Jeremias 2 - Kaxinawá Bíblia (BR)

Israelĩ enabũ Senhor Deus danãkĩ txibã pewama inibukiaki, na hãtxarã

¹ Betsatiã Senhor Deusũ ana ea hãtxa wakĩ yuikĩ:

² “Jerusalém anu kashũ hari hiweabu ea hatu hãtxa washũtãwẽ, hau nĩka pe wanũbũ hui kushipawẽ hatu yuitãwẽ: ‘Eska Senhor Deusũ matu yuikiki. Matũ shenipabu aniburiama inũ yushaburiabumã ẽ hãtxa txibãkĩ ea danãma inibu ẽ hatu shinaiĩ. Ẽ hatu aĩwãkĩ akawa ea betxipainibuki. Hanu tsua hiweshũ mibãkĩ uruisbumanu ẽ hatu iwea kapukekubirãkĩ matũ shenipabũ ea txibãkubiranibuki.’

³ Israelĩ enabu ena wakĩ hatu pashkatã ẽ hatu meribi waniki, bimi pepa ha dukũ tsekashũ arumisbu keska wakinã. Tsuãra enabu itxakawakĩ hatu bika tenemaibu eã hatu kupishũriakĩ atimapa txakabu ẽ hatu anu yunupauniki. Ea ẽ Senhor Deusũ ẽ txanima hãtxawẽ ẽ mia mestẽwaiĩ”, ea waniki.

^4-5 Betsatiã ana hatu yuikĩ: Jacó enabu Israelĩ bakebu shukuabu tibibuũ, Senhor Deusũ eska matu hãtxa waikiki, nĩkakãwẽ. “Matũ shenipabunã, ẽ hawa hatu txakabuwa ea anua betxitã ea henebainimabumẽ? Ha deus kayabima hamẽ dami txibaĩmaburã, ibubis maetã hatumebi hawa ana kushipa hayabumaki.

⁶ Matũ shenipabu Egito anua ẽ hatu tashnimabirãkĩ mai txakabu tashka ũpash hayama anu inũ, hamapai mese tibi haya hanu tsua hiweama inũ, hanu tsua kapukekaĩsma anu hatu iwekubirãkĩ nenu ẽ hatu hiwemabiani ẽ ana hatu merabewatiruma dabanẽ ikĩ ea ana benakĩ matũ shenipabũ ea shinãma inibuki.

⁷ Hanua yunu inũ bimi pepa hau pikubaĩshanũbũ na mai pepa anu mĩ shenipabu iweshũ ẽ hatu ibu wamaniki. Ẽ hatu ibu wamani anu maturi kaĩtã hanua yumetã ẽ mai txakabuwakĩ atimapa wakĩ mã ea danãmakĩ ea hatsãmaii.

⁸ Matunabu ebe matu hãtxashunikabũ ea benabumaki. Moisĩ hãtxa una hayabia hawẽ ea unãbiakĩ yusinãbũ ea shinãbumaki. Matũ shanẽ ibubũ ẽ hãtxa betxipaiama ea danãkubainibuki. Ẽ hãtxa yuishunikabũ yushibu Baal hãtxashũkubainibuki. Yushibu dami tibi hawa merabewatirubumahaira hamẽ kẽwãkubainibuki”, ikĩ

Israelĩ enabu Senhor Deusũ hatu txitenikiaki, na hãtxarã

⁹ “Eskawẽ taeshũ ea Senhor Deusũ eska ẽ matu mestẽwaiĩ: Matu inũ matũ bababu ẽ matuki ha iki taeaii.

^10-11 Nawabũ ea ikũwãbumã yushibu kẽwãkĩ henetã yushibu betsa kẽwaĩ maea akeakekanimẽkaĩ, benabaũkĩ hau uĩ pewatanũbũ mae ewapa Quedar anu tsuara yunukãwẽ. Habiaskariakanimẽkainã, yushibu tibi kẽwaĩ maeirã. Hatu uĩ bari kaikiri natukã betsa betsapa anu butãkãwẽ. Ha yushibubu deus kayabima maewakĩ betsa katuisbumaki. Hakia mã enabunã, ea betxipaiama mã ma ea heneabuki, ẽ matũ mekenã kushipa ẽ duapa matũ shenipabũ ea uĩbianibunã. Haska wakĩ damipã hawa hatu merabewatirumabiakẽ txibãkĩ enabũ ea henenibuki.

¹² Nai anuabuũ, haska ẽ yuishu nĩkai mesehairakubaĩkãwẽ, datei saki saki ikirã. Ea ẽ Senhor Deusũ ẽ txanima hãtxawẽ ẽ mestẽwaiĩ.

