Daniel 5 - Kaxinawá Bíblia (BR)

Shanẽ ibuhaira Belsazarĩ hatu pimakĩ hatu besimanikiaki, na hãtxarã

¹ Bari itxapa ma kaya Babilônia shanẽ ibuhaira betsa Belsazarĩ hatu pimakĩ hatu besimanũ, iwanã, 1.000 hawenabu yununika shanẽ ibubu shukua tibi anua hau benũbũ hatu yunua bukubaũkĩ hatu yuikubaũtãshinabu dasibi ma bei keyushĩshũ shanẽ ibu hatubetã pikĩ uva vinho itxapa akubaĩkĩ

^2-3 shanẽ ibuhaira ma paeã benimakĩ Jerusalém Templo anua mane ouro inũ mane prata kẽtxa itxapa hawẽ hutxi Nabucodonosorĩ hatu bemani hau bitãshũ haki vinho hatu amabaunũbũ Belsazarĩ hawẽ dayarubu yunua bushũ kẽtxa dasibi itxawatãshũ shanẽ ibuhaira inũ, hawẽ aĩbuaibu inũ, hawẽ nãtakea aĩbuaibu inũ, dasibi habetã piaibũ Jerusalém Templo anua kẽtxa benibuwẽ vinho aki

⁴ paẽshũ hatũ yushibu ouro inũ, prata inũ, bronze inũ, ferro inũ, hi inũ, nẽkati dami wanibu kẽwaĩbũ

⁵ habiatiãri hunĩ mekẽ besti tashnishũ kene petxiuri bĩ dekuabu tsaua shabakã dĩtu kene hushupa anu kenekĩ taewaya ha mekẽ besti shanẽ ibuhaira Belsazarĩ uĩ

⁶ datei besu hushuhairatã hawẽ yura hirabi saki saki ikĩ

⁷ bis bis ikĩ Babilônia anu yushĩ yukamisbu inũ, unanepabu inũ, bishiwẽ unãmisbu hatu kena beabu kene metukĩ hatu yuikĩ: —Ha kene tsuãra yuikĩ unãtã hariri hãtxa yuia mã ea tapĩmarã, shanẽ ibũ tari tashi hushinipa sawemashũ ouro mane teumatã shanẽ ibui ea katxu tsaumis anu ha dabe inũ besti shãtukũ yunui tsaumisbu anu ẽ tsaũshanaii— hatu wa

⁸ unanepabu shanẽ ibu dayashũmisbũ dasibi hikibirã hakia ha dĩtu kene hushupa anu hawara kenea unãtã hariri yuibaĩti tsuã shanẽ ibu tapĩmatirubumawẽ

⁹ taea shanẽ ibuhaira Belsazar ana datehairai hawẽ besu hushui keyukẽ hawẽ yununikabũ uĩ hawawẽ haska watima ikaibũ

¹⁰ shanẽ ibuhaira inũ habetã piaibu bibiski ikaibũ shanẽ ibũ ewã nĩkatã hikikirã yuikĩ: —Shanẽ ibuũ, habi mĩ hiweyukũkaĩshanaii, hawa beshtekeamarã! Haskaira hawẽ datei besu hushua dakayamawe.

¹¹ Hanu mĩ yunu keyumis anu huni betsa Deus meribitũ yushinẽ unãmakubaĩmis mĩ huni hayaki. Mĩ hutxi hiwea shanẽ ibuaitiã yushibubu keska hawẽ shinã hawa hunema shabakabi inũ tapinika inũ unanepakĩ ha hunĩ hatu unãshũkubainiki. Haskawẽ taeshũ nukunabu mukayabu inũ, yushĩ yukamisbu inũ, unanepabu inũ, bishiwẽ unãmisbu hatu mekei hau shanẽ ibukũkaĩshanũ mĩ hutxi shanẽ ibuhaira Nabucodonosorĩ ha huni katuniki,

¹² hawẽ kena Danielbiakẽ kena betsa wakĩ Beltessazar wanirã. Hawara namabu hakiri unãtiru inũ, hunea hãtxa hatu unãmakĩ yusĩtiru inũ, hawara itimaskabiakẽ pewatiru shinã shabakabi hawaira tapĩkĩ unãmamis yushĩ haya ikũkainiki. Daniel menã kenariwe. Ha hushũ ha dĩtu kene hushupa anu hawara kene nea haska yuitikiri mia unãmashanikiki— aka

¹³ hawẽ ewã hãtxa nĩkatã hau Daniel iweshunũbũ Belsazarĩ hatu yunua Daniel iweshunabu shanẽ ibuhaira bebũ nia Belsazarĩ yukakĩ: —Judá enabu atxitã Jerusalém anua ẽ hutxi Nabucodonosorĩ hatube mia iwenirã, mĩ habiamẽ, Danielrã?

¹⁴ Mikiri ea yuikinã, Deusũ Yushĩ kushipa mĩ haya mĩ shinã shabakabihaira inũ, hawaira tapinika inũ, mĩ unanepakiaki.

¹⁵ Eskawẽ taeshũ ẽ shanẽ ibuai anua enabu huni unanepahairabu ẽ hatu kena beshũ na kene unãkĩ betsã ea hawa yuiamahaira ikãshuki, ha hãtxa unãkĩ tapiãmarã.

