Lioka 14 - Baiboly Katolika

Ilay lehilahy manirano nositranina sabata

¹ Indray sabata, raha niditra, hisakafo tao an-tranon’ny loholon’ny Farisianina anankiray i Jesoa, dia nitsikilo Azy izy ireo.

² Ary indro nisy lehilahy anankiray manirano teo anatrehany.

³ Dia niteny i Jesoa ka nanao tamin’ny mpampianatra ny Lalàna sy ny Farisianina hoe: «Azo atao ve ny manasitrana amin’ny andro sabata?»

⁴ Fa tsy niteny tsy nivolana izy ireo. Dia noraisin’i Jesoa tamin’ny tanany kosa ralehilahy ka nositraniny ary nalefany nandeha.

⁵ Izay Izy vao nilaza tamin’ireo hoe: «Raha latsaka amin’ny fantsakana lalina ny ampondra na ny ombinareo, iza aminareo no tsy hanafaka azy faingana na dia sabata aza ny andro?»

⁶ Fa tsy nanan-kavaly an’izany izy ireo.

Ny mifidifidy toerana

⁷ Raha efa izany, nony hitan’i Jesoa ny hamaimaizan’ny olona nasaina naka ny fitoerana voalohany, dia nanao ity fanoharana ity tamin’izy ireo Izy:

⁸ «Raha asaina amin’ny fampakaram-bady ianao, aza mipetraka amin’ny fitoerana voalohany, fandrao misy olona nasaina ambony toetra noho ianao,

⁹ ka ho avy izay nanasa anao sy izy, hilaza aminao hoe: ‹Omeo an’ity ny fitoeranao›, ary amin’izay ho menatra ianao hifindra arỳ amin’ny fitoerana farany.

¹⁰ Fa raha asaina ianao, dia any amin’ny fitoerana farany mipetraka, ka raha tonga izay nanasa anao, dia hilaza aminao hoe: ‹Mandrosoa, ry sakaiza, etsy alohaloha kokoa, amin’izay dia hahazo voninahitra eo imason’izay rehetra hiara-mihinana aminao ianao.›

¹¹ Fa izay rehetra manandra-tena no haetry, ary izay manetry tena no hasandratra.»

Fifidianana izay olona hasaina

¹² Ary hoy kosa Izy tamin’ilay nanasa Azy: «Raha manasa olona hisakafo antoandro na hariva ianao, aza dia ny sakaizanao na ny rahalahinao na ny havanao na ny mpanan-karena mifanakaiky aminao no asaina, fandrao asain’ireo koa ianao ka ho voavaliny izay nataonao taminy.

¹³ Fa raha manao fanasana ianao, ny mahantra, ny kilemaina, ny mandringa, ny jamba, no asao:

¹⁴ dia ho sambatra ianao, satria tsy mba manan-kavaly anao ireo; fa rehefa mby amin’ny fitsanganan’ny olo-marina vao hovaliana ianao.»

Ireo nasaina tsy nety tonga

¹⁵ Nony nandre izany ny anankiray tamin’izay niara-nihinana teo, dia nanao tamin’i Jesoa hoe: «Sambatra lahy izay hanana anjara amin’ny fihinanam-be any amin’ny fanjakan’Andriamanitra.»

¹⁶ Fa hoy Izy taminy: «Nisy lehilahy anankiray nanao fanasana lehibe ka nanasa olona maro.

¹⁷ Nony tonga ny fotoana fisakafoana, dia naniraka ankizilahy iray izy hanainga ny nasaina hoe: ‹Ndeha ianareo, fa efa vonona ny zavatra rehetra.›

¹⁸ Fa samy niala tsiny izy rehetra. Hoy ny voalohany taminy: ‹Efa nividy saha aho ka tsy maintsy mandeha hizaha azy; koa mihanta aminao aho, aoka re mba tsy ho tsiniko.›

¹⁹ Hoy kosa ny faharoa: ‹Efa nividy omby folo aho ka handeha hitsapa azy; koa mihanta aminao aho, aoka re mba tsy ho tsiniko.›

²⁰ Ary hoy koa ny anankiray: ‹Vao nampaka-bady aho ka tsy afa-mankany.›

²¹ Dia nody ilay ankizilahy ka nilaza izany tamin’ny tompony. Tezitra tamin’izay ny tompony ka nanao tamin’ny ankizy lahiny hoe: ‹Mandehana faingana mankany amin’ny kianja sy ny lalam-ben’ny tanàna, ka ento mankaty ny mahantra sy ny kilemaina sy ny jamba ary ny mandringa.›

²² Ary hoy ilay ankizilahy: ‹Tompoko, vita ny nasainao natao, nefa mbola misy fitoerana ihany.›

²³ Dia hoy ny tompo tamin’ilay ankizy lahy: ‹Mandehana mankeny amin’ny lalam-be sy ny fefim-boly, ka tereo ny olona hiditra mba ho feno ny tranoko.

²⁴ Fa lazaiko aminareo fa tsy hisy hanandrana ny sakafoko amin’ireo olona nasaina ireo na dia iray aza.› »

Mandao izay rehetra tsy foy

²⁵ Ary nisy vahoaka betsaka niaraka tamin’i Jesoa, ka nitodika Izy nanao tamin’ireo hoe:

²⁶ «Raha misy manatona Ahy ka tsy mankahala ny rainy sy ny reniny, ary ny vadiny sy ny zanany, mbamin’ny rahalahiny sy ny anabaviny ary na dia ny ainy aza, dia tsy mety ho mpianatro.

²⁷ Ary izay tsy mitondra ny Hazofijaliany sy tsy manaraka Ahy dia tsy mety ho mpianatro.»

Mamoy ny fananana rehetra

²⁸ «Ka iza tokoa moa aminareo no te-hanao tilikambo ka tsy hipetraka aloha hitety izay holaniany, na hanana ny ampy hamitana azy izy, na tsia;

²⁹ sao vita ny fototra vao tsy afa-manefa azy izy ka holatsain’izay rehetra mahita hoe:

³⁰ ‹Mba nanomboka nanao trano ralehilahy io, nefa tsy nahavita tsinona!›

³¹ Sa iza no mpanjaka handeha hiady amin’ny mpanjaka hafa, ka tsy hipetraka aloha hihevitra na ho azony atao amin’ny miaramila iray alina ny hikatroka amin’ny fahavalo roa alina avy hamely azy na tsia?

³² Fa raha tsy hahomby izy, dieny mbola lavitra ilay mpanjaka anankiray dia handefa iraka hanao raharaham-pihavanana aminy izy.

³³ Toy izany koa, na iza na iza aminareo tsy mahafoy izay rehetra ananany dia tsy mety ho mpianatro.»

Tsy tokony hatsatso

³⁴ «Tsara ny fanasina; nefa raha ny fanasina no tonga matsatso, hatao ahoana indray no fanasina azy?

³⁵ Tsy hahasoa tany, tsy hahasoa zezika izy, ka dia hariana any alatrano. Aoka hihaino izay manan-tsofina hihainoana.»