1 Rouaned 2 - Bibl Koad 21: Ar Bibl e Brezhoneg evit ar Vretoned

Pennad 2

¹ Amzer marv David a dostae, reiñ a reas e c’hourc’hemennoù d'e vab Salomon, o lavarout:

² Mont a ran dre hent an holl zouar. En em greñva, ha bez un den.

³ Mir kefridi an AOTROU da Zoue, en ur gerzhout war e hentoù, en ur virout e reolennoù, e c'hourc'hemennoù, e varnedigezhioù hag e destenioù, hervez ar pezh a zo skrivet e lezenn Moizez, evit ma ri berzh e kement a ri hag e pep lec'h ma'z i,

⁴ hag evit ma seveno an AOTROU ar gomz en deus disklêriet din o lavarout: Ma laka da vibien evezh d'o hent, evit kerzhout dirazon er wirionez, a-greiz o holl galon hag o holl ene, ne vanki ket da gavout ur warlerc'hiad azezet war dron Israel.

⁵ A-hend-all, gouzout a rez ar pezh an deus graet din Joab mab Zeruja, ar pezh en deus graet da zaou benn eus arme Israel, da Abner mab Ner ha da Amasa mab Jeter, en deus lazhet o skuilhañ er peoc'h gwad ar brezel, hag o lakaat gwad ar brezel war e c'houriz en doa en-dro d'e zivgroazell ha war ar botoù en doa ouzh e dreid.

⁶ Ober a ri hervez da furnez, ha ne lezi ket diskenn e peoc'h e vlev gwenn da lec'h ar marv.

⁷ Diwar-benn mibien Barzilhai ar Galaadad, e vi madelezhus en o c'heñver, hag e vint gant ar re a zebro ouzh da daol, rak deuet int etrezek ennon pa dec'hen dirak Absalom da vreur.

⁸ Ha setu emañ ganit Shimei mab Gera, eus Benjamin, eus Bakurim, a lavaras mallozhioù spontus a-enep din, en deiz ma'z aen da Vahanaim. Met diskenn a reas war arbenn din etrezek ar Jordan, hag e touis dezhañ dre an AOTROU, o lavarout: Ne lakain ket ac'hanout d'ar marv dre ar c'hleze.

⁹ Bremañ eta, ne lezi ket anezhañ digastiz, rak fur ez out evit gouzout ar pezh az po d'ober dezhañ. Lakaat a ri e vlev gwenn merket gant gwad da ziskenn da lec'h ar marv.

¹⁰ Ha David a c'hourvezas gant e dadoù, hag e voe sebeliet e kêr David.

¹¹ An amzer ma renas David war Israel a oa daou-ugent vloaz. Ren a reas seizh vloaz en Hebron, ha tri bloaz ha tregont e Jeruzalem.

¹² Ha Salomon a azezas war dron David e dad, hag e ren a voe startaet mat.

¹³ Adonija mab Hagid a zeuas da gavout Bat-Sheba mamm Salomon. Hi a lavaras: Ha dont a rez evit ar peoc'h? Hag e respontas: Evit ar peoc'h.

¹⁴ Hag e lavaras ivez: Ur gomz am eus evidout. Hi a respontas: Komz!

¹⁵ Hag e lavaras: Gouzout a rez e oa ar rouantelezh din, hag e c'hortoze holl Israel ma renfen. Met distroet eo ar rouantelezh ha degouezhet da'm breur, rak an AOTROU en deus he roet dezhañ.

¹⁶ Bremañ eta em eus ur goulenn d'ober ouzhit, na zistro ket da zremm diouzhin. Hi a respontas: Komz!

¹⁷ Hag e lavaras: Da bediñ a ran, lavar d'ar roue Salomon, rak ne zistroio ket diouzh da zremm, ma roio Abishag ar Sunamitez da wreg din.

¹⁸ Bat-Sheba a respontas: Mat! Me a gomzo evidout d'ar roue.

¹⁹ Bat-Sheba a zeuas da gavout ar roue Salomon, evit komz outañ evit Adonija. Ar roue a savas hag a yeas en arbenn dezhi, hag e stouas dirazi, hag ec'h azezas war e dron, hag e reas lakaat un azezenn da vamm ar roue. Hi a azezas a-zehou dezhañ,

²⁰ hag a lavaras: Ur goulenn bihan am eus d'ober diganit, na zistro ket diouzh va dremm. Ar roue a respontas: Gra, va mamm, rak ne zistroin ket diouzh da zremm.

²¹ Hi a lavaras: Ra vo roet Abishag ar Sunamitez da wreg da Adonija da vreur.

²² Met ar roue Salomon a respontas, o lavarout d'e vamm: Ha perak e c'houlennez Abishag ar Sunamitez evit Adonija? Goulenn eta ar rouantelezh evitañ, rak va breur henañ eo, evitañ, hag evit an aberzhour Abiatar, hag evit Joab mab Zeruja!

²³ Neuze ar roue Salomon a douas dre an AOTROU o lavarout: Ra raio Doue din hervez e vrasañ rustoni, ma n'en deus ket Adonija lavaret an dra-se a-enep e vuhez!