¹⁶ Habiaskabiakẽ hunea hãtxa hatu unãmakĩ hawara itimaskabiakẽ mĩ pewatiru mikiri yuiaibu ẽ nĩkashuki. Ha dĩtu kene hushupaki kene nea yuikĩ unãtã hariri yuitikiri mĩ ea yuĩkĩ unãmaya shanẽ ibũ tari tashi hushinipa sawemakĩ ouro teuti sawematã dabe inũ besti shanẽ ibũ yunui tsaumis anu ebe ẽ mia tsaũkĩ shanẽ ibu washanaii— aka

¹⁷ hanushũ Danielĩ kemakĩ yuikĩ: —Shanẽ ibuũ, mĩ ea haska inãkuĩ yuiairã, huni betsa inãtã ashãwẽ, mĩ hiwe pepa anu shanẽ ibumakinã. Hakia eanã, ha dĩtu kene hushupa anu kene nea unãtã hariri yuia ẽ mia unãmaii.

¹⁸ Ẽ mia yuishunai ea nĩkawe. Hawẽ hãtxa nĩkakĩ dasibibũ hau hawẽ kena unãkubaĩshanũbũ mĩ hutxi Nabucodonosor kushipa wakĩ Deus kushipa dasibi hatu binuatũ shanẽ ibuhaira wanishũ duawakubainiki.

¹⁹ Hawẽ kushipa Deusũ ma inãniwẽ taea yurabu shukuabu tibi inũ hãtxa betsa betsapawẽ hãtxamisbu mĩ hutxi bebunua datei saki saki ipaunibuki. Tsuabura tenãkatsi ikĩ tenãkubainiki. Tsuabura hau hiweyunũbũ mĩ hutxĩ hatu henekubainiki. Betsa betsapa shanẽ ibu wakubaĩkĩ betsa betsapa hatu nuitapa wakĩ hatu babu wakubainiki.

²⁰ Hakia ibubis keĩ: “Ea besti pe shanẽ ibui ẽ kushipahairakũkainaii”, iki huĩti kushitã keaĩwẽ taeshũ hawẽ shanẽ ibũ kushipa inũ hawẽ pepa dasibi Deusũ mebiã

²¹ hau tari hiweyukũkaĩshanũ nitxiãbu dami betsai yuinaka keskai jumento inamabe hiweshũ ina awa keskakĩ basi pikubaini basnũmã hawẽ yura txa akubaina Deus kushipahaira dasibi hatu binuatũ yurabũ shanẽ ibu hatũ tsuara shanẽ ibu wakatsis ikĩ hatu betxipaikĩ katumis tapĩriama yuinaka keskai hiwekũkaĩkĩ atimas mĩ hutxĩ tapĩkĩ unaniki.

²² Shanẽ ibuhaira Belsazarĩ, mĩ hawẽ babã mĩ hutxi haskani unãbiai ibubis miari keĩ mĩ pe hiweamaki.

²³ Hakia nai anua Senhor Deuski kashekĩ hawẽ Templo anua hawẽ kẽwãti kẽtxa itxapa hau bitanũbũ mĩ hatu yunua bitãshũ ha besiaibubetã Senhor Deusũ kẽtxawẽ uva vinho akubaĩkĩ matũ dami yushĩ ouro inũ, prata inũ, bronze inũ, ferro inũ, hi inũ, nẽkati dami itxapa wanibu habũ hawa uiãbuma inũ, hawa nĩkabuma inũ, hawa unãbumahaira mĩ hatu kẽwãmashuki. Hakia betsarã, Deusũ besti mia hiwemakubaĩkĩ dasibi mĩ hiwea mia tsuma keyubia mĩ ha kẽwaĩsmaki.

^24-25 Haskawẽ taeshũ ha hunĩ hawẽ mekẽ bestiwẽ na hãtxa MENE, MENE, TEQUEL inũ PARSIM kene netanã, Deusũ yunuaki.

²⁶ Na haska hãtxa yuiarã, eska yuiaki. Mia yuishunũ nĩkawe. Ha MENE hãtxarã, mĩ shanẽ ibukũkainai shaba tibi mia tanashũ hanu mĩ mawashanai Deusũ ma mia unaĩkiki.

²⁷ Ha TEQUEL hãtxarã, Deusũ hawẽ tanatiwẽ mĩ shãkama mia tanairã, mĩ hawa pemaki.

²⁸ Ha PERES hãtxarã, hanu mĩ shanẽ ibukĩ hatu yunubaunairã, Deusũ pashkatã namakis Média nawabu inãkĩ namakis Pérsia nawabu hatu ibuwamashanikiki— aka

²⁹ habiatiãri shanẽ ibuhaira hakiri txakabu yuibia shanẽ ibũ tari tashi hushinipa Daniel sawemashũ ouro teuti sawemakĩ teumatã Belsazarĩ dasibibu hatu yuikĩ: —Dabe inũ besti shanẽ ibũ yunui tsaumis shãtukũ Daniel ma ebe tsauikiki, shanẽ ibu yununikairã— akĩ Babilônia hirabi anu hau hatu yuibaunũbũ hatu yunua

³⁰ habias meshu merã Média nawabu detenamenikabu maewã Babilônia anu hikishũ Caldéia nawa shanẽ ibuhaira Belsazar tenãtã

³¹ Babilônia anu Média nawa shanẽ ibu Dario shanẽ ibuhairai taekainikiaki, 62 ano hayarã.