¹³ Israelĩ enabu ẽ hatu ibuwabiani itxapahairaki txakabui keshtunibuki. Ẽ hatũ hiwemati txatxa ũpash keskabiakẽ ea henebainibuki. Haskakĩ hatumebi mishki pukĩtã ũpash aruti keska wabia ibubis pesetã hani ana ũpash matati hayama keskai yushibubu kushipa hayama dami watã txibãkubainibuki.

Israelĩ enabũ Deus henekubainaibu hatu kupikubainikiaki, na hãtxarã

¹⁴ Israelĩ enabu tsuã dayaru escravomaki. Hatũ ibu escravoma ibianiwẽ taea Israelĩ enabu escravo kaĩyama inibuki. Haskakĩ nawabũ hatu atxitã hatuna wamisbumẽ?

¹⁵ Haskakĩ inu betsa leão pubeĩ tekerẽ tekerẽ ikiranai keskakĩ minabu hatu mesewakubaĩmisbumẽ? Matũ mai pakea txakabuwakĩ keyubaũkĩ matũ maewã tibi kuakubaũmisburã, hanu tsua ana hayabumaki.

¹⁶ Egito anu maewã dabe Nofa inũ Tafnes anua beshũ matũ bushka matu pusa pusa abaũkĩ keyuyamabuki.

¹⁷ Na eska nawabũ matu wakinã, ea ẽ matũ mekenika Senhor Deusũ ẽ baiwẽ ẽ matu iyubia ea txibãma mã ea heneabuwẽ taeshũ matu itxakawamisbuki, ẽ ana hawa matu hatu nemashunamarã.

¹⁸ Haskai Hene Nilo anu ũpash anũ ikai keskai Egito anu mã kamismẽ, hau matu merabei benũbũ hatu benairã? Haskai Hene Eufrates ũpash anũ ikai keskai Assíria anu mã hamẽ kamismẽ, hau matu merabewai benũbũ hatu benairã?

¹⁹ Mã haskamiswẽ taea matũ txakabuwẽ ibubis mã kupiti bikubainaii. Duawakĩ mã ea nĩkaismawẽ taea ibubis mã benushanaii. Ẽ ea Senhor Jeová ẽ matũ mekenikabia mã ekiri hãtxai peama ea henekubaĩmisburã, mesehaira inũ txakabuhaira mã tenekubaĩshanaii. Haska uĩkĩ mekĩ shinãkubaĩshãkãwẽ. Ẽ Senhor Deus kushipa dasibi binuawẽ taea ẽ hãtxa ẽ mestẽwaiĩ”, iwanã,

Israelĩ enabũ Deus danãkĩ sinatamanibukiaki, na hãtxarã

²⁰ “Bari itxapa hiwekubirãkĩ ẽ hãtxa nĩkakatsi ikama mã ea danãkubiraniki. Hanushũ matũ ea yuikĩ: ‘Senhor Deus ẽ duawakatsi ikamaki’, ibiatã mati keyatapa tibi inũ, hi ewapa tupãyã namã tibi anu yushibu dami bebũ dãti iki beti ishũ mã txutamakĩ akawakubaĩmiski.

²¹ Uva nishi pepa katutã ẽ matu banakĩ akawaniki, hiwemakinã. Hakia pepa ibiani txakabui mã pikukũkainaiwẽ taea ẽ matu unãbiani ikis mã tsuabura ẽ ana matu unãmaki.

²² Salitre inũ sabão itxapahairawẽ mã txakabumis dashkihairabiakĩ matũ txakabu meshu detsis keska ea bebunua mã tushkutirumaki. Ea ẽ Senhor Jeová ẽ txanima hãtxawẽ ẽ matu mestẽwaiĩ”, iki ẽ haskaya

²³ matu iki: “ ‘Nukurã, nũ hawa meshu detsismaki. Yushibubu txani nũ kẽwaĩsmaki’, ikĩ mã yuibiairã, pashku napaku anushũ hune txakabu hawara mã akubainima shinãkãwẽ. Txakabu dasibi mã akubaĩmis uĩkĩ shinãkubaĩkãwẽ. Camela yushã depesekeuma hamebi nia ishtxuakeakemis keskakĩ txakabu mã txibãmiski.

²⁴ Jumenta yushã inama mati matipa anu nia himi iki hawẽ bene benai kashamis keskakĩ txakabu betxipaikĩ mã benakubaĩmisbuki. Yushã himi ikĩ hawẽ benewẽ kemuai tsuã meketiruma keskakĩ txakabuwẽ mã kemukũkaĩmiski. Yushã himi ikai benẽ shetekĩ benabaũkĩ hĩ ikama hawaira haki nukumis keskakĩ txakabũ matu atximiski.

