Jeremias 2:8 - Kaxinawá Bíblia (BR)

⁸ Matunabu ebe matu hãtxashunikabũ ea benabumaki. Moisĩ hãtxa una hayabia hawẽ ea unãbiakĩ yusinãbũ ea shinãbumaki. Matũ shanẽ ibubũ ẽ hãtxa betxipaiama ea danãkubainibuki. Ẽ hãtxa yuishunikabũ yushibu Baal hãtxashũkubainibuki. Yushibu dami tibi hawa merabewatirubumahaira hamẽ kẽwãkubainibuki”, ikĩ

Jeremias 2:8 Referencias Cruzadas

1 Reis 18:22

Eliasĩ ana hatu yuikĩ: —Senhor Deusũ hãtxa yuishunika ea besti bashikuima ẽ hiweaki. Hakia 450 Baalĩ hãtxa yuishunikabu hiweabu ha mapukana.

1 Reis 18:29

ma bari mananãbi binukainaya hawa heneama nishi pae aka paeã keska unãyamasi sai sai iki ishtxu ishtxu ibiakubainaibũ tsuã nĩkatã hawa tsuã huiwẽ hatu kemamakẽ ma hanu bari kaitiã Jerusalém anushũ Senhor Deusũ kẽwãti hiwe anushũ inabu hirabi hanu hatu kuashũmisbu kemaya Baalĩ hãtxa yuishunika dasibibũ yukakĩ heneaibũ tsuã hawa kemama inũ tsuã hawa hatu nĩkamawẽ taeshũ

1 Reis 18:40

hanushũ Eliasĩ hatu yuikĩ: —Baalĩ hãtxa yuishunikabu dasibi hatu atxikãwẽ, hau betsa pashayamanũbunã— hatu wa hawaira hatu atxiabu pashku netsu Quisom anu hatu matxi butemabaĩ Eliasĩ harishũ hatu yunua dasibi hatu tesẽ keyuabũ,

Isaías 28:7

Betsabu ikirã, vinhowẽ paeã ni peama keshka keshka iki hanua shia paepa aki hawẽri paẽhairai berame berame iki di imisbuki. Habu hawenabu Deusbe hãtxashunikabu inũ Deusũ hãtxa yuishunikabũ ha shia paepa akawẽ taea ni peama keshka keshka iki inũ vinho aki paeãwẽ taea shinã pe watirubumaki. Nama keskakĩ habũ Deusũ yusiã uĩkĩ nĩkabiatã pe shinãtirubumaki. Paẽtã hatu unãti wakĩ haratu pe inũ haratu txakabumẽ, ishũ hatu unãtirubumaki.

Isaías 30:5

ha nawabũ hawa matu merabewama hamẽ matũ shanẽ ibubu bushiãbu dakebirãshãkanikiki. Hawa merabe inũ benima matu beshuãma txakabu inũ dake pae matu beshũshãkanikiki.”

Jeremias 2:6

Matũ shenipabu Egito anua ẽ hatu tashnimabirãkĩ mai txakabu tashka ũpash hayama anu inũ, hamapai mese tibi haya hanu tsua hiweama inũ, hanu tsua kapukekaĩsma anu hatu iwekubirãkĩ nenu ẽ hatu hiwemabiani ẽ ana hatu merabewatiruma dabanẽ ikĩ ea ana benakĩ matũ shenipabũ ea shinãma inibuki.

Jeremias 7:8

Hamẽ parã hãtxa hawamabiakẽ hatu ikũwãkĩ mã nĩkakubaĩmisbuki,

Habacuque 2:18

Yushĩ hatu dami wamakĩ keyutã hawẽ hawa watimẽ? Hamẽ besti kẽwãtirubuki. Ha yushĩ damirã, hakiri hawẽ txani besti mia unãmakĩ yusĩtiruburã, hawẽ hawa watimẽ? Hamẽ besti nĩkatirubuki. Yushĩ dami haska hãtxatiruma tsuãra ha yushĩ dami wabiamisrã, haskatã haki txiti itirumẽ? Txanima hamẽ tsua haki txiti itirumaki.

Mateus 16:26

Hamẽ tsuãra mabu mirimawẽ kemu bestikĩ itxawashũ ea ikũwãkĩ txibãma hatũmebi hatũ hiwekuĩa benushãkanikiki, eauma mawairã. Ha inũ, hatũ hiwea pakatã tsuã ana bitirumahairaki.

Lucas 11:52

—Deusũ hãtxa kenenibu yusĩnanãmisbuũ, mã peirawa! Deusũ hãtxa hawẽ hiweti unãbiai nĩka pewama tsuabura Deus shanẽ ibuai anu hikikatsi ikaibu mã hatu nemamiski. Maturi mã hikitirumabia habu betsabu hikipanãbũ mã hatu nemakubainaii— hatu waya

João 16:3

ẽ Epa Deus unãma eari unãbumawẽ taeshũ matu hawa unãma itxakawashãkanikiki.

2 Coríntios 4:2

Hakia hawa dakeama hawara huneshũ nũ aisma inũ, matxupakĩ tsua nũ paraĩsma inũ, Deusũ hãtxa hamakiri yuikĩ nũ betsa waismaki. Nũ haska wamiswẽ taea hiwekĩ nũ yusĩmis Deusũ unãyã hawẽ hãtxa nũ matu shabakabi yusĩkubaĩmiski, hau dasibibũ nukũ yusĩa nĩkatã hatũ xinã pewanũbunã.

1 Samuel 12:21

Ana yushibu dami hawẽ parananaĩbu hiwea hayama txibãkĩ kẽwãyamakubaĩshãkãwẽ. Hiwea hayabumawẽ taeshũ hatũ matu mekekĩ merabewatirubumaki.

1 Samuel 2:12

Elĩ huni bake dabe hawenabu Deusbe hatu hãtxashunikabia Senhor Deuskiri hawa shinã pewama txakabukubainaibũ hatunabũ Senhor Deus benimawanũ, iwanã, Siló anu hatũ inabu beshũ tesẽtã dashpeshũ hawẽ sheni dukũ bitã hau Deusbe hawenabu hãtxashunikatũ Deus kuashũkĩ menushunũ hanu Senhor Deuski nukuti tari hiwe pũtenibu anu bua ma hawẽ sheni menukĩ keyushũkẽ hanushũ hawẽ nami meshte meshte atã kẽti ewapaki nami huabu kukatsa ikaya Deusbe hãtxashunikã dayaru betsa hawẽ txatxitã neshetiya hushũ