Masalimo 63 - Buku Lopatulika

Mtima woliralira kuyanjana ndi Mulungu

Salimo la Davide; muja anakhala m'chipululu cha Yuda.

¹ Inu Mulungu, ndinu Mulungu wanga; ndidzakufunani m'matanda kucha. Moyo wanga ukumva ludzu la kwa Inu, thupi langa lilirira Inu, m'dziko louma ndi lotopetsa, lopanda madzi.

² Kuti ndione mphamvu yanu ndi ulemerero wanu, monga ndinakuonani m'malo oyera.

³ Pakuti chifundo chanu chiposa moyo makomedwe ake; milomo yanga idzakulemekezani.

⁴ Potero ndidzakuyamikani m'moyo mwanga; ndidzakweza manja anga m'dzina lanu.

⁵ Mudzakhutitsa moyo wanga ngati ndi mafuta ndi zonona; ndipo pakamwa panga ndidzakulemekezani ndi milomo yakufuula mokondwera.

⁶ Pokumbukira Inu pa kama wanga, ndi kulingalira za Inu maulonda a usiku.

⁷ Pakuti munakhala mthandizi wanga; ndipo ndidzafuula mokondwera mu mthunzi wa mapiko anu.

⁸ Moyo wanga uumirira Inu. Dzanja lamanja lanu lindigwiriziza.

⁹ Koma iwo amene afuna moyo wanga kuti auononge, adzalowa m'munsi mwake mwa dziko.

¹⁰ Adzawapereka kumphamvu ya lupanga; iwo adzakhala gawo la ankhandwe.

¹¹ Koma mfumu idzakondwera mwa Mulungu; yense wakulumbirira iye adzatamandira; pakuti pakamwa pa iwo onena bodza padzatsekedwa.