Genesisy 49 - Baiboly Katolika

Tso-dranon’i Jakôba

¹ Ary i Jakôba namory ny zanany lahy, ka nanao taminy hoe: «Mivoria ianareo, fa hambarako aminareo izay ho tonga aminareo any an-parany any:

² Mivoria, ry zanaka lahin’i Jakôba, ka mihainoa: Mihainoa an’i Israely rainareo.

³ I Robena ô, ianao lahimatoako. Heriko sy voalohan-teraky ny tanjako, ka manan-tombom-boninahitra, manan-tombom-pahefana,

⁴ nandroadroatra toy ny rano ianao, ka tsy hanana ny fiamboniana! Fa niakatra tamin’ny fandrian-drainao ianao, Ka nandoto ny fandriako tamin’ny niakaranao tao.

⁵ I Simeôna sy i Levy dia mpirahalahy, Fiadiana enti-manao an-kery ny sabany.

⁶ Aza miditra amin’ny fivoriany fakan-kevitra ny fanahiko, Fa nanao vonoana olona tamin’ny fahatezerana izy, ary nahatraingo ombalahy tamin’ny fisafoahany.

⁷ Ho voaozona anie ny fahatezerany, fa nasiaka izany; ary koa ny fahavinirany, fa loza izany. Hizarazara azy amin’i Jakôba aho, ary hampihahaka azy amin’i Israely.

⁸ Ry Jodà, ianao hoderain’ny rahalahinao; ny tananao ho eo amin’ny vozon’ny fahavalonao; ny zanaky ny rainao hiankohoka eo anatrehanao.

⁹ Liona tanora i Jodà: Niakatra avy nandripaka ianao, anaka; Nanongalika izy, dia nanao fandrin-diona, Fandrin-diom-bavy, zovy no hanaitra azy?

¹⁰ Tsy hiala amin’i Jodà ny tehim-panjakana, tsy hiala eo anelanelan’ny tongony ny tehina fanapahana, mandra-piavin’i Silô: Izy no hotoavin’ny firenena.

¹¹ Mamatotra ny zanak’ampondrany amin’ny voaloboka izy ary ny zanak’ampondravaviny amin’ny tahom-boaloboka. Sasàny amin’ny divay ny fitafiany, ary amin’ny ran’ny voaloboka ny kapaotiny.

¹² Mena ny masony azon’ny divay, Ary fotsy ny nifiny azon’ny ronono.

¹³ I Zabolôna monina amoron-dranomasina, Dia eo amoron’ny fitodian-tsambo, Mifanolotra amin’i Sidona ny sisin-taniny.

¹⁴ I Isakara dia ampondra tomady, Mandry eo anatin’ny valany;

¹⁵ Hitany fa tsara ny fialan-tsasatra, sady mahafinaritra ny tany, Dia nahilany hitondra entana ny sorony, ka tonga mpanompo mandoa hetra izy.

¹⁶ I Dana dia mitsara ny olony, tahaka ny hafa rehetra amin’ny fokon’i Israely.

¹⁷ Bibilava eo an-dalana i Dana, menarana eo an-tsakeli-dalana izy; kaikeriny ny kitrokelin-tsoavaly, Mba hitatàvoka mitsilany ny mpitaingina azy,

¹⁸ Ny famonjena no antenaiko, ry Iaveh!

¹⁹ I Gada dia poritin’andian’olona mitam-piadiana; Nefa mba poritiny amin’ny ombalahin-tongony koa indray ireny.

²⁰ I Asera no iavian’ny hanina matsiro, izy no mamonona ny hanim-py ho an’ny mpanjaka.

²¹ I Neftalì dia serfa vavy mikarenjy; mamoaka teny mahafinaritra izy.

²² I Josefa no solofon-kazo mahavokatra, solofon-kazo mahavokatra amoron-doharano izy; Misandratra tafahoatra ny tamboho ny rantsany.

²³ Mihaika azy ny mpandefa zana-tsipîka, Mandefa zana-tsipîka aminy sy mamely azy,

²⁴ Mateza hery anefa ny tsipîkany. Tonga mailaka ny sandry aman-tanany, avy amin’ny tanan’ilay maherin’i Jakôba, ilay Mpiandry sy Vatolampin’i Israely.

²⁵ Avy any amin’ny Andriamanitry ny rainao - hitahy anao anie Izy! Sy avy any amin’ilay mahefa ny zavatra rehetra - hanisy soa anao anie Izy! no hahazoanao ny tso-drano avy amin’ny lanitra ambony, ny tso-drano avy amin’ny hantsana lalina ambany ny tso-drano avy amin’ny nono aman-kibon-dreny,

²⁶ ny tso-dranon-drainao mihoatra Ny tso-dranon’ny tendrombohitra fahagola, sy ny hatsaran-tarehin’ny havoana mandrakizay. Ho eo an-dohan’i Josefa anie izany, dia ho eo an-kandrin’ilay andrian’ny rahalahiny!

²⁷ I Benjamina dia amboadia mamiravira; maraina izy homan-dremby, hariva izy mizara babo.»

²⁸ Ireo rehetra ireo no niavian’ny foko roa ambin’ny folon’i Israely; toy izany no nolazain-drainy taminy sy nitsofany rano azy. Notsofiny rano samy araka ny tso-dranony manokana avy izy.

Ny niafaran’ny fiainan’i Jakôba sy ny nahafatesany

²⁹ Raha efa izany, izao no hafatra napetrany tamin’izy ireo: «Efa hakambana any amin’ny razako aho izao, ka aleveno any amin’ny razako, anatin’ny zohy izay ao amin’ny sahan’i Efrôna Heteanina,

³⁰ anatin’ny zohy amin’ny saha Makpelà, tandrifin’i Mambre, any amin’ny tany Kanaana: dia izay novidin’i Abrahama mbamin’ny saha tamin’i Efrôna, Hetenianina, hananany fasana ho azy.

³¹ Tao no nandevenana an’i Abrahama sy i Sarà vadiny. Tao no nandevenana an’i Isaaka sy i Rebekà vadiny. Ary tao no nandevenako an’i Lià.

³² Tamin’ny taranak’i Heta, no nividianana ny saha mbamin’ny zohy ao aminy.»

³³ Nony avy nametraka ny didiny tamin’ireo zanany lahy i Jakôba, navonkiny teo am-parafara ny tongony dia niala aina izy, ka voaangona any amin’ny razany.