Amosa 5 - Baiboly Katolika

Fitomaniana an’i Israely

¹ Henoinareo izao teny izao, izay tononiko ny amin’ny momba anareo, - hira fitomaniana, - ry taranak’i Israely:

² Efa lavo, efa tsy hahatsangana intsony, ilay virjinin’i Israely! Mitsingàdina amin’ny tany izy, ary tsy hisy hanarina azy.

³ Fa izao no lazain’i Iaveh: Ny tanàna namoaka arivo lahy hiantafika, dia hitana zato lahy; ary izay namoaka zato lahy hiantafika, dia hitana folo lahy ho an’ny taranak’i Israely.

Raha tsy mibebaka tsy voavonjy

⁴ Fa izao lazain’i Iaveh, amin’ny taranak’i Israely: Tadiavo Aho, dia velomy ianareo.

⁵ Aza mitady an’i Betela, aza mankany Galgalà, aza miampita ho any Bersabea! Fa i Galgalà ho lasan-ko babo; ary i Betela hanjary tsinontsinona.

⁶ Tadiavo i Iaveh, dia velomy ianareo, fandrao milatsaka, toy ny afo, amin’ny taranak’i Josefa izy, ka handevona azy, nefa tsy hanana olona handevona izany, i Betela.

⁷ Ovany ho abisinta ny hitsiny, ary azerany amin’ny tany ny rariny!

Fiderana an’Andriamanitra

⁸ Nanao ny Kotokelimiadilaona sy ny Telonohorefy izy; mampody ho maraina ny haizina, ary ny andro ho alim-pito; miantso ny rano ao an-damosina, dia mampiely azy eo ambonin’ny tany; Iaveh no anarany.

Fandrahonana

⁹ Ataony mipoaka ny faharavana mamely ny mahery, ary mianjera amin’ny tanàna mimanda ny fandravana.

¹⁰ Mankahala eo am-bavahady izay mananatra izy ireo; ary tsy tia mainty an’izay miteny amim-pahamarinana.

¹¹ Koa noho ianareo manitsakitsaka ny mahantra, sy mampandoa hetram-bary azy; dia nanao trano vato voapaika ianareo, nefa tsy hitoetra ao aminy; namboly voaloboka faran’izay tsara ianareo, nefa tsy hisotro ny divay avy aminy.

¹² Fa fantatro fa maro ny helokareo ary lehibe ny fahotanareo, ianareo izay mampahory ny marina sy mandray kolikoly, ary mampandefitra ny rariny momba ny mahantra eo am-bavahady.

¹³ Koa dia mangina ny olon-kendry amin’izao andro izao, satria andro ratsy izao.

Famporisihana

¹⁴ Ny tsara no tadiavo, fa aza ny ratsy, mba ho velona ianareo, ka homba anareo i Iaveh Andriamanitry ny tafika, araka ny lazainareo.

¹⁵ Ankahalao ny ratsy, fa ny tsara no tiavo, ary ampanjakao eo am-bavahady indray ny rariny; angamba i Iaveh Andriamanitry ny tafika, dia hamindra fo amin’izay sisa amin’i Josefa!

Akaiky ny famaizana

¹⁶ Koa izao no lazain’i Iaveh, ny Andriamanitry ny tafika, ny Tompo: Hisy hidradradradra eny amin’ny kianja rehetra eny: hisy hanao hoe: Indrisy! Indrisy! eny an-dalambe rehetra eny; hisy hiantso ny mpiasa hisaona, sy higogogogo, miaraka amin’izay mahay midridridridry.

¹⁷ Hitomany ny olona eo amin’ny tanimboaloboka rehetra: fa handalo eo afovoanao Aho, hoy i Iaveh.

Ny andron’i Iaveh

¹⁸ Loza ho an’izay maniry ny andron’i Iaveh! ho inona ho anareo moa, ny andron’i Iaveh? Ho haizina izy, fa tsy ho fahazavana.

¹⁹ Toy ny olona mandositra ny liona, nefa tonga mitsena azy kosa ny orsa; miditra ao an-tranony izy, mitehin-tanana amin’ny rindrina dia kaikerin’ny menarana!...

²⁰ Moa tsy haizina va ny andron’i Iaveh fa tsy fahazavana, haizina tsy misy mangirana?

Tsy ankasitrahina ny fombam-pivavahana ivelany

²¹ Hàlako sy tsy ahoako akory izay fetinareo, tsy hankamamiko akory ny fiangonanareo.

²² Raha manolotra sorona dorana amam-panatitra ianareo tsy mankatelina izany Aho; ary izay fisoronanareo zanak’omby matavy tsy jereko velively.

²³ Halaviro Ahy ny finaonaonan’ny hiranareo; aoka tsy ho reko akory izay feon-dokanganareo!

²⁴ Fa aoka hisononoka hoatra ny rano kosa ny fitsarana; ary toy ny ranondriaka tsy mety ritra ny fahamarinana!

²⁵ Moa nanatitra sorona amam-panatitra ho Ahy va ianareo, ry taranak’i Israely, nandritra ny efapolo taona tany an’efitra?

²⁶ Ny lain’ny mpanjakanareo no nolanjainareo, mbamin’i Kijoma, ny sampinareo, aman-kintan’ny andriamanitrareo, izay nataonareo ho anareo;

²⁷ koa hoentiko hatao sesitany ambadik’i Damasy ianareo, hoy i Iaveh: Andriamanitry ny tafika no Anarany.