2Tantara 6 - Baiboly Katolika

¹ Tamin’izay dia hoy i Salômôna: «Tian’i Iaveh ny mitoetra eo amin’ny haizina.

² Ary nanao trano aho, ka ho fonenanao izy, ary toerana mba hitoeranao mandrakizay.»

Tenin’i Salômôna tamin’ny vahoaka

³ Raha efa izany, dia nitodika ny fiangonan’i Israely ny mpanjaka ary nitso-drano azy, ary ny fiangonan’i Israely rehetra dia tafatsangana. Dia hoy izy:

⁴ «Hisaorana anie i Iaveh Andriamanitr’i Israely, fa ny vavany nilaza tamin’i Davida raiko, ary ny tanany nanatanteraka ilay nolazainy hoe:

⁵ Hatramin’ny andro namoahako ny vahoakako tany amin’ny tany Ejipta, tsy nisy tanàna nofidiko, teo amin’ny fokon’i Israely rehetra, hanaovan-trano hitoeran’ny Anarako, ary tsy nisy olona nofidiko ho mpanapaka an’i Israely vahoakako;

⁶ fa i Jerosalema no nofidiko hitoeran’ny Anarako, ary i Davida no nofidiko hanjaka amin’i Israely vahoakako.

⁷ Nihevitra hanao trano ho an’ny Anaran’i Iaveh Andriamanitr’i Israely i Davida raiko,

⁸ fa hoy i Iaveh tamin’i Davida raiko: ‹Noho ianao nihevitra hanao trano ho an’ny Anarako, dia zavatra soa ny nanananao izany hevitra izany.

⁹ Tsy ianao anefa no hanao ny trano, fa ny zanakao naloaky ny kibonao no hanao ny trano ho an’ny Anarako.›

¹⁰ Ary notanterahin’i Iaveh ny teny voalazany, fa nisandratra handimby an’i Davida raiko aho, sy mipetraka eo amin’ny seza fiandrianan’i Israely, araka ny efa voalazan’i Iaveh, sady efa nanao ny tranon’i Iaveh Andriamanitr’i Israely.

¹¹ Efa napetrako tao ny fiara misy ny faneken’i Iaveh, dia ny fanekena nataon’i Iaveh tamin’ny zanak’i Israely.»

Vavak’i Salômôna ho an’ny tenany

¹² Dia nankeo anoloan’ny ôtelin’i Iaveh i Salômôna nanatrika ny fiangonan’i Israely rehetra, sady namelatra ny tanany.

¹³ Fa nanao lampihazo varahina i Salômôna, dia natsangany teo afovoan’ny kianja: dimy hakiho ny lavany, dimy hakiho ny sakany, ary telo hakiho ny haavony. Niakatra teo izy, dia nandohalika nanatrika ny fiangonan’i Israely rehetra, sy nanandratra ny tanany hanandrandra ny lanitra,

¹⁴ ary nanao hoe: «Iaveh Andriamanitr’i Israely ô, tsy misy Andriamanitra tahaka Anao, na any an-danitra na etỳ an-tany; mitandrina ny fanekena amam-pamindram-po amin’ny mpanomponao, izay mandeha eo anatrehanao amin’ny fony rehetra Ianao.

¹⁵ Toy ny nitandremanao ny teninao tamin’i Davida raiko, mpanomponao, fa notanterahin’ny tananao ny efa voalazan’ny vavanao, araka izao hita anio izao.

¹⁶ Ary ankehitriny, ry Iaveh Andriamanitr’i Israely ô, tanteraho noho ny fitiavanao an’i Davida mpanomponao raiko, ny teny nataonao taminy hoe: ‹Tsy ho lany taranaka eo anatrehako ianao, fa hisy hipetraka eo amin’ny seza fiandrianan’i Israely mandrakizay, raha tany ny taranakao mitandrina ny lalana alehany ka mizotra amin’ny lalàko toy ny fandehananao eo anatrehako.›

¹⁷ Koa aoka àry ho tanteraka, ry Iaveh Andriamanitr’i Israely, ny teny nataonao tamin’i Davida mpanomponao.

¹⁸ «Fa moa dia marina va fa miara-monina amin’ny olombelona etỳ an-tany Andriamanitra? Indro fa ny lanitra aza, mbamin’ny lanitry ny lanitra tsy omby Anao, ka mainka fa ity trano nataoko ity!

¹⁹ Kanefa, ry Iaveh Andriamanitra ô, tsimbino ny vavaka amam-pitarainan’ny mpanomponao, amim-pihainoanao ny antsom-pifaliana amam-pangatahana ataon’ny mpanomponao eo anatrehanao,

²⁰ ary ny masonao ataovy mihiratra andro aman’alina amin’ity trano ity, dia eto amin’ity fitoerana voalazanao hametrahana ny Anaranao ity, dia henoy ny vavaka ataon’ny mpanomponao eto amin’ity fitoerana ity.»

Vavaka ho an’ny vahoaka

²¹ «Henoy ny fitarainan’ny mpanomponao sy i Israely vahoakanao, raha hivavaka eto amin’ity fitoerana ity. Mihainoa any amin’ny fitoeram-ponenanao any an-danitra; mihainoa dia mamelà heloka.

