Josoa 13 - Baiboly Katolika

2. FITSINJARANA NY TANY TAMIN’NY FOKO TSIRAIRAY Ny tany mbola tokony halaina

¹ Efa antitra sy efa nandroso fahanterana i Jôsoe: ka hoy i Iaveh taminy: «Ianao ity efa antitra, efa mandroso fahanterana nefa ny tany lehibe dia lehibe no mbola sisa halaina.»

² Fa izao no tany sisa: ny faritanin’ny Filistinina rehetra sy ny an’ny Gesorianina rehetra,

³ hatramin’i Sikôra, izay eo atsinanan’i Ejipta ka hatrany amin’ny faritanin’i Akarôna eo avaratra, izay tokony hatao ho tany Kananeanina; ny andrian’ny Filistinina dimy, ny an’i Gazà, ny an’i Azota, ny an’i Askalôna, ny an’i Geta, ny an’i Akarôna;

⁴ any atsimo, ny Heveanina, ny tanin’ny Kananeanina rehetra, sy i Maara izay an’ny Sidonianina, hatrany Afeka, hatrany amin’ny faritanin’ny Amôreana,

⁵ ny tanin’ny Gebalita sy i Libàna rehetra, any atsinanana, hatrany Baala-Gada, eo ambodin’ny tendrombohitra Hermôna, ka hatrany am-bavan’i Hamata;

⁶ ny mponina rehetra amin’ny tendrombohitra hatrany Libàna ka hatrany amin’ny ranon’i Maserefôta dia ny Sidonianina rehetra: horoahiko eo anoloan’ny zanak’i Israely ireo. Nefa zarao amin’ny filokana ireo tany ireo ho lovan’i Israely, araka ny efa nandidiako izany.

⁷ Ary ankehitriny zarao izany tany izany amin’ny foko sivy, sy ny antsasaky ny fokon’i Manase, mba ho lovany.

1. FILAZALAZANA NY TOETRAN’IREO FOKO TANY ATSINANAN’I JORDANY Ambangovangon’ny fitambarany

⁸ Fa ny antsasany efa niara-nahazo ny lova tamin’ny Robenita sy ny Gadita, izay nomen’i Môizy azy tany an-dafin’i Jordany any atsinanana, araka ny nomen’i Môizy mpanompon’i Iaveh azy;

⁹ hatrany Arôera eo amoron’ny ranon-driaka Arnôna, sy ny tanàna eo afovoan’ny lohasaha, ny tany lemaka Medabà rehetra hatrany Dibôna,

¹⁰ ny tanàna rehetra an’i Sehôna mpanjakan’ny Amôreana, izay nanjaka tao Hesebona, hatrany amin’ny faritanin’ny taranak’i Amôna,

¹¹ Galaada, ny faritanin’ny Gesorianina sy ny Makatianina, ny tendrombohitra Hermôna rehetra ary i Basàna rehetra hatrany Sakelà;

¹² ny fanjakana rehetra tany Basàna an’i Oga, izay nanjaka tany Astarôta sy tany Edraia; izy io no hany sisa tamin’ny Refaima: resin’i Môizy ireo mpanjaka ireo ka noroahiny.

¹³ Ny Gesorianina sy ny Makatianina anefa tsy mba noroahin’ny zanak’i Israely ka samy mbola mitoetra eo amin’ny zanak’i Israely mandraka androany i Gesora sy i Makata.

¹⁴ Ny fokon’i Levì tokana no tsy mba nomen’i Môizy lova, fa ny sorona atao amin’ny afo ho an’i Iaveh Andriamanitr’i Israely no lovany araka ny voalazany taminy.

Ny fokon’i Robena

¹⁵ Nomen’i Môizy lova ny fokon’ny tarana-dRobena, araka ny fianakaviany avy,

¹⁶ ka izao no faritaniny, hatrany Arôera, eo amoron’ny ranon-driaka Arnôna, sy ny tanàna eo afovoan’ny lohasaha, ny tany lemaka rehetra akaikin’i Medabà,

¹⁷ i Hesebona sy ny tanànany rehetra amin’ny tany lemaka, Dibôna, Bamôta-Baala, Bety-Baala-Maona,

¹⁸ Jasà, Kedimôta, Mefaata,

¹⁹ Kariataima, Sabamà, Sarat-Asara amin’ny tendrombohitra ao an-dohasaha,

²⁰ Bety-Fôgôra, ny kisolosolon’i Fasgà, Bety-Jesimôta,

²¹ ny tanàna rehetra amin’ny tany lemaka sy ny fanjakana rehetra an’i Sehôna mpanjakan’ny Amôreana, izay nanjaka tao Hesebona, fa resin’i Môizy izy sy ireo andrian’i Madiàna, dia i Evì, i Rekema, i Sora, i Hora, ary i Rebe, mpandoa hetra amin’i Sehôna, monina amin’ny tany.

²² Anisan’ireo novonoin’ny zanak’i Israely tamin’ny sabatra koa i Balaama, mpanao hitsakandro, zanak’i Beôra.

²³ Koa tonga hatrany Jordany ka hatramin’ny faritaniny ny faritanin’ny tarana-dRobena. Izany no lovan’ny tarana-dRobena sy ny fianakaviany dia ny tanàna aman-jana-bohiny.

Ny fokon’i Gada

²⁴ Nomen’i Môizy anjara ny fokon’i Gada, ny taranak’i Gada, araka ny fianakaviany avy;

²⁵ ka izao no faritaniny: Jasera, ny tanànan’i Galaada rehetra, ny antsasaky ny tanin’ny taranak’i Amôna, hatrany Arôera tandrifin’i Rabà,

²⁶ hatrany Hesebona ka hatrany Rabôta-Masfe sy Betônima, ary hatrany Manaima ka hatrany amin’ny faritr’i Dabira,

²⁷ ary eo amin’ny lohasaha, Bety-Harama, Bety-Nemrà, Sokôta sy Safôna, sisa tamin’ny fanjakan’i Sehôna mpanjakan’i Hesebona; ary Jordany sy ny tany momba azy, hatramin’ny tendron’ny ranomasina Kenerata an-dafin’i Jordany any atsinanana.

²⁸ Izany no lovan’ny taranak’i Gada, araka ny fianakaviany, dia ny tanàna aman-jana-bohiny.

Ny antsasa-pokon’i Manase

²⁹ Nomen’i Môizy anjara ny antsasaky ny fokon’i Manase, ny taranak’i Manase, araka ny fianakaviany,

³⁰ ka izao no faritaniny, hatrany Manaima: Basàna rehetra, ny fanjakana rehetra an’i Jaira any Basàna, dia tanàna enimpolo.

³¹ Ny antsasak’i Galaada sy Astarôta ary Adraia, tanàna amin’ny fanjakan’i Oga, any Basàna, dia nomena ny taranak’i Makira zanak’i Manase, dia ny antsasaky ny taranak’i Makira, araka ny fianakaviany.

³² Izany no lova nozarain’i Môizy fony izy tany amin’ny tany lemak’i Moaba, any an-dafin’i Jordany tandrifin’i Jerikô any atsinanana.

³³ Tsy mba nomen’i Môizy lova ny fokon’i Levì, fa i Iaveh Andriamanitr’i Israely no lovany, araka ny voalazany taminy.