Jó 11 - Kaxinawá Bíblia (BR)

Zofarĩ haska shinaĩ keska Jó yusĩrianikiaki, na hãtxarã

^1-2 [Jó huĩti nishmashũ haska Deuskiri Bildadẽ yusĩkĩ yuia danãkĩ Jó nĩkama iniki.] Hawẽ haibu betsa Zofarĩ Jó nĩkatã yuikĩ: “Mĩ hãtxahairakũkaĩshuwẽ taeshũ hau tsuãra unãkĩ mia kemanũwẽ. Haska shinaĩ mĩ hãtxa txaipahairashu keska, txanima hãtxa hayamaki.

³ Hamapaikiri nuku yuikĩ hãtxa txakayamakĩ mĩ nuku pes tsaumairã, mĩ haskara shinaĩ ikai? Mĩ hãtxa txakabuai tsuabũra mia nĩkakĩ kematirubuma daka mĩ shinã ikai?

⁴ Jó, miã mĩ shinanã, ibubis mĩ pepakatsis ikai mĩ yusiãwẽ mĩ nuku yuishuki.

^5-6 Haskarara Deusũ hau mia kemanũwẽ, iwanã, ẽ mikiri shinaiĩ. Hawẽ unanepa hãtxa huneawẽ mia yusĩtirumẽkaĩ, haska mia tapĩmarã, bikahairaki. Nĩkawe. Haska mia wakĩ mĩ txakabu hayawẽ taeshũ mia kupitxakayamatirubia, haska mia betxipaiaiwẽ mia kupi beshmas waikiki.

⁷ Deus kushipahaira dasibi binuatũ hawẽ shinã hunehairarã, mianã, shabakabi mĩ nĩkatiru mĩ shinaĩ?

⁸ Deusũ shinanã, nai binua keyatapahaira keskaki. Kini uke merãhaira shãkĩhaira keskariki, hawẽ shinanã.

⁹ Mai hirabi kesua keskaki. Ianẽwã kesuakea hashpahaira binua keskaki.

¹⁰ Deus hushũ tsuara atxitã bitxishũ hawẽ kushipawẽ kupiaya tsuã nematirubumahairaki.

¹¹ Tsuara parananaĩ txanitxakamisbu Deusũ unãmiski. Txakabu meaibu uĩmiski. Haska hatu uĩtã hatu kupitiruma mĩ shinaĩ?

¹² Mae txaihaira ni merã jumento hiwemis dami huni itirumaki. Habiaska keskariai huni unaĩsmapa betsai damitã barikis unanepatirumariki.

¹³ Mĩ unanepahaira hiwekatsis ikairã, menã mĩ shinã pe katutã Deus ea akĩ yuiriwe.

¹⁴ Hamapai txakabu sharabu mia inũ minabũ memisrã, hawaira henekĩ putariwe. ana hatubetã mekĩ betxipaiamarã.

^15-16 Haska puta keyutã ana hawa txakabu hayama mĩ besu shũpĩ shabakabi nia ana dakeama hiwei mĩ dateama ishanaii. Hanua haska ikis mĩ teneai dasibi hakimatã ana haska shinãma unanuma mĩ ikũkaĩshanaii, ana hawa hawẽ nuiamarã.

¹⁷ Bari mananãbi bari txashahairamis binumai mĩ benimahairakũkaĩshanaii, hawara mĩ bika tenebiai penakirani shaba hawẽruakirãmis keskai hiwekũkainirã.

¹⁸ Deusũ mia mekea mia hiweirã, ha ikũwaĩ unanuma mĩ hiwekũkaĩshanaii, unanuma ushai peirã.

¹⁹ Mĩ hatu merabewatiru mia benai mia anu bebirã bebirãbiakĩ mĩ huĩrukuĩ daka tsuã mia dateama ishãkanikiki.

²⁰ Hakia huni txakabubũ tsuãra hatu merabewatiru hamẽ benabaũkĩ hani unanuma hiwetirubu hawa betxiama ishãkanikiki, hatũ mawa besti manairã”, anikiaki.