang lam kra phan phan she jang wan latiishe, chela mong na wawan nongkang.

¹⁶ Kiijaq Jerusalem na siti maiq ajong ala thun riika, ngi raq jamlai wa kiimung tiikang kra, kiimaq ngi ka ümbano kikang, kriika kra akhing niitaq, jurmin itho ka hemak riito. Kiimaq, ngi raq jaqsham chang sitlaq bomtsi tsütsa kriimin, inok ibin Jehudinok maiq ahinti ramwebi ngu i, kiimaq mungtubi ngu i, kiimaq ajong ala siihiipbi ngu i, kiimaq kra jaqsham na lom wandamti nokmaiqse ahinti ngu i, tsangshiq ma, ju miimin tsütsa ka tiitai wan mang shaq li riikang.

¹⁷ Kra lot latiishe, “Liirong laq, singmung maiqse lei, nashiq ma chamchao jonghea asi. Jerusalem chela ka athen kaiwishe. Chela tro na long peruk thun ka wiita athen kaikun she. Chela tro wa kilamchong thun kriimin wiita tiithen baiqto! Lo, ümchaü min, chaprong i. Laita chela trotam wa long ruk thun ara tiihea hai rong i. Laita nashiq mung khushü jam tlaq ara tiijong rong i,” nguta ngi raq tsangshiq ma chongkang.

¹⁸ Latiishe ngi raq mungmaiqse welabi ma, Shiikeawe ka ngi rai asi, kiimaq ngi ka Jerusalem na kaiho miitu khrum kuqto. Kiimaq ajong hokhamwe raq, ara jaqsham miitu, ngi ma hon atsii ka jamkho chongkuqtaq, kriithun tsütsa kriishe tsangshiq ma tiitai chongkuq kang. Kiijiishe tsangshiq raq, “Lo, ikhla Jerusalem chela tro wa long peruk thun kra tiihea hai nong rong pha!” ngutiishe ibom taoto. Krai mren, nokmaiqse ka chaprang she chapto. Raüta, kra Jerusalem tro ruk thun kriishe tiihea hai miitu phanrap she tiijeme wan kai.

¹⁹ Ara jaqsham ahang sürii wan tsütsa ka tai raüta, Sanballat, Tobia, kiimaq Arab phan wa maiq weshi, amang min Geshem ngutlaq kriiwetiim raq, naishiq ka shumtsü miitsü raütiishe shummii siqto. “Ei, riita, namshiq riika jamlai riihokai ngutiiwa tiima tlan? Namshiq ka ajong hokhamwe wokhong wa dongho lanta maiqmii wela jaho ngutiisha dan tlan?”

²⁰ Kiijiishe, ngi raq tsangshiq bom ka akha tre kang, “Sanseng ramungtan na sitiwe Shiikeawe raq naishiq ma ara jaqsham pha wan tiikai arka mitiinyi kuq wan. Naishiq ka Shiikeawe sengi. Krai mren, ara Jerusalem tro wa long ruk athen arki thun ara tiihea hai jaqsham, athuk atsom arka, naishiq raq misham pha wan hai she. Shatmaq namshiq riika, Jerusalem na sitlaq tachong hupsam kriiwa, kiimaq hup nai sam sitlaq kriiwiika, jamlai phan min lap wan lot man. Kiimaq Jerusalem arka naiti naiwi hiqshong dea nguta, mungmaiqse manphan wura riimin namshiq ka ham wan dam mak she.”