Matthew 4 - ASII LAKDAP Bible (BSI)

Jesuq Ka Tha Raq Maitaito

¹ Kra jai maq Asii Wenyi raq Jesuq ka Thawe raq mimaitai laq nguta kumtsaiphii binjü niishe sheahoto.

² Jesuq ka raroqblai, ranaiq rawa amang miili siwanto. Kriikha maq apaiq ka ramtsihea riito.

³ Kiijiishe, Thawe ka apaiq phana waraüta, “Riita ümniika Shiikeawe Se dea jiika, ara longpo thun ara winsii ma tiija laq,” nguta maitaito.

⁴ Shatmaq Jesuq raq treto, “Asii bomtsi na akha chongtlo, ‘Maiqse ka winsii lamlamse phaqsiq raütli ka siwanlot mak. Shatmaq, Shiikeawe nübok maq dong tlaq bomtsi awea kra phaqsiq raütiitiq sichang.’ ”

⁵ Kra jai miishe, Thawe raq Jesuq ka Asii chela Jerusalem niishe shea wanto. Raüta apaiq ka Shomjam wukhupong diilu pinthum ba kiiniishe shea wan raüta tiichapto.

⁶ Raüta, Jesuq ma nguto, “Riita, ümniika Shiikeawe Se dea jiika, ara wukhupong armaq doq wan liina. Jamkhano ngukla, Asii bomtsi na akha chong tlo, ‘Shiikeawe raq apaiq rasetiim ma aming mikuq, raüta rasetiim raq ümniika rawang win wiili, tsangshiq jaq maq mikamho, krai mren, ümhok ümjaq ka chong along niimin tiingoq maü mirhaü.’ ”

⁷ Kiijiishe Jesuq raq treto, “Shatmaq, Asii bomtsi niika, ‘Tati Shiikeawe ka ümniiraq naq maitai kiq,’ nguta chongtlo.”

⁸ Kra jai miishe, Thawe raq Jesuq ka hiqlam diiluhea ashi kiiniishe shea wan raüta ara mangjong hiq na maiqmung ümtinkhan wa jonglu tlaq kra tiichhi kuqto.

⁹ Raüta, “Ümniiraq i ji chong na bum laüta ngi ara shomnoq haü jiila, ara maiqmung thun ara ümniima mikuq kang,” nguta Thawe raq nguto.

¹⁰ Kiijiishe Jesuq raq treto, “Thawe ümniika tiibin tlo laq! Asii bomtsi na, ‘Tati Shiikeawe kli shomnoq laq, kiimaq apaiq kli shreng laq!’ nguta chongtlo.”

¹¹ Kra jai miishe, Thawe raq Jesuq ka teibaiq thüto. Kiimaq rasetiim she saüki raüta, apaiq ka shiikum pan kuq wanto.

Jesuq Jaqsham Gelili Maq Phahoto

¹² Kra jai maq jaqlo sijai niili, Jesuq raq Johan ka Herod raq lap raüta phaqtek mong na shaqto nguta tsütsa ka taito. Kra taijai she apaiq ka Gelili wang nü na wawanto.

¹³ Apaiq ka Najareth hiq na simak she riito. Shatmaq, Jebulun nai Naphtali weraü sichang hong na Gelili Thamkii tho na Kaparniam chela na wawan raütiishe siwato.

¹⁴ Arka shammi Isaia raq riisham bomtsi achongthü kra tiikupi wan miitu she hongtha wanto. Apaiq raq akha chongthüto,

¹⁵ “Jebulun nai Naphtali weraü hiqshong, Gelili thamchum na kai chang lam na atei wan hiqshong, Jordan rai maq shenyap nü reko na atei wan hiqshong, Pongnok phan shongchang Gelili wang lei!

¹⁶ Ranyaq mong na siti maiqse raq, rawü li jonghea ashi she michhi wan. Atsai ranyaq nyang na siti ma, rawü li jonghea ashi she mili liim wan.”

¹⁷ Kra akhing miiphat sanha, Jesuq riishe nokmaiqse ma trahoke wan jaqsham ka akhiishe phahoto: “Namshiq ngarai lam phan wa jang wan ronglaq. Jamkhano ngukla Ramungtan ka aje niishe!”

Jesuq Raq Ngiq Lamti Weblai Tseato

¹⁸ Jesuq ka Gelili Thamchum kii na awarai riito. Apaiq raq ngiq khupti siphu wenai Simon, (apaiq ka Petar ngutiimin ngutlo) kiimaq ano Andru ka Gelili thamchum na chiiq maq ngiq khup rea chhi wanto.

¹⁹ Kra chhi wan raüta, Jesuq raq, “I jai phan ronglaq. Ngi raq namshiq ma maiqlap wan shetiq mishrin kuq kang,” nguta nguto.

²⁰ Krai mren, tsangnai raq chiiq ka kiijaq thaq rang raüta, tiido rang, apaq rai she wawan damto.

²¹ Apaiq ka kiimaq wawan nong raüta, maiq ahinti siphu wenai hali, Jebedise nai Jakob nai Johan rai she riihumto. Tsangnai ka awe Jebedi rai lai na nga raüta, tsangshiq chiiq kra tiihea rea lowanto. Jesuq raq tsangnai kiimin ajaqshi se nai ma nguta hea wanto.

²² Krai mren, tsangnai ka tiido rang raüta, tsangshiq lai nai awe ka kiijaq baiqthü raüta, Jesuq rai she wawan damto.

Jesuq Raq Shrinto, Kiimaq Atsiti Tiiheato

²³ Kra raütiishe, Jesuq ka Gelili wang hamli na barap se na wato. Raüta, sinagok thun maq shrinkuqto. Kiimaq Shiikeawe raq mangjong maiqse kunli asengi ma tiija wan akhing ka saüto she nguta Tsütsa Ahea kra tra hokuq wanto. Kiimaq maiq atsi asiti phanrap phanrii thuptsi thatsi raq chamchao rai tlaq thun kra wiita tiihea chhintsii kuqto.

²⁴ Krai mren, apaiq mangjong tsa ka Siria mung tlotli na nyam wanto. Kriikha maq, mungmaiqse raq phanrap phanrii thuptsi thatsi chamchao maiqse thun ka apaiq phaniishe sheahoto. Atsiti phong wa wiijam ka thaq raq arom wan, wiijam ka angaq tsiti, kiimaq wiijam ka khum amaa arki tsiti thun riito. Jesuq raq tsangshiq tarü thatsi ka tiiheakuqto.

²⁵ Nokmaiqse kong phong ka pahea pahea, Gelili wang wa, Chela Roqshi thun wa, kiimaq Jerusalem wa, Judia wang wa, kiimaq Jordan rai maq shedong nü wang wa aki rai thun kriiraq, Jesuq jai ka phan shiiphan maq khum wan damto.