Provérbios 3 - Kaxinawá Bíblia (BR)

Unanepai hau unanuma hiwekũkainshanũ yusinikiaki, na hãtxarã

¹ Epaã, mĩ ẽ huni bakewẽ taeshũ ẽ yusĩti hãtxa tapĩtã hawa hakimayamashãwẽ. Ẽ yunuti hãtxa inũ ẽ nemati hãtxa shinãkubaini

² benima besti mĩ hiwei txaipakũkaĩshanaii.

³ Dasibibuwẽ nuikũkaini txanima hãtxa hawa heneyamakubaĩshãwẽ. Teuti sawea keska wa hatuwẽ nuikĩ txanima hãtxa sawewe, mĩ shinã uke merã netãkinã.

⁴ Mĩ haska hiwekũkainaya Deus inũ yurabu miwẽ benimakĩ mia betxipaikubaĩshãkanikiki.

⁵ Haska ibubis mĩ unanepaiwẽ akama hakia mĩ huĩti hirabiwẽ Senhor Deus ikũwãkĩ haska mia yusiaĩ besti txibãkubaĩwẽ.

⁶ Hawara dasibi Senhor Deusũ betxipaiai shinãkĩ mĩ akubainaya Senhor Deusũ mia tapĩmakĩ hawẽ bai pepa mia yusĩkubaĩshanikiki.

⁷ Ibubis keĩ: “Ẽ unanepahairaki”, iwanã, shinãyamakubaĩshãwẽ. Hakia Senhor Deuski besti datekĩ ha besti duawai txakabu tibi hene keyutã ana meyamakubaĩshãwẽ.

⁸ Senhor Deus besti mĩ duawakubainairã, dau pepa mĩ shea keska waya mĩ yura kushipakũkaĩshanikiki.

⁹ Hawara dasibi mabu mĩ haya inũ mĩ mibã ha dukũ bimi taeai tsekashũ Senhor Deus duawakĩ ha dukũ inãkĩ hawẽ kẽwãkubaĩshãwẽ.

¹⁰ Mĩ haska wakubainaya mĩ piti aruti hiwe anu mĩ piti mata wakĩ mĩ uva vinho aruti mai kẽti shumu ewapabuki mata wakĩ mia bupakemashũshanikiki.

^11-12 Hawẽ huni bakẽ kaneaya hawẽ epã tapĩmakĩ yusĩkubaĩmis keska wakĩ tsuabura Senhor Deusũ hatu betxipaiai kaneaibu hatu nemakĩ pewakubaĩmiswẽ taeshũ epaã, mĩ kaneai Senhor Deusũ mia pewakĩ bika tenemaya hawa danãyamakubaĩshãwẽ. Hawẽ kushipawẽ mia yunukubaina hawẽ hãtxa bikabiakẽ nĩkashũkubaĩshãwẽ.

^13-14 Prata mane hushupa inũ ouro mane itxawai hawẽ pepabiaibũ hakia tsuara unanepai nĩkanikakĩ ouro inũ prata binumakĩ dasibi nĩkakĩ tapĩ keyutã hawẽ benimakĩ hatu binukubaĩshãkanikiki.

¹⁵ Hawẽ dauti inũ meitxikiti inũ pau inũ teuti pepahaira karuhaira hayabiabũ tsuara unanepakĩ ha mabu hawẽrua betxipaihairakĩ bimisburã, pepabia unanepatũ hawẽ hatu binuhairatiruki.

¹⁶ Unanepawenã, aĩbu duapa keskakĩ nekerishũ mĩ hiwea txaipa mia inãyã ukerishũ mabu pepa inũ yurabũ mia duawakubainai mĩ haska hiwekũkaĩtiruki.

¹⁷ Unanepa hãtxa txibainã, benimakũkaini inũ unanepa bai tanabaini unanuma mĩ hiwekũkaĩshanaii.

¹⁸ Tsuãra unanepa hãtxa tapĩtã txibaĩ hawẽ hiwetirubuki, pe mekei benimakũkainirã.

¹⁹ Hawẽ shinã unanepawẽ Senhor Deusũ mai inũ nai dami watã mestẽwaniki.

²⁰ Hawẽ unanepahairawẽ shinãtã ianẽwã pashkatã nai kuĩ anua basnũ tashnimakĩ taewaniki.

²¹ Epaã, mĩ shinã pepa arutã haratura pepa inũ haratura txakabu unãti tapĩtã hawa hakimayamakũkaĩshãwẽ.

²² Haskakũkaĩkĩ Deusũ betxipaiai teuti hawẽrua teua keska mĩ hawẽ pe hiwekũkaĩtiruki,

²³ haki txiti itã hawa dateama kai ana kane taskamarã.

²⁴ Shinã pepai inũ unanepai hiwekũkaini hanu mĩ huĩrukuaĩtiã hawa dateama inũ hanu mĩ ushaitiã unanuma mĩ dakatiruki.

^25-26 Senhor Deuski mĩ txiti ika hatũ hawẽ pepawẽ mia inãkubaĩshanikiki, babui mĩ hawẽ dateyamanunã. Hanua hawara mesehaira huaitiã mia mekekĩ nemashuna ha mesẽ mia atxiama ishanikiki. Ha inũ, hunibu txakabu mibe hiweabu hatu kupikĩ yamawaya mĩ hawa dateama ikũkaĩshanaii.

²⁷ Tsuara hawa hayamatũ merabe mia yukai mĩ ashũtiru hatuki txikishama ashũkubaĩwẽ.

²⁸ Tsuãra merabe mia yukai ikis mĩ ashũtiru hawa meshukiri manama hawaira ashũwẽ.

²⁹ Mia betxipaikĩ mikiri pe shinãmisbu mia dapi hiweabuki hatu txakabuwanũ ishũ yubakakĩ shinãyamashãwẽ.

³⁰ Tsuara miki sinatakĩ mia txakabuwamabia eiskaũ hatube detenameti shinaĩ sinatayamakũkaĩshãwẽ.

^31-32 Hunibu txakabu Senhor Deusũ danãkĩ huni pepabu betxipaikĩ habu besti haibuwamiswẽ taeshũ ha hunibu txakabu hawara haya uĩ hawẽ kemui ha keska miari hayakatsis ikĩ shinãma hawẽ shinã keska txibãyamashãwẽ.

³³ Senhor Deusũnã, hunĩ txakabuwamisbũ enabu yupukĩ hakia pepabũ enabu hatu duawakubaĩmiski.

³⁴ Habu kashekenãmisbu Senhor Deusri hatuki kasheriamiski. Hakia hawa keĩsbuma Senhor Deusũ hatu duawakubaĩmiski.

³⁵ Unanepabu duawakĩ itxapabũ hatu kẽwãshãkanikiki. Hakia unaĩsmapabu danãkĩ tsuã hatu kẽwãma ishãkanikiki, hatukiri txakabu besti yui hãtxairã.