²² «Raha misy olona manota amin’ny namany, ka asaina hanao fianianana izy, koa tonga mianiana eo anoloan’ny ôtelinao, eto amin’ity trano ity,

²³ dia mihainoa azy any an-danitra Ianao, manefà ary mitsarà ireo mpanomponao ireo, ka manameloha ny meloka manatsingerina amin’ny lohany izay nataony, ary hamarino ny tsy manan-tsiny, mamaly azy araka ny fahamarinany.

²⁴ «Nony resy eo anatrehan’ny fahavalo i Israely vahoakanao, noho ny nanotany taminao, raha miverina aminao indray izy sy manome voninahitra ny Anaranao, raha manao fivavahana sy fifonana aminao ao anatin’ity trano ity,

²⁵ dia mihainoa azy Ianao any an-danitra, avelao ny fahotan’i Israely vahoakanao, ary ampodio amin’ny tany nomenao azy sy ny razany izy.

²⁶ «Nony nihantona ny andro, fa tsy misy ranonorana, noho ny nanotany taminao, raha mivavaka eto amin’ity fitoerana ity izy sy manome voninahitra ny Anaranao, sady miala amin’ny fahotany satria nampahorinao:

²⁷ mihainoa azy Ianao any an-danitra, avelao ny fahotan’ny mpanomponao sy i Israely vahoakanao, amin’ny fanoroana azy ny lalana tsara tokony halehany; ary alatsaho amin’ny tany nomenao ho lovan’ny vahoakanao, ny ranonorana.

²⁸ «Nony tonga amin’ny tany ny mosary, nony misy ny pesta, nony misy ny roly, ny niela, ny valala, ny hasila, nony ataon’ny fahavalo fahirano ao amin’ny taniny sy eo am-bavahadiny ny vahoakanao, na misy loza inona na misy aretina inona,

²⁹ raha misy olona iray, raha i Israely rehetra vahoakanao, manao vavaka amam-pifonana, ary samy mahalala ny fijaliany amam-pahoriany avy ny olona, ka mamelatra ny tanany manandrify ity trano ity,

³⁰ dia mihainoa azy ianao any an-danitra amin’ny fitoeran’ny fonenanao, ka mamelà heloka; samy valio araka ny lalany rehetra avy izy, Ianao mahalala ny fony, fa Ianao irery no mahalala ny fon’ny zanak’olombelona rehetra,

³¹ mba hatahorany Anao eo am-pizorana amin’ny lalanao mandritra ny andro rehetra hiainany eo ambonin’ny tany nomenao ny razany.

³² «Ny amin’ny vahiny, tsy anisan’i Israely vahoakanao, fa avy an-tany lavitra, noho ny Anaranao lehibe, ny tananao mahery ary ny sandrinao ahinjitra, nony tonga hivavaka eto amin’ity trano ity izy,

³³ dia mihainoa azy Ianao any an-danitra amin’ny fitoeran’ny fonenanao; tanteraho izay rehetra angatahin’izany vahiny izany aminao, mba ho fantatry ny firenena rehetra ambonin’ny tany ny Anaranao, hatahorany Anao tahaka an’i Israely vahoakanao, ary hahalalany fa antsoina amin’ity trano nataoko ity ny Anaranao.

³⁴ «Nony hivoaka hiady amin’ny fahavalo ny vahoakanao manaraka ny lalana andefasanao azy, raha mivavaka mitodika ity tanàna nofidinao ity sy ity trano nataoko ho an’ny Anaranao ity,

³⁵ dia henoy any an-danitra ny vavaka amam-pifonany, ary omeo ny rariny izy.

³⁶ «Raha avy izay hanotany aminao, fa tsy misy olombelona tsy manota, ka tezitra aminy Ianao, dia manolotra azy amin’ny fahavalony, ary ny mpandresy hitondra azy ho babo any an-tany lavitra na akaiky,

³⁷ raha mieritreritra ao am-pony izy nony mby any amin’ny tany nahababo azy, ka miverina aminao, sy manolotra fifonana aminao, any amin’ny tany nahababo azy, manao hoe: Nanota izahay, nanao ratsy izahay, nahavita heloka izahay,

³⁸ raha miverina aminao amin’ny fony rehetra sy amin’ny fanahiny rehetra izy, any amin’ny tany nahababo azy, izay nitondrana azy babo, ka mivavaka aminao mitodika atỳ amin’ny tany nomenao ny razany, atỳ amin’ny tanàna nofidinao sy atỳ amin’ny trano nataoko ho an’ny Anaranao,

³⁹ mihainoa Ianao any an-danitra any amin’ny fitoeran’ny fonenanao, ny vavaka amam-pifonany, omeo rariny izy, ary avelao ny fahadisoan’ny vahoakanao, izay nataony taminao.»

Famaranana ny vavaka

⁴⁰ «Ary ankehitriny, ry Andriamanitra ô, aoka hahiratan’ny masonao sy hohenoin’ny sofinao ny vavaka atao amin’ity fitoerana ity!»

⁴¹ «Ankehitriny, ry Iaveh Andriamanitra, aoka hitsangana Ianao ho any amin’ny fitoerana fitsaharanao, dia Ianao sy ny fiaran’ny herinao! Aoka hitafy famonjena ny mpisoronao, ry Iaveh Andriamanitra, ary aoka hiarana amin’ny hasambarana ny olonao masina.

⁴² Aza atosi-bohon-tanana ny tavan’ny voahosotrao, ry Iaveh Andriamanitra ô, fa tsarovy ny fahasoavana nomena tamin’i Davida mpanomponao.»