Jó 39:5 - Kaxinawá Bíblia (BR) Jumento inabiakẽ tsuã nitxinimẽ, hau yuinaka betsa keskai hamebi hiwekũkainunã, hawẽ nesha pekatã tsuã mekeama hau ibubis hiwenũ tashnimakinã? |
Ha mĩ huni bake ewatã tsuã mekĩ daewakĩ yurãwãtiruma keska ishanikiki, yuinaka ni merã hiwea hawẽ yura cavalo keska pubenã. Haska keskariai dasibibuki hatuki sinataya haki sinatariakubaĩshãkanikiki. Ha inũ, hawenabu mestenepa wakĩ hatu kushipa Deusũ wanikẽ hanua tsuãra haki sinatabiakĩ hawa maematirubuma ipakeshãkanikiki— aka
Mae txaihaira ni merã jumento hiwemis dami huni itirumaki. Habiaska keskariai huni unaĩsmapa betsai damitã barikis unanepatirumariki.
Ha ina awa mĩ dayamakatsis ikai hi tekishkũshũ nĩkamas mĩ bai berẽ amakĩ hẽ iyamabiaya mĩ pewamabaĩtirumẽ? Kayãbis kakĩ dayakaĩkĩ mia katxũ kaya mia pukĩ pukĩ akĩ pewashũbaĩtirumẽ?
Hanua kaĩtãs hamebi benia damesteni kushipatã ni anua ewatã txipu hawẽ ibu dapashkabaĩmiski, ana hanu hawẽ ibu anu txĩtuãmarã.
Ha inũ, shanẽ ibuhairatũ hiwe hawẽrua heneshãkanikiki. Ha maewã merã yurã kaiã hiwebiamisbu hanu ana tsua hiweama ishanikiki. Hatũ iruti mishkiwẽ kenebaũkĩ kushipa wanibu henekibi heneshãkanikiki. Haska wabainibu anu jumento unãhaira hari benimai hiwea anu habianuri ina awã basi pishãkanikiki.
Jumenta yushã inama mati matipa anu nia himi iki hawẽ bene benai kashamis keskakĩ txakabu betxipaikĩ mã benakubaĩmisbuki. Yushã himi ikĩ hawẽ benewẽ kemuai tsuã meketiruma keskakĩ txakabuwẽ mã kemukũkaĩmiski. Yushã himi ikai benẽ shetekĩ benabaũkĩ hĩ ikama hawaira haki nukumis keskakĩ txakabũ matu atximiski.
hau tari hiweyukũkaĩshanũ nitxiãbu dami betsai yuinaka keskai jumento inamabe hiweshũ ina awa keskakĩ basi pikubaini basnũmã hawẽ yura txa akubaina Deus kushipahaira dasibi hatu binuatũ yurabũ shanẽ ibu hatũ tsuara shanẽ ibu wakatsis ikĩ hatu betxipaikĩ katumis tapĩriama yuinaka keskai hiwekũkaĩkĩ atimas mĩ hutxĩ tapĩkĩ unaniki.