Masalimo 114 - Buku Lopatulika

Alemekeze Mulungu pa chipulumutso chija cha mu Ejipito

¹ M'mene Israele anatuluka ku Ejipito, nyumba ya Yakobo kwa anthu a chinenedwe chachilendo;

² Yuda anakhala malo ake oyera, Israele ufumu wake.

³ Nyanjayo inaona, nithawa; Yordani anabwerera m'mbuyo.

⁴ Mapiri anatumphatumpha ngati nkhosa zamphongo, timapiri ngati anaankhosa.

⁵ Unathawanji nawe, nyanja iwe? Unabwereranji m'mbuyo, Yordani iwe?

⁶ Munatumphatumphiranji ngati nkhosa zamphongo, mapiri inu? Ngati anaankhosa, zitunda inu?

⁷ Unjenjemere, dziko lapansi iwe, pamaso pa Ambuye, pamaso pa Mulungu wa Yakobo;

⁸ amene anasanduliza thanthwe likhale thawale lamadzi, nsangalabwi ikhale kasupe wamadzi.