Nomery 15 - Baiboly Katolika

6. DIDY MOMBA NY SORONA FAHEFAN’NY MPISORONA SY NY LEVITA Fanatitra ampiarahina amin’ny sorona

¹ Niteny tamin’i Môizy i Iaveh nanao hoe:

² Mitenena amin’ny zanak’i Israely, ka lazao azy hoe: Rehefa tonga any amin’ny tany honenanareo sy omeko anareo ianareo,

³ ka hanatitra sorona atao amin’ny afo ho an’i Iaveh, na sorona dorana, na sorona fanalam-boady, na fanatitra an-tsitrapo, na amin’ny fetinareo, mba hisy hanitra mahafinaritra ho an’i Iaveh avy amin’ny omby na ondrinareo;

⁴ izay hanao ny fanatitra ho an’i Iaveh, dia hanolotra lafarina tsara indrindra ampahafolony, voadity tamin’ny diloilo ampahefatry ny hina, hatao fanatitra,

⁵ hanao fanatitra hararaka, divay hampahefatry ny hina, miaraka amin’ny sorona dorana, na ny sorom-pihavanana, isan-janak’ondry.

⁶ Raha ondralahy no atao sorona dia lafarina tsara indrindra roa ampahafolony, voadity tamin’ny diloilo ampahatelon’ny hina no hatolotrao ho fanatitra;

⁷ ary divay ampahatelon’ny hina no hatolotrao ho fanatitra araraka, mba ho fanolorana misy hanitra mahafinaritra ho an’i Iaveh.

⁸ Raha ombalahy no hatolotrao ho sorona dorana, na ho sorona fanalam-boady na ho sorom-pihavanana, amin’i Iaveh,

⁹ dia lafarina tsara indrindra, telo ampahafolony, voadity tamin’ny diloilo antsasaky ny hina no hatolotrao miaraka amin’ny ombalahy ho fanatitra,

¹⁰ ary divay antsasaky ny hina, no hatolotrao ho fanatitra araraka: Sorona atao amin’ny afo, ho hanitra mahafinaritra ho an’i Iaveh izany.

¹¹ Izany no hatao amin’ny isan’omby iray, sy isan’ondralahy iray, ary isan-janak’ondry na zanak’osy iray.

¹² Araka ny isan’ny zavatra hatolotrareo hatao sorona, dia hanaovanareo toy izany tsirairay avy, araka ny isany.

¹³ Hataon’ny tompon-tany rehetra toy izany ireo zavatra ireo raha manatitra sorona atao amin’ny afo izy, ho fanatitra mahafinaritra ho an’i Iaveh.

¹⁴ Raha misy vahiny mitoetra eo aminareo, olona miara-monina aminareo, amin’ny taranaka mifandimby, na iza na iza, ka manatitra sorona atao amin’ny afo ho hanitra mahafinaritra ho an’i Iaveh, dia toy ny hataonareo ihany no hataony.

¹⁵ Lalàna iray ihany no ho an’ny fiangonana, na ho anareo na ho an’ny vahiny monina eo aminareo; lalàna mandrakizay ho an’ny taranakareo izany: tsy hisy hafa na ny aminareo na ny amin’ny vahiny, eo anatrehan’i Iaveh.

¹⁶ Lalàna iray sy fitsipika iray no ho anareo sy ho an’ny vahiny mitoetra eo aminareo.

Santatra mofo

¹⁷ Niteny tamin’i Môizy i Iaveh, nanao hoe:

¹⁸ Mitenena amin’ny zanak’i Israely ka lazao aminy hoe: Rehefa tonga any amin’ny tany ampidirako anareo ianareo,

¹⁹ ka hihinana mofo avy amin’izany tany izany, dia avaho aloha izay fanatitra ho an’i Iaveh.

²⁰ Ho santatry ny kobanareo, dia havahanareo aloha ny mofomamy iray hatao fanatitra; havahanareo izany toy ny fanavahana ny fanatitra avy eo am-pamoloana.

²¹ Ho santatry ny kobanareo, dia hanavaka izay ho fanatitra ho an’i Iaveh aloha ianareo, dia ianareo sy ny taranakareo.

