Masalimo 142 - Buku Lopatulika Buku Lopatulika
Masalimo 142

¹ Ndifuula nalo liu langa kwa Yehova; ndi mau anga ndipemba kwa Yehova.

² Nditsanulira kudandaula kwanga pamaso pake; ndionetsa msauko wanga pamaso pake.

³ Pamene mzimu wanga unakomoka m'kati mwanga, munadziwa njira yanga. M'njira ndiyendamo ananditchera msampha.

⁴ Penyani kudzanja lamanja ndipo muone; palibe wondidziwa; pothawirapo pandisowa; palibe mmodzi wosamalira moyo wanga.

⁵ Ndinafuulira kwa inu, Yehova; ndinati, Inu ndinu pothawirapo panga, gawo langa m'dziko la amoyo.

⁶ Tamverani kufuula kwanga; popeza ndisauka kwambiri; ndilanditseni kwa iwo akundilondola; popeza andipambana.

⁷ Tulutsani moyo wanga m'ndende, kuti ndiyamike dzina lanu; olungama adzandizinga; pakuti mudzandichitira zokoma.