Gênesis 24:12 - Kaxinawá Bíblia (BR)

hau ea unãmanũ ishũ Abraão tsumapã Deusbe hãtxakĩ ea akĩ yuikĩ: —Ẽ tsuma Abraão mekenika Senhor Deusuũ, ẽ tsuma mĩ duawamis keska wakĩ eari merabewakĩ uĩmakĩ ea tapĩmawe. Uĩwẽ. Ũpash bana kini dapi ẽ nikẽ ũpash bi txipashbu ibirã ibiranaibu unãti wamakĩ txipash betsa ẽ yukakatsi ikaii: “Mĩ shumu buteshũ ũpash ea amawe!” ẽ aka ha txipash mĩ ma katua ebe hãtxai: “Awe, ũpashrã. Mĩ camelori ẽ mia amashunaii”, akĩ ea yuiai ẽ unãkatsis ikai ha txipash mĩ ea katushunairã, Isaque aĩ hau ishanunã. Haskawẽ taeshũ ẽ tsuma Abraão mĩ ana duawai ẽ unãkatsis ikaii— akaya

Gênesis 24:12 Referencias Cruzadas

Gênesis 15:1

Haska waimakẽ ana usha nama keskawẽ Senhor Deusũ hãtxa wakĩ Abrão yuikĩ: —Abrão, dateyamawe. Ẽ mĩ mekenãtũ benimawakĩ ẽ mia duawakĩ ewapa washanaii— aka

Gênesis 24:21

Abraão tsumapã haska washuaĩ hãtxama Rebecakiri shinãkĩ: —Senhor Deusũ ea duawakĩ ha aĩbu ea inaĩmẽkaĩ?— itã

Gênesis 24:42

Haskakẽ ẽ hua ũpash bana kini anu nishũ ẽ huĩti merã shinãkĩ yuikĩ: “Ẽ tsumapã mekenika Senhor Deusuũ, mĩ Abraão merabewamiski. Mĩ eari merabewatirumẽ?” atã “Uĩwẽ. Ũpash bana kini dapi ẽ nia hanua ũpash bi txipash hua ẽ yukakatsis ikaii: ‘Mĩ shumu buteshũ ũpash ea amawe’, ẽ wa ea yuikĩ: ‘Awe. Mĩ camelori mia amashũpa?’ ikai ha ẽ tsumapã bakẽ aĩ mia Senhor Deusũ mĩ katua ẽ unãshanaii”, iki

Gênesis 24:48

hanua dãti iki beutã yuikĩ: “Ẽ tsumapã merabenã Deus kẽwãkĩ yuikĩ: ‘Enabu anu txipash aĩbu hawẽ bake Isaque ẽ ishuniyuaya ea merabewakĩ pe iwekĩ Senhor Deusũ mĩ ea merabewashuki’ ”, ẽ ikirãshuki.

Gênesis 26:24

meshu merã Senhor Deus haki nukushũ Isaque yuikĩ: —Dateyamawe. Ẽ mĩ epa Abraão mekenika Deuski. Hawara ẽ yunua Abraão txibãkĩ akubainiki. Haskawẽ taeshũ haibuwakĩ ẽ mia duawariashanaii, minabu itxapa mia pa washũkinã— atã kakẽ

Gênesis 27:20

—Haskatã mĩ hawaira txashu tsakashumẽ?— aka ana parãkĩ yuikĩ: —Mĩ haibu merabenã Senhor Deusũ txashuki ea nukuma ẽ tsakashuki— aka

Gênesis 31:42

Ẽ epa Isaque inũ ẽ hutxi Abraão hatũ mekenika Deus ẽ hayamakẽ mais hawauma mĩ ea nitxĩkeãshinaki. Hakia mĩ ea txakabuwai Deusũ uĩshũ ẽ mia pe dayashunai uĩriakubaĩshĩshũ haskawẽ taeshũ ekiri hãtxakĩ Deus ewẽ nuikĩ mia nemashinaki— aka

