Psalms 57 - Die Bybel 2020-vertaling

¹ Vir die •musiekleier. Op “Moenie verwoes nie”. Van Dawid. 'n Miktaam. Toe hy voor Saul in die grot in gevlug het.

² Wees my genadig, o God, wees my genadig, want by U skuil ek; in die skadu van u vlerke sal ek skuil totdat die vernietiging verby is.

³ Ek roep na God, die Allerhoogste, na God, wat namens my vergeld.

⁴ Hy sal uit die hemel hulp stuur en my verlos. Hy verwar hom wat my teister. •Sela God sal sy troue liefde en sy waarheid stuur.

⁵ Ek is tussen leeus; ek lê tussen hulle wat mense verslind – hulle tande is spiese en pyle, hulle tonge is skerp swaarde.

⁶ Verhef U bo die hemele, o God, u heerlikheid oor die hele aarde.

⁷ 'n Net het hulle gespan vir my voete – hulle het my neerslagtig gemaak. Hulle het 'n vangkuil voor my gegrawe – hulle het self daarin geval.

⁸ My hart is standvastig, o God, my hart is standvastig. Ek wil sing, ek wil lofsing.

⁹ Word wakker, my gemoed! Word wakker, harp en lier! Ek wil die dagbreek wakker maak.

¹⁰ Ek wil U dank onder die volke, my Heer, ek wil U besing onder die nasies;

¹¹ want groot, tot aan die hemel, reik u troue liefde; tot by die wolke is u waarheid.

¹² Verhef U bo die hemele, o God, u heerlikheid oor die hele aarde.