Matthew 7 - ASII LAKDAP Bible (BSI)

Nashiq Raq Maiq Ka Shrongra Mai

¹ “Namshiq raq maiq ka naq shrongra rongkiq. Shiikeawe raq namshiq min shra wan mak miraq.

² Namshiq raq nanok ka jamkho shrongra wan tlan, kiikhiisii Shiikeawe raq namshiq min mishra wan. Namshiq raq nanok ka jamlai tri mo shin wan tlan, kra tri maq namshiq kiimin Shiikeawe raq mishin wan.

³ Ümphuno we mak na sinchiise ka jaram wa liitlaü, ümmak na pepan kaü tiihap rai tlaq kra riiwe ka chhi maü riiraü?

⁴ Ümmak po na pepan kaü tiibumshat maq, ümphuno we nangnga, ‘Ümmak wa sinchiise ka lamkuq pha,’ ngutiika jamkho bom tlaü?

⁵ Mongnam we loi! Apha na ümmak po wa pepan kaü kra kongkhu lambaiq laq. Kra lot jaitiq ümphuno we makpo wa sinchii kra khangriirii hea she michhi haü. Kiimaq milam kuq lot haü.”

⁶ “Ngamrea ka hi kong ma naq kuq rongkiq. Tsangshiq raq namshiq khoti mikaq. Lakshii tum ka waqkong khaki naq baiq rongkiq. Tsangshiq riika hok miili minibaiq wan.”

Jaülaq, Ritlaq, Buklaq

⁷ “Jaü ronglaq, raüla namshiq ma mikuq. Rit ronglaq, raüla namshiq raq mihum han. Kilü na buk ronglaq, raüla namshiq ma midi kuq.

⁸ Jaütlaqti raq milap; rit tlaqti raq mihum; kilü na buktlaqti ma midi kuq.

⁹ Ase ra awe jaq wa winsii jaü raü jaq longpo ka mikuq sha?

¹⁰ lo ase ra ngiq jaü raü jaq, paü se ka mikuq sha?

¹¹ Namshiq ka abi maiqsetiim raq santla, namsetiim ma ahea awa phan hupsam kene wan ka atsin han. Riita ikhiijiika, ramungtan na siti nam We raq, apaiq jaq wa jaü wan tlaqti miika, ümtinkhan kao raüta ahea awa phan hupsam she wa kuq wan jiiq riila!”

¹² “Nanok raq namshiq ma jamlai phan jaq shamkuq raü jiiwa, namshiq raq milungwii han, kiikhiisii hali namshiq raq tsangshiq ma klo kuq wan lili ronglaq. Mosheq Thungtri nai shammibi bomchong ka ara bomtsi arjaq sup wan tlo.”

Lamtsase

¹³ “Kilam atsase kiimaq warong laq. Jamkhano ngukla, wamungtan na kai chang kilü ka ajong wiq. Kiimaq kiina kaichang lam ka akhumsea ma aje. Kiimaq maiq apako ka kra lam maq khumtlo.

¹⁴ Shatmaq, rilung lam nü na wachang kilü ka atsase. Kiimaq arlam ka akhum ma ahawiq. Maiq atsapko riili arlam ka hum wan tlo.”

Petsi Ahea Nai Petsi Abi

¹⁵ “Arot shammibi thiikho wa honkam shat maq sirong laq. Rakhütsiri na tsangshiq ka skusetiim ikha puqsut ngo chang chang namshiq pha na watlo. Shatmaq among niika shekong ikha sitlo.

¹⁶ Tsangshiq jaqsham maq namshiq raq misap han. Kiimko chong niika spiqtsi ka tsimak. Kiimaq kiida raü niika phupmup tsi ka tsi mak.

¹⁷ Achong ahea jiika atsi min ahea miraq. Shatmaq achong abi jiika atsi kiimin abi miraq.

¹⁸ Chongheati raq atsi ka abi tsimak phan. Kiimaq chongbiti riika atsi ahea ka tsimak phan.

¹⁹ Kiimaq atsi ahea tsikuq mak chongti ka adaq she mirbaiq wan. Raüta wa na michaq baiq wan.

²⁰ Krai mren, namshiq raq arot shammibi ka tsangshiq jaqsham maq misap wan han.”

Khapho Ranaiq

²¹ “Ngi nangnga, ‘Tatiwe loi, Tatiwe loi’ nguta ngoti tarü ka Ramungtan na saülot mak. Shatmaq jurwa ramungtan na siti i We aming ka lang raüta sitlaqti kli misaü wan.

²² Phangthum Khapho Ranaiq na maiq pahea raq ngi nangnga, ‘Tatiwe loi, Tatiwe loi! Ümmang na naishiq raq Shiikeawe bomtsi chongkuq kai ihata! Kiimaq ümmang maq naishiq raq abi winji pahea jobaiq wan kai ihata. Kiimaq awang chang jaqsham pahea sham wan kai ihata!’ nguta mingu.

²³ Kiitiikaq ngi raq tsangshiq ma, ‘Namshiq ka riikhaqli i sengi riimak. Namshiq ka abi ngarai klo wantibi ngi tho wa jaqlo tiijin tlo ronglaq!’ nguta minguha.”

Jamhaiti Wenai

²⁴ “Ara chongtiikang arkha maq, jurwa ara i bomchong ara lang wan tlaq, kriiti ka maiq atsiiwe raq, ajam ka longkaü longkaü wat raüta, jamkham shong raüta hai wan tlaq ikha miraq.

²⁵ Ra ka düthaü jun wanto. Jürai thun ka wiita ma wanto. Rathaiq rahai ka henghea hai wan raüta, kra jam ka thaü baiq wanto. Shatmaq kra jam ka ropbaiq lot mak dea riito. Jamkhano ngukla kra jam ka longkaü thaq na kham shong wan raüta ahai wan.”

²⁶ “Shatmaq jurwa ara i bomchong ara taishat shat maq lang wan mak siwan tlaq, kriiti ka maiq angi we ashi raq, ajam ka kumtsai thaq na ahai wan ikha miraq.

²⁷ Ra ka düthaü diilii she jun wanto. Jürai thun ka wiita ma wanto. Rathaiq rahai ka henghea hai wan raüta, kra jam ka wiita thaübaiq wanto. Raüta jam ka tiimiqchup ropbaiq wanto. Jai na jangnai liikai chang ahü she riito!”

Jesuq Traho Na Arang Asi

²⁸ Jesuq raq arthun tra hokelot jai she, mungmaiqse ka kai awang riiwanto. Jamkhano ngukla apaiq raq arang aheng maq traho bom chongkuq wanto.

²⁹ Apaiq traho bom chongke wan kriika, Thungtri shrinketi bi raq traho bom chong kuqtlaq ikha riimak. Apaiq riika arang aheng maq traho bom chongkuq tlo.