Jó 39 - Kaxinawá Bíblia (BR)

¹ “Mati matipa anua yuinaka cabra hatiã hawẽ bake kaĩmisrã, mĩ unaĩ? Txashu bake kaĩ kamiairã, mĩ ma uĩmamẽ?

² Hati ushe txashu bakeyatã hanu kaĩmis mĩ ma unaĩ?

³ Txashu yushã hawẽ bake kainũ ika kami txĩtxa daka kaĩtã isĩhairai maĩmiski.

⁴ Hanua kaĩtãs hamebi benia damesteni kushipatã ni anua ewatã txipu hawẽ ibu dapashkabaĩmiski, ana hanu hawẽ ibu anu txĩtuãmarã.

⁵ Jumento inabiakẽ tsuã nitxinimẽ, hau yuinaka betsa keskai hamebi hiwekũkainunã, hawẽ nesha pekatã tsuã mekeama hau ibubis hiwenũ tashnimakinã?

⁶ Hanu tsua hiweabuma anu napãpa mai salya hau hanu hiwenũbũ ha jumento nitxĩkĩ uĩmakĩ eã ẽ hatu metuniki.

⁷ Mae ewapa anua yurabu hãtxawaĩbu jumentõ hatu betxipaiama inũ habũ jumento yunukĩ sai amisbu nĩkakatsi isbumaki.

⁸ Pinũ ika mati inũ pãpa tibi anu basi pepa benai jumento nikũkaũmiski.

⁹ Ina awa bene ibuuma yuinaka keska hiwekũkaĩmis mia dayashũtiru mĩ shinaĩ, mĩ ina hiwe anu pubẽbiakẽ ushãkubaĩkinã? Mĩ haska bitxitirumahairaki.

¹⁰ Ha ina awa mĩ dayamakatsis ikai hi tekishkũshũ nĩkamas mĩ bai berẽ amakĩ hẽ iyamabiaya mĩ pewamabaĩtirumẽ? Kayãbis kakĩ dayakaĩkĩ mia katxũ kaya mia pukĩ pukĩ akĩ pewashũbaĩtirumẽ?

¹¹ Mĩ daya hau ibubis mia ashũkubainũ ina awa bene pubẽ kushipawẽ taeshũ mia pe dayashunũ ha besti mĩ henetirumẽ?

¹² Mĩ shekiwã trigo tsekashũ mĩ mae anu hanushũ mĩ shememis anu mia itxawashũtirurã, haska mĩ shinaĩ? Mia haska washũtirumahairaki, pubẽhairawẽ taearã.

¹³ Yuinaka peiya avestruz hawẽ pei bitxu nãketapa keskabia benimai pea pea ibiamis manaũri nuyakaĩtirumaki, hawẽ pei kushipamawẽ taearã.

¹⁴ Hanua bari txashakĩ hawẽ batxi hau shana wanũ hawẽ batxi mashi anu paketã henebaĩmiski,

¹⁵ yurabu inũ yuinakapã pemakĩ hawẽ batxi txakabuwãtiru hawa shinaĩ hawa nuiamarã.

¹⁶ Hawenama keska hatũ bake ibubis tushiabu hatu hawa mekeisbumaki, hawẽ batxi pakei hamẽ dayashina hawa ana shinãmarã.

¹⁷ Eanã, avestruz hawa unanepati ẽ inãma iniki, hawa pe shinãtiruma wakinã.

¹⁸ Hakia benitã pea pea ikayabi kushikaĩkĩ cavaloki katsaumea buaibu hawaira hatu binubaĩkĩ hatu usãbaĩmiski.

¹⁹ Cavalo kushipa wakĩ inũ hawẽ teshu anu bu txaipa hawẽrua wakinã, miã mĩ animẽ?

²⁰ Yurabu datehairamai hãsh hãsh iki cavalo mĩ ishtxumatirumẽ, shini ishtxumis keska wakinã?

²¹ Kanũ ika hawẽ kushipa hatu uĩmai pãpa anua taweshiki taweshiki ikĩ huni katsaumea detenameaibu anu hawa dateama cavalo hikibaĩmisbuki.

^22-23 Hawara mesehairabiakẽ usaĩ huni haki katsaumea hawẽ pia itxapa txineshekeaya bei kushama kushama abiranaibũ inũ nupe txaipa inũ hashi txaipawẽ detenamei baka baka iki detenameaibũ hawa datei teku itã cavalo txĩtuĩsbumaki.

^24-25 Txaikea detenamei sai sai ikaibu cavalõ nĩkakĩ hatũ himi shetei hanua trombeta txã txã akaibũ ana hawẽ dekĩwẽ hãsh hãsh iki hawa manai pes nitiruma tsuã hatu nematiruma detenameaibu anu hawaira kushibaĩmisbuki.

²⁶ Hamẽ betsarã, hau tete nuya tapĩtã sulkiri nuyakaĩtanũ unanepa wakĩ miã mĩ yusĩmismẽ?

²⁷ Nawa tetẽ hau manaũrihaira hawẽ batxi paketi na wanũ pewamakinã, habia miã mĩ amamismẽ?

²⁸ Mati keyatapahaira mamaki mishki betsa naeshpa anu nawa tete yushã hanu bariri inũ meshu merã huĩrukũkatsi hanu hawa hikitiruma ushakatsi na wakĩ hawẽ iruti watã hiwemiski.

^29-30 Hari manaũrihairashũ manakĩ hawẽ piti nami hawara betxitã atxishũ hawẽ bakebu nami himiyabi pimakubaĩmiski. Yuinaka betsa mawa inũ detenamei mawabu anu nawa tetẽ nami pi itxa mapumisbuki”, itã