²⁴ Ha bremañ, bev eo an AOTROU en deus va lakaet da azezañ war dron David va zad, hag en deus graet din un ti, evel m'en doa lavaret! A-dra-sur Adonija a vo lakaet d'ar marv hiziv.

²⁵ Ar roue Salomon a roas urzh da Venaja mab Jehojada, a skoas warnañ, hag e varvas.

²⁶ Goude-se ar roue a lavaras d'an aberzhour Abiatar: Kae da Anatod, war da zouaroù, rak ez out dellezek eus ar marv, koulskoude ne lakain ket ac'hanout d'ar marv hiziv, rak douget ec'h eus arc'h an Aotrou AOTROU dirak David va zad, hag ec'h eus bet perzh en holl c’hlac’haroù va zad.

²⁷ Evel-se Salomon a gasas Abiatar kuit, ha ne voe ken aberzhour d'an AOTROU, evit ma vefe sevenet ar gomz en doa disklêriet an AOTROU e Silo a-enep ti Heli.

²⁸ Ar c'heloù-mañ a zeuas betek Joab. Joab a oa en em savet evit heuliañ Adonija, petra bennak ma ne oa ket en em savet evit heuliañ Absalom. Joab a dec'has e teltenn an AOTROU hag a grogas e kerniel an aoter.

²⁹ Lavaret e voe d'ar roue Salomon e oa tec'het Joab e teltenn an AOTROU, ha setu, e-kichen an aoter. Salomon a gasa Benaja mab Jehojada, en ur lavarout dezhañ: Kae, ha sko warnañ.

³⁰ Benaja a zeuas da deltenn an AOTROU hag a lavaras: Evel-henn e lavar ar roue: Deus er-maez! Eñ a lavaras: Nann, amañ e varvin. Benaja en disklêrias d'ar roue o lavarout: Joab en deus komzet evel-se ha respontet evel-se.

³¹ Ar roue a lavaras dezhañ: Gra evel m'en deus lavaret, sko warnañ ha sebeilh anezhañ, hag e lami diwarnon ha diwar ti va zad ar gwad en deus Joab skuilhet hep abeg.

³² An AOTROU a lakaio e wad da gouezhañ war e benn, rak skoet en deus war daou zen reishoc'h ha gwelloc'h egetañ, hag o lazhet en deus gant ar c'hleze, hep na ouezas David va zad, Abner mab Ner penn arme Israel, hag Amasa mab Jeter penn arme Juda.

³³ Hag o gwad a gouezho war benn Joab ha war benn e lignez da viken, met peoc'h a vo da viken a-berzh an AOTROU evit David, evit e lignez, evit e di hag evit e dron.

³⁴ Benaja mab Jehojada a bignas eta, hag a skoas warnañ hag en lazhas. Sebeliet e voe en e di er gouelec'h.

³⁵ Ar roue a lakaas Benaja mab Jehojada e penn an arme e lec'h Joab, hag e lakaas an aberzhour Zadok e lec'h Abiatar.

³⁶ Hag ar roue a gasas da c'hervel Shimei hag a lavaras dezhañ: Sav un ti dit e Jeruzalem ha chom ennañ, ha ned i ket er-maez du-mañ pe du-hont.

³⁷ Gouez e varvi dreist mar d'an deiz ma'z i kuit ha ma treuzi froud Kedron. Da wad a vo war da benn.

³⁸ Shimei a respontas d'ar roue: Ar gomz-se a zo mat; da servijer a raio kement en deus lavaret ar roue va aotrou. Evel-se e chomas Shimei e Jeruzalem e-pad pell.

³⁹ Met a-benn tri bloaz, daou servijer Shimei a dec'has da gavout Akish mab Maaka, roue Gad. Hag e voe disklêriet kement-se da Shimei o lavarout: Setu, da servijerien a zo e Gad.

⁴⁰ Shimei a savas hag a zibras e azen, hag e yeas da C'had da gavout Akish, da glask e servijerien. Shimei a yeas eta, hag e tegasas gantañ e servijerien eus Gad.

⁴¹ Hag e voe lavaret da Salomon e oa aet Shimei eus Jeruzalem da C'had, hag e oa deuet en-dro.

⁴² Ar roue a gasas da c'hervel Shimei hag a lavaras dezhañ: Ha ne'm oa ket graet dit touiñ dre an AOTROU, ha ne'm oa ket lavaret dit: Gouez e varvi dreist mar d'an deiz ma'z i kuit ha ma'z i er-maez du-mañ pe du-hont? Ha ne'z poa ket respontet: Ar gomz-se a zo mat, klevet em eus?

⁴³ Perak eta ne'c'h eus ket miret le an AOTROU hag ar gourc'hemenn am boa roet dit?

⁴⁴ Hag ar roue a lavaras da Shimei: Gouzout a rez an holl zroug ac'h eus graet da Zavid va zad, gouzout a rez kement-se ez kalon, setu perak an AOTROU a ra da'z trougiezh kouezhañ war da benn.

⁴⁵ Met ar roue Salomon a vo benniget, ha tron David a vo startaet dirak an AOTROU da viken.

⁴⁶ Ar roue Salomon a roas urzh da Venaja mab Jehojada, a yeas hag a skoas warnañ, hag e varvas. Hag ar rouantelezh a voe startaet etre daouarn Salomon.