²⁵ Israelĩ enabuũ, nawã yushibubu hawaira txibaĩ matũ bitxi tae saweriama ibubis kai itxakanikayamakãwẽ. Yushibubu kẽwaĩ sai sai iki matũ hui menuyamakãwẽ, hamenã. Hakia matũ ea yuikĩ: ‘Nũ haska henetirumaki. Nawã yushibu betsa betxipaikĩ ẽ beyawaniwẽ taea hatube nia ẽ ikaii’, mã imiski.

Israelĩ enabu atimapa hiweabuwẽ taeshũ Senhor Deusũ hatu kupishanikiaki, na hãtxarã

²⁶ “Yumetsu betxishũ txiteabu dakemis keskai Israelĩ enaburã, haska keskai mã dakekũkaĩshanaii. Ha maewã anu mã hiweabu inũ, matũ shanẽ ibuhairabu inũ, matũ shanẽ ibu beshmasbu inũ, matunabu ebe hãtxashunikabu inũ, ẽ hãtxa yuishunikabu mã dakekũkaĩshanaii.

²⁷ Hi sẽke dami wakĩ huni wanibu yuikĩ: ‘Miarã, mĩ ẽ epaki’, akĩ mishki dami wakĩ aĩbu wanibu yuikĩ: ‘Miarã, mĩ ẽ ewaki’, akĩ habu haska wabiakĩ hamẽ eki ikirã, eki petxitã ea betxãkameshũ uĩmaismabia hanu txakabu matu anu huaitiã datekĩ ea yuikĩ: ‘Hatu nemakĩ nuku mekei menã huriwe’, ikĩ mã ea kenamisbuki.

²⁸ Judá enabuũ, hania matũ mekenika dami mã akubainimarã? Matũ mae tibi anu yushibu mirima mã hayaki. Matu itxakawai beaibũ matũ yushibu damipã matu merabewakĩ matu pashawai betirubumẽ?

²⁹ Dasibibu mã eki ha imisbuki, eki sinatai ea danã paepawairã. Ea ẽ Senhor Deusũ ẽ txanima hãtxawẽ ẽ matu mestẽwaiĩ.

³⁰ Matũ bakebu ẽ hatu yusĩbia hawa tapiãbumabiakẽ hamẽ ẽ hatu kupimiski. Maturã, pubenepa mã inu betsa leão keskabuki. Ẽ hãtxa yuishunikabu ẽ matu yunua hatuki sinatakĩ mã hatu tenãkubaĩmisbuki.

³¹ Ha dikabi mã ikis hiweaburã, pestã Senhor Deusũ hãtxa nĩkakãwẽ. Israelĩ enabuũ, earã, mã ea uianã, ẽ hanu tsua hiweabumanu keskamẽ, hawa hayamarã? Mai anu bari pesheama ẽ matu anua hunea keskamẽ? Ẽ haska matu ishuĩsmaki. Enabuũ, haskai hãtxa txakabukĩ yuikĩ: ‘Nukũ yununika nũ hayamawẽ taea mia anu nũ ana txĩtũkatsi ikamaki’, mã ikũkainai?

³² Txipash beneyai kakinã, hawẽ dauti hawẽrua saweirã, hakimatirumẽ? Hakimatirumahairaki. Hamẽ mã enaburã, bari itxapa kakũkaĩkĩ mã ea hakimakũkainaii.

³³ Hawara txakabuwẽ kemui betxipaikĩ benabaũkĩ beya txakabu tibi mã unãhairakubainaii. Hanushũ txakabu tapiaĩbu anua mã hatũ yusinãki.

³⁴ Hawara yurabũ txakabuwaibuki nukutã hatu txiteamabia nuitapaibu inũ pepabu detekĩ tenãkubaini matũ tari himiwẽ mã iruma keskaki.

³⁵ Mã haskabiakũkaĩmis ibubis yuikĩ: ‘Ẽ hawa hatu txakabuwaismaki. Eki hawa Deus sinatama ishanikiki’, ikĩ mã hunebiakubaĩmis uĩshãkãwẽ. Eanã, shabakabi ẽ matu unãti washanaii, mã pemẽkaĩ, mã txakabumẽkainã, hawẽ taeshũ matu kupikatsirã.

³⁶ Haskai hawaira mã merabenãti betsa benamisbumẽ? Ha Assíria nawabũ matu ana merabewatiruma babushinabũ haska hau Egito nawabũ matu merabewanũbũ mã benaiburã, baburiashãkanikiki.

³⁷ Egito nawabũ matu merabewamawẽ taea dakeyabi habũ mai pakea anua mã txĩtũshanaii. Hatuki txiti iki hatu haibuwanũ ika mã ibiaya ẽ hatu matu danãma mã hatube haibunameama ishanaii”, akĩ Senhor Deusũ hatu yuinikiaki.