JEREMIA 13 - ASII LAKDAP Bible (BSI)Banninkhea Patulong 1 Tatiwe raq ngi ma kilaüta raihi-nairai khea patulong thun ka rikikiq laüta samlaq nguta chongto. Shatmaq apaiq raq ngi ma kra khea ka kham na naqtsamkiq nguta chongto. 2 Krai mren ngi raq kriithun ka rikikang. Lata idü na samkang. 3 Kiijiishe Tatiwe raq ngi ma hali chongnongto. Raüta akha nguto, 4 “Ümniika Euphretis rai kiina walaq. Laüta patulong thun ka longkhong mong na paüthülaq.” 5 Krai mren ngi ka kiina wawan kang. Lata patulong thun ka Euphretis raikii tho na paüthükang. 6 Kra jai maq rahiq ashaqpuq sijai na Tatiwe raq ngi ka Euphretis rai kii kiina jangwa nongkiq. Laüta kra patulong thun ka lamwa kiq nguta thaüto. 7 Krai mren, ngi ka kiina jang wankang. Lata ngi raq khea paüthükang kra ba kiijaq wakang. Lata liiwakang. Kriithun ka liikangta khea ka wiita ariimkai kun she, asam chang riimak she. 8 Kiijiishe Tatiwe raq ngi ma thongshiri hali chongkuq nongto, Apaiq raq nguto, 9 “Ara khea riimkitaq akha, ngi raq Juda mungti shiikong tsii nai Jerusalemti shiikong tsii ka mitiithen baiqha. 10 Ara abinok raq ibom taimak ngiimtlo. Tsangshiq ka pinthum wanshakshak. Kiimaq abi thaq niimin abi klo wanti. Krai mren tsangshiq raq laihin phra thun shomnoq wanto. Kiimaq shiikumpanto. Kra ningkhan, tsangshiq ka ara patulong thun riimkitaq akhiisiisaq miriimki. Jamkam min taimak she. 11 Ara patulong thun jamkho maiq chhüpii na phataqtaq khaptlii tiinap samtiikai, kiikhiisii hali ngi raq Israil mungti nai Juda amungti ka ngi rai riipom tlii maq ngi rai napshnap maq tiisi wan lungwii tiikang. Ngi raq akha klowan kang arka tsangshiq ka isenginok ma mija wanlaq. Kiimaq raüta tsangshiq raq imang mitiitsamlaq kiimaq ikhushü mitiijonglaq nguta tsangshiq ka tsea wan kang. Shatmaq tsangshiq raq ibomchong ka taimak riito.” Che Tsabum 12 Tati Shiikeawe raq ngi ma chongto, “Jeremia, Israilnok ma chonglaq che tsabumtek na che ka ama tuptup mithiilaq. Kra ngu raüla tsangshiq raq mitre che tsabum ngutlaq ka che thümiili raq. 13 Kiijiishe ümniiraq tsangshiq ma chongkuqlaq, Ngi, Tatiwe raq armungti ka che tiibak nyang lata wok phetaktak, che maq mitiichokha. Hokhambi thun, Dawit saüsetiim thun kra. Kiimaq ramwebi thun kra kiimaq shammibi thun kra kiimaq Jerusalemti thun kra che maq mitiipheha. 14 Latiishe ngi raq hamlii che tsabum thun ka triibuk lata tsabum thun ka wiita mitiibun baiqha. Nyungwe re tikiibi, kiimaq jerobi wiita adam na romshaq mibukbaiqha. Jumin tiihang mang; jumin mangchan mang, kiimaq ju miimin mangchan ka tiitsi mang maq, ngi raq tsangshiq ka kun kun mijiipbaiqha.” Jeremia Raq Shiikong Raamak Nguta Hon Chongtlo 15 Israilnok lei, Tatiwe raq nguto! Aranse ma jalanta apaiq bom ka taironglaq. 