Gênesis 32:9

hanua bika tenei Deusbe hãtxakĩ: “Senhor Deusuũ, mĩ ẽ hutxi Abraão Deus mekenika mĩ ikũkainiki. Mĩ ẽ epa Isaque Deus mekenika mĩ iriakũkainaii. Haskawẽ taeshũ ea yuikĩ: ‘Mĩ mae anu ana kawe. Minabu anu ana kawe. Mĩ hari ka harishũ ẽ mia duawashanaii’, akĩ mĩ ea yubaimaki. Txanima mĩ ea duawaii. Nenua kairã, ẽ mestẽti bestiya ẽ kaniki, na Hene Jordão pukeirã. Hakia na eskatiã yura mani dabeya Hene Jordão ẽ ana pukei kaii. Ẽ haska kainaya ẽ betsa Esaú eki sinatai ea mekewe. Hushũ aĩbu bakeya dasibi tenaĩkiki, ika ẽ haki dateaii. Mĩ ea yuikĩ: ‘Ẽ mia duawakĩ mĩ bababu ẽ pa washanaii, mashiti tsuã tanatiruma wakinã’, akĩ mĩ ea yubayamaki. Haskawẽ taeshũ ẽ betsa Esaú anushũ mekekĩ ea itxakawamayamawe”, atã

1 Reis 18:36

Jerusalém anushũ Senhor Deus kẽwãti hiwe anushũ inabu hirabi kuaibu habiatiãri Deusũ hãtxa yuishunika Eliasĩ txi tapu dapi nishũ hui kushipawẽ yuikĩ: —Abraão inũ, Isaque inũ, Israel mekenika Senhor Deusuũ, Israelĩ enabu dasibi mekenika Deus mĩ mia inũ ẽ mĩ tsuma mĩ ea yunushinawẽ taeshũ natiã dasibi ẽ abaũshu uĩkĩ hau unãhairanũbũ ikis hatu uĩmawe!

2 Reis 2:14

ha kushipa hayawẽ Eliasĩ yabukutiwẽ hene bekushtã hamebi yuka ikĩ yuikĩ: “Eliasĩ mekenika Senhor Deusrã, hanimẽ?” ikaya hene dami hamebi tuash iki niti ikẽ Eliseu ana pukebainaya

Neemias 1:11

Mibe hãtxakĩ ẽ mia ea akai ea nĩkawe. Senhor Deusuũ, ẽ shanẽ ibu ewẽ nuimawe. Ha ẽ shanẽ ibu Artaxerxes ewẽ nuikĩ ekiri pe shinãyã haskawẽ taeshũ ẽ mia duawakatsi haskakiri ẽ mia yukaii”, anikiaki. Ea Neemiasinã, shanẽ ibuhaira Artaxerxesĩ nushuti pewakĩ hawẽ kẽtxaki hushkeshũ dau hayamẽkaĩ, iwanã, eã dukũ metã hawa dau hayamakẽ ẽ amakubainiki.

Neemias 2:4

shanẽ ibũ ea yukakĩ: —Mia haska washũkĩ ẽ mia merabewatirumẽ?— ea wa hau ea merabewanũ Deus nai anua ẽ huĩtinĩ yukatã

Salmos 37:5

Dasibi mĩ hiwea Senhor Deus mekematã ha besti mĩ ikũhairawai haki txiti ikẽ mia duawakĩ mia merabewai hushanikiki.

Êxodo 3:15

ana Moisés yuikĩ: —Eskakiri hatu yuikinã: “Matũ shenipabu Abraão inũ, Isaque inũ, Jacó hatũ habu mekekĩ duawapaunirã, Senhor Deusũ matu anu ea yunushinaki”, akĩ hatu yuitãshãwẽ. Na kena ‘Senhor Deus’ habias ikũkaĩshanikiki, ẽ kena hawa betsa maeamarã. Na ẽ kena Senhor Deus dasibitũ ea shinãtiruburã, henenakamaki— iwanã

Êxodo 3:6

ana yuikĩ: —Ẽ mĩ shenipabũ mekenika yushĩki. Abraão inũ, Isaque inũ, Jacó ea nĩkakubainiwẽ taeshũ duawakĩ ẽ hatu mekekubainiki— akaya Deus uĩ Moisĩ datekĩ hawẽ mekẽnẽ hawẽ besu atximakẽ

Provérbios 3:6

Hawara dasibi Senhor Deusũ betxipaiai shinãkĩ mĩ akubainaya Senhor Deusũ mia tapĩmakĩ hawẽ bai pepa mia yusĩkubaĩshanikiki.

Filipenses 4:6

Haska inũ, ana hamapaiwẽ dabanã iyamakãwẽ. Hakia Deusbe hãtxakĩ yukai inũ kẽwaĩnã, mĩ hamapai hakiri shabakabi yui txanikubaĩkãwẽ. Hanushũ Deusũ matu nĩkashũ ashũkẽ hawẽ duapa kẽwãkubaĩkãwẽ.