Matthew 3 - ASII LAKDAP Bible (BSI)

Khamlamketiwe Johan Traho

¹ Kiitincho ji Khamlamketi we Johan ka Judia wang na kumtsaiphii binjü kiina kiraüta akha tra hokuq phahoto.

² “Namshiq tsantsii ka klai wan tlo ronglaq. Jamkhano ngukla Ramungtan ka aje niishe!”

³ Isaia shammi we raq tiithai thütiiwe ka Johan ara. Apaiq raq akha nguta tiithai thüto, “kumtsaiphii na ashi ra raq asii lülü maq riimtlo, ‘Tatiwe kai chang lam ka tanholi laq; Apaiq khum ma lam ka liitatat tanho laq!’ ”

⁴ Johan miirii ka Kumtsong nyamse bin maq ataq khea samto. Apaiq raq achhü niika ngamkhü shinket pato. Kiimaq rum wa kupchi nai ngiqngu kra apaiq dung ma tiija raüta phaqsiq wanto.

⁵ Apaiq phana apaiq traho bomchong taikai mungmaiqse thun ka Jerusalem wa, Judia wang barap se wa kiimaq Jordan rai tro na siti hiqshong sitlaq thun kiiwa kirai wito.

⁶ Tsangshiq raq maiqmii ngarai ka tiidii wanto. Krai mren, Johan raq tsangshiq ma Jordan rai na kham lamkuq wanto.

⁷ Shatmaq, Johan raq Phorisinok nai Sadusinok ka apaiq phana khamlamkai nguta pahea akai rai kra chhi raüta, tsangshiq ma akha sonto, “Namshiq ka paüsang nyiqla ikha khonglaq tlan! Namshiq ka Shiikeawe raq ngarai maiqse ma chamchao tiisaüho tlaq kiiwa kham lam wan laita mihang wanlot rong i ngutiisha tiima tlan?

⁸ Namshiq ngarai tsantsii ka klai wan lan she dea nguta, maiq ma jaqsham maq tiichhi kuq rong laq.

⁹ Namshiq ka Abraham lai. Kriikha na ngarai walü mong wa mihang wanlot han ngutiika naq tiima rongkiq. Ngi chongpha. Shiikeawe riika ara longkaü phong arwiili Abraham lai pahea mitiidong lot!

¹⁰ Pechong thun ka arang chong maq ngapsak daq baiq wan miitu mang ka ümchaü arangchong na tiikam shat she. Atsi ango ka ahea tsikuq mak chong thun kriika, achong aweatek wiita adaq she mirbaiq. Raüta walü tum mong niishe michaq baiq wan.

¹¹ Ngi raq namshiq ka ngarai tiidii wan lan she nguta hakhi kham lamlam li lamkuq wan tiikang. Shatmaq i jai na kaiti we raq namshiq ma Asii Wenyi nai waniitu miishe kham ka milam kuq wan. I jai na kaiti we ka ngi thaq na ajong. Ngi ka apaiq hokpa kra shamke wanti dise khan min thek mang anun pinthum.

¹² Apaiq raq ajaq na tsam jap wan chang wankhü ka shamshat she. Tsamphong wa aru nai achhü thun ka wiita ajap she mirbaiq wan. Raüta apaiq raq tsam awongsii thun kriika tum akhiiq mong niishe misaiq sam wan. Kiimaq aru nai achhü thun kriika pattup pat-sa matki mak phan walü rai tlaq kii- niishe miphong chaq baiq wan.”

Johan Raq Jesuq Ma Kham Lamkuqto

¹³ Kiitiikaq Jesuq ka Gelili hong maq aki saükito. Raüta Johan ma kham tlamkai Jordan rai na kito.

¹⁴ Shatmaq, Johan raq Jesuq ma akha nguta tiiwinto, “Ümniiraq riiwe ngi ma kham lamke wan haü chang ngu maüta. Shatmaq ümniika ngi phana jamkho saürai kilaü!”

¹⁵ Shatmaq Jesuq raq abom ka akha treto, “Ümchaü lak na riiwe ka ngi raq ümniima jamlai wa thaü tiikang, kli sham laq. Arka, Shiikeawe raq kechu jaqsham kiimung ümchuwa thapthi wantaq kra tiikupi wan jaqsham.” Riita, krai mren Johan raq apaiq ma jaq ka sham kuq wanto.

¹⁶ Khamlam lot ri she, Jesuq ka khamchum mong maq dong wanto. Kra akhing na Jesuq raq ramungtan ka atlin raü chhito. Kiimaq Shiikeawe Asii Wenyi ka haütaü kaü ikha ra wa satki raüta, apaiq khuthaq na ngakai chhito.

¹⁷ Kiijiishe ramungtan wa bomtsi ashi akha saüto, “Arka i Se. Ngi raq apaiq ka kai lungwii tiikang. Ngi ka apaiq ma pinthum khoqriiq tiikang.”