Mikha 1 - ASII LAKDAP Bible (BSI)

¹ Hokhamwetiim Jotham, Ahaj, kiimaq Hejekia raq Juda mung na hokham jawan tlaq pat na, Tatiwe raq Moresheth chelati shammiwe Mika lümaq Samaria chela nai Jerusalem chela ka re raq mishthen baiq wan nguta riisham bom maq tiithaito.

Samaria Chela Nai Jerusalem Chela Re Raq Mishthenbaiq

² Ara tairong laq, namshiq mangjong maiqphan wiita raq; Mangjonghiq na siti phiija wa lei, Ajong Thaq Na Ajong Tatiwe raq namshiq mitiishut wan she. Taironglaq, Tatiwe apaiq sichang, asii ramungtan noqkujam maq chongtlo.

³ Tatiwe ka apaiq sichang asii jam maq satho tloshe. Raüta pum khu thun thaq na mikhum.

⁴ Raüla pum thun kra, simi wakii thun, wa raq jowan tlaq ikha wiita mijam wan, raüta pum heawea jüwii thun ka jüchhang watlaq ikha milüm wan.

⁵ Arthun Shiikeawe tsankhiq saütlaq arka juma mra kewan chang wa? Jakob raq ngarai tangwanto riimak shea? Israilnok ngarai miitu riimak shea? Riita Jakob ngarai ka jamlai wa? Samaria chela na riimak shea? Kiimaq Juda ngarai tangchang hiqlam ka ümbano? Jerusalem chela riimak shea?

⁶ Tatiwe raq ngutlo, “Arningkhan, Samaria ka mitiithen baiq ha, raüta jamriirong phong ka hiqsii thung na ama miraq. Kriika spiq ro chhi ma, hiqwii mong niishe mitsuq baiqha, lata chela haichang longkaü thun ka mitiikhot baiqha.

⁷ Ara ariq tsangshiq phra sumla thun, wiita mitiibunbaiq. Kiimaq shomjam mephe-nyung ma akuq, tsiiqtum thun wiita wa maq michaq baiq, kiimaq phra sumla thun ka wiita mitiibun baiq. Samaria chelati raq tsangsetiim tiipa ma, nguta Phra sumla thun noq wanto, ümchaü ka tsangjaqti raq shomjam mephe-nyung re ma, maiqhiq ahin niishe miho wan.”

Re Raq Juda Mung Chela Thun Tiithen Wanto.

⁸ Mika raq nguto, “Arningkhan maaho maanyi hoqsii tiikang, Tsanbi hosi tsiq ma, khu akhea nai hokpa chhut lata, kheahü chiiheawea na mikhumha, Miikakoikaü ikha agilülü mihoqsiqha. Wuthon kaü ikha, agam agu mihoq siqha.

⁹ Samaria chelati ngarai thatsi tsiq maq phumke chang riimak, athatsi ka atiihealot chang riimak. Juda mungti kiimin kiikhiisii michanchao. Ara ngarai thatsi ümchaü, Jerusalem chela niishe saüto Iphan imaq shongchang chela, athenjen wan ranaiq she saüto.” Arka Mika raq ngutlo.

¹⁰ Najaqtinok Gat chelati ma, Re raq nashiq khatlaq tsütsa, Nashiq maaho manyi chapa, naq tiitaikiq tsangshiq ma, Beth Leaphra chelati lei, chamchao maaho tiichhi liina, Botkhu thaq na külii laüta!

¹¹ Saphir chelati lei, khaiqhü naiqhü warong lüna, Rewa shumwikong ma jalanta, khushü jampaqpaq maq warong laq. Janan chelati lei, chela mongwa naq dong rongkiq, Bethejel chelati hoq trangtlo, Tsangshiq sichang ba ahü.

¹² Maroth chelati lei, chapakhiq maq lunwan haijaq nguta Khesiq tlan nya? Shatmaq Tatiwe raq, Jerusalem chela kilü na saüli tiithen baiqto, namshiq lun chang ahüshe.

¹³ Lakhish chelati lei namchiim jinho tlo ma, kumrangre leng thun paqkuqtlo ronglaq. Namshiq kata Israilnok ngarai lamphan kra phan wanti. Lanta Jerusalemti riimin namshiq, jaijo ashut klo wanto.

¹⁴ Ümchaü sanha, Juda mungti lei, Moresheth Gath chelati ma, kiim riiphea bom pan lishe, chongkuq rongliijo. Juda mungti hokhambi lei, namshiq raq Akhjib chelati jaq wa, akhrum lap chang ahüshe jo.

¹⁵ Maresha chelati lei, Tatiwe raq namshiq ka, rewe jaq mong niishe mikuq baiq. Re raq namshiq chela kriishe mikhat wan. Raüta mijii wan, Israilnok ajong alabi thun ka, tsangshiq chiim jin, Adullam longsha mong niishe mitiipaü wan.

¹⁶ Juda mungti lei, Namkhu siikeakea silanta, liitii khupo ikha kealoklok tiisibaiq laq, lanta namsetiim miitu hoqsiq ronglaq. Jamkhano ngukla namsetiim ka shumwi miishe mitsuq wan.