Psalms 51 - Die Bybel 2020-vertaling

¹ Vir die •musiekleier. 'n Psalm. Van Dawid.

² Toe die profeet Natan na hom gegaan het nadat hy met Batseba omgang gehad het.

³ Wees my genadig, o God, volgens u troue liefde; wis my oortredings uit volgens u groot ontferming.

⁴ Was my heeltemal skoon van my sondeskuld en reinig my van my sonde

⁵ want ek is deeglik bewus van my oortredings en my sonde is voortdurend voor my.

⁶ Teen U, teen U alleen, het ek gesondig en gedoen wat verkeerd is in u oë, sodat U gelyk sal hê as U uitspraak lewer, volkome reg wanneer U oordeel.

⁷ Kyk, in sondeskuld is ek gebore, sondig toe my moeder met my swanger geraak het.

⁸ Kyk, getrouheid verwag u reeds in die moederskoot, in die verborgenheid leer U my wysheid.

⁹ Neem my sonde weg met marjolein sodat ek rein kan wees, was my, dan sal ek witter as sneeu wees.

¹⁰ Laat my weer uitroepe van vreugde en blydskap hoor; laat die gebeente wat U verbrysel het, juig.

¹¹ Sluit u oë vir my sonde, en al my sondeskuld, wis dit uit!

¹² Skep 'n rein hart vir my, o God, vernuwe 'n bestendige gees in my binneste.

¹³ Moet my tog nie wegdryf uit u teenwoordigheid nie; en moet u •heilige Gees nie van my wegneem nie.

¹⁴ Laat my weer die vreugde oor u verlossing ervaar, laat 'n gewillige gees my ondersteun.

¹⁵ Ek wil oortreders u paaie leer, dat sondaars na U kan terugkeer.

¹⁶ Red my van bloedskuld, o God, God wat my verlos, laat my tong juig oor u geregtigheid.

¹⁷ My Heer, maak my lippe oop en my mond sal u lof verkondig.

¹⁸ U vind immers geen vreugde in slagoffers nie, anders sou ek dit gee; •brandoffers aanvaar U nie.

¹⁹ Offers aan God is 'n gebroke gees, 'n gebroke en verpletterde hart sal U, o God, nie minag nie.

²⁰ Doen volgens u wil goed aan Sion, herbou die mure van Jerusalem.

²¹ Dan sal U vreugde vind in offers van geregtigheid – brandoffers en volledige offers – Dan sal daar op u altaar jong bulle geoffer word.