Jeremias 2:13 - Kaxinawá Bíblia (BR)

¹³ Israelĩ enabu ẽ hatu ibuwabiani itxapahairaki txakabui keshtunibuki. Ẽ hatũ hiwemati txatxa ũpash keskabiakẽ ea henebainibuki. Haskakĩ hatumebi mishki pukĩtã ũpash aruti keska wabia ibubis pesetã hani ana ũpash matati hayama keskai yushibubu kushipa hayama dami watã txibãkubainibuki.

Jeremias 2:13 Referencias Cruzadas

2 Reis 22:17

Matũ shenipabũ ea henetã yushibu betsa betsapabu kẽwãkĩ hatu bebũshũ sheni ininipa kuashũkĩ ea sinatamahairanibuki. Haskawẽ taea na maeki ẽ sinatahairani ibubis haskatã ẽ hawa daetirumahairaki.

Isaías 1:3

Awa bene ana pubẽmawakĩ hawẽ hubu meshteabu ana pubẽma hatũ ibu unãti wamamisbuki. Ha inũ, jumentõ ha hiwe anu hanu ibuã ushãmis unãriamiski. Hakia Israel enabu wakĩ ẽ hatu katubiani ea unãbuma inũ ekiri daki shinã hayabumaki.”

Isaías 1:4

Mã hunibu txakabuhairarã, mã peirakãwã! Mã yurabu atimapa txakabu bestiwẽ kemui mã hiwearã, matũ ibubũ txakabuwakubainibuwẽ taea mã hawẽ bakebũ habias txakabu txibaĩbu inũ, mã hawẽ bababũ haska ariaiburã, haska wakĩ mã ma Senhor Deus heneaki. Israelĩ Deus mekenã meribi mã hayabia putatã mã ma shunũbainaki.

Isaías 55:2

Haskai mã hamẽ pei inananãmismẽ, pitimabiakẽ hamẽ putakinã? Haskakĩ matũ daya pei mã hatu inãmismẽ, hawa matu merabewakĩ shinã txãkãwatirumabiakenã? Ea nĩka pewakubaĩkĩ mã piti pepa pishanaii, hawara piti kemutapa mã betxipaiai pikinã.

Isaías 63:8

Deusũ yuikinã: ‘Ha enabu ẽ bakebunã, hawa ea danãkĩ ea txakabuwama ishãkanikiki’, itã hatũ habu piskumaikiki,

Jeremias 1:16

Nawabũ hatũ yushibu dami watã kẽwãmisbu enabũri ha dami kẽwãkĩ ha bebũshũ sheni ininipa kuakubaĩkĩ ea danãkĩ henenibuwẽ taeshũ ha txakabubu hau hatu kupinũbũ shanẽ ibu txakabubu hatu anu ẽ yunushanaii.

Jeremias 2:17

Na eska nawabũ matu wakinã, ea ẽ matũ mekenika Senhor Deusũ ẽ baiwẽ ẽ matu iyubia ea txibãma mã ea heneabuwẽ taeshũ matu itxakawamisbuki, ẽ ana hawa matu hatu nemashunamarã.

Jeremias 2:26

“Yumetsu betxishũ txiteabu dakemis keskai Israelĩ enaburã, haska keskai mã dakekũkaĩshanaii. Ha maewã anu mã hiweabu inũ, matũ shanẽ ibuhairabu inũ, matũ shanẽ ibu beshmasbu inũ, matunabu ebe hãtxashunikabu inũ, ẽ hãtxa yuishunikabu mã dakekũkaĩshanaii.

Miquéias 2:8

Uatiã enabu ibiashina shinã betsa watã natiã mã eki sinataii. Habu detenametani txĩtũbirãkĩ hatũ tari pepa karuhaira beaibu mã hatu mebĩmiski, tsuã matu ana metiruma dabanẽ shinãkinã.

Miquéias 6:3

ana Senhor Deusũ matu yuikĩ: “Enabuũ, hawa ẽ matu txakabuwaimamẽ? Hawawẽ ẽ matu bika tenemaimamẽ? Ea yuikãwẽ!

João 4:10

Jesusũ yuikĩ: —Hawara Deusũ mia inãkatsi ikai inũ tsuãra mia ũpash yukai unãkĩ mĩ ea yuka ũpash netsuisma ẽ mia inãkeãshuki— aka

João 4:11

aĩbũri yuikĩ: —Shanẽ ibuũ, na ũpash kini pukĩkinã, nukũ shenipabu Jacõ anishũ hawẽ bakebu inũ hawẽ inabubetã apauniburã, nuku heneshũbainiki. Haska nuku ashũbainiwẽ taeshũ nukũ shenipabu Jacó kuxiparã, mĩ binũamẽ? Ha dikabi na kini keyatapahairaki. Xumu inũ dispi txaipa mĩ hayamaki. Ũpash netsuismarã, hania hawawẽ bitã mĩ ea inãtirumẽ?— aka

João 4:14

—Hakia tsuabũra ũpash ẽ inaĩ atanã, ana tetsusini manuama ishãkanikiki. Habu tibi merã txatxa ũpash netsuisma keskatũ hatu hiwekuĩmashanikiki, ikibi imakinã— aka

João 7:37

Nawai keyui hawẽ henei ma shaba dabe inũ besti kaya nawai besi bexiã ma kakatsi keyui dasibi itxahairabũ Jesus benikawã hãtxa kuxipawẽ hatu yuikĩ: —Ũpash manuhairai mã tetsusinairã, eanu beshũ aki bekãwẽ, ea ikũwãkinã.

2 Pedro 2:17

Ha yusĩnã paranãmisburã, ũpash bana tashka heneuma keska inũ nai kuĩ niweya bebiai uiuma hawa txa akama keskabuki, hatũ yusĩa hawa pepa hayamarã. Ha habu haskamisburã, Deusũ hatu kupia ikibi ika meirã, hanu mexu tẽ ikihairai anu hatu putashanikiki.

Apocalipse 21:6

ana ea yuikĩ: “Dasibi haskashanai ẽ yuinirã, ma ẽ akĩ keyuaki. Ea dukũ ẽ ini inũ niti ikama ẽ hiwepakeshanaii. Tsuabũra ũpash akatsis ikĩ manuaibu keska ea anu beaibu ẽ hatu hiwea inãshanaii, hawa hatu pakamamarã.

Apocalipse 22:1

Hanushũ shanẽ ibu haki tsauti Deus inũ txashuwã bake haki tsauwabu anua hene hiwekuĩa haya kawana beshnã pehaira bishtu keska nai tsumã ea uĩmashuki.

Apocalipse 22:17

hanua nũ Txashuwanẽ aĩnẽ habũ nũ ikũwaĩbunã, Yushĩ Pepabetã Jesus yuikĩ: “Huriwe!” nũ ikaya tsuabũra nuku nĩkakĩ: “Hau hurinũwẽ!” hau irianũbũwẽ. Ha inũ, tsuabura ũpash manui keskakĩ Deus benakĩ Jesus txibãkatsis ikĩ hau ikũwanũbũwẽ. Haska watã hawẽ ũpash hiwemati haya hau aki benũbũwẽ, hawa pakamarã.

1 Samuel 12:10

hakia txipu huĩti nishmashũ haska ma kaneshina Senhor Deus yuikĩ: “Mia danãkĩ mia henebaĩ yushibu Baal inũ Astarote kẽwãkubirani nũ txakabuhairaimaki. Nukuki sinataibu nuku nemashũwẽ, hau nuku ana yunuyamanũbunã. Mĩ nuku haska washuna mia besti duawakatsis ikĩ nũ mia yubaii”, akabu