16 Tatiwe nam Shiikeawe ka shreng ronglaq, apaiq raq ra mitiinyaq wan shaq na, kiimaq namshiq ka pum thun na mitiithap rai shaq na; namshiq rang rantlan rawiili ka ranyaq tangtang mitiijabaiq shaq na. 17 Kiimaq namshiq raq taiman riihanla, ngi ka namshiq shiikong kha chhilata, ahukse maq mihoqha; Ngi ka makphai khüshang mihoqha, kiimaq imakphai ka mirok, jamkhano ngukla Tatiwe senginok ka rewe raq shumwikong ma kharü maq kha raüta tsuq wanto. 18 Tatiwe raq ngi ma nguto, “Hokhamwe nai anyung hokham nyung ma chonglaq, tsangnai ka hokham ngacho kiiwa satki rongkiq nguta. Jamkhano ngukla tsangshiq hokham khuphok tsomhea thun kra tsangshiq khupo wa tiidea baiqto she. 19 Juda mung wa shemai nü wang na siti chela thun ka re raq trotam maq akom phaq wan kun she. Jumin chela mong na nyap wa lot mak she. Juda mungti tlotli ka re raq munglu shumwikong ma pong mung na atsuq wan kun she.” 20 Jeremia lei, liilaq! Namshiq khat kaiti rewe thun ka shekhu nü mung nü maq saü hotlo! Ümnaq shiikumpanti maiqthun ka ümbano? Ümsenginok miitu ümniika kai srasiq laü ihata? 21 Ümniiraq jamlai she wa mingu haü, ümniiraq kongtibi khla nguta atiima haü nok raq nam mung ka khat raüta, namshiq ka jamsha wan raüjaq? Ümniika maiq nyung nowü chhi tsi ma hoqtlaq ikha mihoq haü. 22 Kiimaq ümniiraq arthun mat dong ara jamkho saü wanta nguta bom waihaüla, ümkhu ümkhea thun ka wiita wunthaü riinaü she chaibaiqtaq kra, kiimaq ümniika maiq raq wiitashe haihü baiqtaq kra jamkhano ngukla ümnaq ngarai ka bihea pinthum tang wan laü. Kriikha na ümniika maiq raq haihü wanto. 23 Maiq ngamnyaq phanwe raq apaiq sham ka miklai lot shea? Kiimaq chiqwaiq kaü riika akhum wa awaiq thun kra mitiimobaiq lot shea? Kra nguraü kla ngohea dea namshiq akhnok abi thaq niimin abi pinthum ngarai klo wantinok riimin, riikhaq tingting jaqsham kra misap wan han wa. 24 Tatiwe raq namshiq ka khaolüm bukjai tsamkü phong kra kumtsaiphii wang rahai ma jamkho tiipan baiqtlaq ikha, namshiq ka pongmung niishe mitiipan baiq. 25 Apaiq raq chongto she. Arka namshiq kharii dongdii she. Apaiq raq namshiq ka akha tiichamchao wan chang dongdii nguta kha atan wan kun she. Jamkhano ngukla namshiq raq apaiq ka laqbaiq lan. Lantea arot phra thun kiimiishe namshiq kamtsantsii ka thü wan lan. 26 Tatiwe apaiq jaq maq ümkhum wa khu akhea ka michhut baiq. Raüta ümniika naiqhü maq jea mitiingaü. 27 Apaiq raq saisitlaq thun kra ümniiraq klowan laü thun ka apaiq raq chhito she. Apaiq raq ümniika thatsang maiqse sumla phra thun shomnoq kai ku akin thun na kiimaq wakjam ram thun kiina shomnoq wan kriika wiita achhi wanwi siisaq. Laüta ümniika maiqwe ashi raq achak sishat taü maq maiqchak rai sraki tlaq ikha sra wan laü. Kiimaq kumrang pongwe ka kumrang kaüshii kaü kra chhiraüta pherai tlaq ikha phephiiq wan laü. Jerusalemti lei, namshiq ka miqlan she! Namshiq ka ümtincho shetiq wa asii maiqsetiim ma mijahan? |
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
Bible Society of India