Fanonerana ny ota tsy nahy

²² Raha manota tsy nahy ianareo, fa tsy mitandrina ireo didy rehetra nolazain’i Iaveh tamin’i Môizy ireo,

²³ dia izay rehetra nandidian’i Iaveh anareo tamin’ny alalan’i Môizy, hatramin’ny andro namoahan’i Iaveh ny didy ka hatramin’ny taranaka mandimby anareo,

²⁴ raha misy nanota tsy nahy fa tsy fantatry ny fiangonana izany, dia hanatitra vantotr’ombalahy iray ny fiangonana rehetra, ho sorona dorana, ho fanatitra mahafinaritra ho an’i Iaveh, mbamin’ny fanatitra sy ny fanatitra araraka momba azy, araka ny fomba voadidy, ary osilahy iray ho sorona noho ny ota.

²⁵ Dia hanao ny fanonerana ho an’ny fiangonan’ny zanak’i Israely rehetra ny mpisorona, ka havela ny helony, satria ota vita tsy nahy izany sady efa nanolotra ny fanatiny izy, dia ny sorona atao amin’ny afo ho an’i Iaveh sy ny sorona noho ny ota, eo anatrehan’i Iaveh, noho ny ota nataony tsy nahy.

²⁶ Havela heloka ny fiangonan’ny zanak’i Israely rehetra, mbamin’ny vahiny mitoetra eo afovoany, satria tsy nahy no nanotan’ny vahoaka rehetra.

²⁷ Raha olona iray kosa no nanota tsy nahy, dia osy vavy iray, efa iray taona, no hateriny ho sorona noho ny ota.

²⁸ Ny mpisorona hanao ny fanonerana, eo anatrehan’i Iaveh, ho an’ilay olona izay diso fa nanota tsy nahy, ka rehefa vita ny fanonerana natao ho azy, dia havela ny helony.

²⁹ Amin’ny tompon-tany isan’ny zanak’i Israely sy amin’ny vahiny mitoetra eo aminareo dia lalàna iray ihany no ho anareo, raha misy manota tsy nahy.

³⁰ Fa na tompon-tany na vahiny, ka sahy manao fanahy iniana kosa, dia olona maniratsira an’i Iaveh izany, ka hoesorina eo amin’ny fireneny.

³¹ Satria nanamavo ny tenin’i Iaveh izy sy nandika ny didiny, ka dia hoesorina izany olona izany, hivesatra ny fahotany.

Fandikana ny sabata

³² Raha mbola tany an’efitra ny zanak’i Israely, dia nahita lehilahy anankiray nanangona kitay hazo tamin’ny andro sabata.

³³ Nentin’ireo nahita azy nanangona kitay hazo teo amin’i Môizy sy i Aarôna ary ny fiangonana rehetra izy.

³⁴ Dia nambenana ralehilahy, fa mbola tsy tapaka izay hanaovana azy.

³⁵ Hoy i Iaveh tamin’i Môizy: Hovonoiko ho faty izany lehilahy izany, ka ny fiangonana rehetra hitora-bato azy any ivelan’ny toby.

³⁶ Dia navoakan’ny fiangonana rehetra tany ivelan’ny toby izy; ka notoraham-bato, dia maty, araka ny nandidian’i Iaveh an’i Môizy.

Ny sahondran’akanjo

³⁷ Hoy i Iaveh tamin’i Môizy:

³⁸ «Mitenena amin’ny zanak’i Israely ary ilazao izy mba hanisy sahondra amin’ny zoron-dambany hatramin’ny taranaka mifandimby; ary hanisy kofehy jaky volomparasy amin’ny sahondra isan-jorony avy.

³⁹ Ho sahondra ho anareo izany, ary ny fijerena izany dia hahatsiarovanareo ny didin’i Iaveh rehetra mba hanarahanareo azy rehetra, fa tsy hanarahanareo ny fonareo sy ny masonareo, izay mitarika anareo ho amin’ny fivadihana.

⁴⁰ Hahatsiaro ny didiko rehetra ianareo amin’izany, ary hanaraka azy, ka ho masina ho an’ny Andriamanitrareo ianareo. Izaho no Iaveh Andriamanitrareo izay namoaka anareo tany amin’ny tany Ejipta mba ho Andriamanitrareo. Izaho no Iaveh Andriamanitrareo.»