Psalms 83 - Die Bybel 2020-vertaling

¹ 'n Lied. 'n Psalm. Van Asaf.

² O God, moet tog nie stilbly nie; moet U nie doof hou nie en moenie stil wees nie, o God.

³ Want kyk, u vyande is rumoerig, u haters loop kop omhoog.

⁴ Teen u volk maak hulle listig planne, hulle beraadslaag teen dié wat deur U beskerm word.

⁵ Hulle het gesê: “Kom ons wis hulle uit as 'n nasie sodat die naam Israel nie meer onthou word nie.”

⁶ Ja, hulle het eendragtig saamgespan; teen U het hulle 'n verdrag gesluit:

⁷ die tente van Edom en die Ismaeliete, Moab en die nageslag van Hagar,

⁸ Gebal, Ammon en Amalek, Filistea en ook die inwoners van Tirus.

⁹ Ook Assirië het by hulle aangesluit; hulle het die nageslag van Lot die hand gereik.

¹⁰ Maak met hulle soos met Midian, soos met Sisera, soos met Jabin by die spruit Kison.

¹¹ Hulle is uitgedelg by En-Dor, hulle het mis geword vir die grond.

¹² Maak met hulle, met hulle vooraanstaandes, soos met Oreb en Seëb, met al hulle stamhoofde soos met Seba en Salmunna,

¹³ wat gesê het: “Laat ons die weivelde van God in besit neem.”

¹⁴ My God, maak hulle soos tolbosse, soos kaf voor die wind.

¹⁵ Soos vuur 'n bos verbrand, soos 'n vlam berge aan die brand steek,

¹⁶ so moet U hulle agtervolg met u stormwind, hulle met u storm in verwarring bring.

¹⁷ Bedek hulle gesigte met skande, sodat hulle kan vra na u Naam, Here.

¹⁸ Laat hulle vir altyd beskaamd staan en verskrik wees; laat hulle in die skande kom en ten gronde gaan.

¹⁹ Dan sal hulle weet dat net U, wie se Naam Here is, die Allerhoogste is oor die hele wêreld.