JOSHUA 22 - ASII LAKDAP Bible (BSI)

Joshua Raq Shedong Wangti Tsanghiq Niishe Tiiwato

¹ Kiitiika Joshua raq Reuben phan, Gad phan, kiimaq Shedong wang na siti Manase phan ka adam na triitam heato.

² Raüta apaiq raq tsangshiq ma chongto, “Tatiwe jaqshise Mosheq raq namshiq ma aming kuqtaq kra kunkun klo lan she. Kiimaq ngi raq namshiq ma aming kuq kang kriimin klo lan she.

³ Ara lea wantaq akhing na namshiq raq namphu namno Israilnok ka jangshi min tiishaü man maq khrum kuqlan. Namshiq ka Tatiwe namshiq Shiikeawe aming tsapkapkap maq lang wan lan.

⁴ Riita, ümchaü sanha, Tatiwe namshiq Shiikeawe raq, jamkho kiqkham kuqtaq, kra phanphan, apaiq raq namphu namno Israilnok ma mung atsing ashe kuqto. Krai mren, namshiq hiqshong, Tatiwe jaqshise Mosheq raq namshiq ma, Jordan rai maq shedong nü wang chumkuqtaq, namshiq raq jiiwan lan she kiijiishe jang wan ronglaq.

⁵ Mosheq raq namshiq ma aming tri raütu kuqtaq kra tsapkapkap maq lang ronglaq: Tatiwe nam Shiikeawe ka lungwii ronglaq, apaiq raq thimitlaq kra sham ronglaq, apaiq aming thun kra lang ronglaq, apaiq wokhong na phaqchii nichii maq sironglaq, kiimaq tsan nai mongjii wiita kuq lanta apaiq ka shiili lii ronglaq.”

^6-8 Joshua raq tsangshiq ma akha ramram kuq raüta tsangshiq ka tiiwato: “Namshiq ka jam na chiithe jong she, nyamse kong pahea, kampho, chaq, miiki ngam, jin, kiimaq khu akhea howan lantiishe wawan tlan. Namjaqtinok jaq wa alam wan han sepat lopi thun ka namphu namnobi rai riiphea riinyin riironglaq.” Kra raütiishe tsangshiq ka maiqmii hiqshong niishe wawanto. Mosheq raq Manase phan wa nokkho miika, Jordan rai maq shedong nü wang kriiwa tsangshiq rii hiqshong chumkuqto. Shatmaq Manase phan nokkho miika, Joshua raq Israilnok maiqphan ahinti krai, Jordan rai maq shenyap nü wang binjü kiiwa chumkuqto.

⁹ Krai mren, Reuben phan, Gad phan, kiimaq Shedong nü na siti Manase phan ka tsangshiq hiqshong niishe jang wanto. Tsangshiq raq, tsangphu tsangno Israilnok ka, Kanan mung na Shilo chela piitiip na baiqthü raüta, tsangshiq ka tsangshiq hiqshong Gilead wang na jang wanto. Ara Gilead wang arka Tatiwe raq Mosheq lümaq tsangshiq miitu chumkuqto.

Jordan Raikii Tho Na Berongwacha Hairaüta Riitsoto

¹⁰ Riita Reuben phan, Gad phan, kiimaq Shedong nü na siti Manase phan ka Jordan rai maq shenyap nü na Geliloth chela na saüto. Raüta tsangshiq raq kiijaq jürai tho na ajongwiq kiimaq atsomwiq berong-wacha ashi haito.

¹¹ Kiijiishe, Israilnok ahinti thun kiima, “Taironglaq! Reuben phan, Gad phan, kiimaq shedong nü na siti Manase phan raq Jordan rai maq nashiqnok hiq na, Geliloth chela na berong-wacha ashi haito!”

¹² Kra tsütsa ka Israilnok tai raütiishe, mungmaiqse tlotli ka shedong mungti rai riikhat ma nguta Shilo na ngongthun ngato.

¹³ Raütiishe Israilnok raq ramwe Eleajar se Phenehas ka, Reuben phan, Gad phan kiimaq shedong nü na siti Manase phan kriima bom tiichong kai, Gilead wang na tiiwato.

¹⁴ Welabi weroqshi ka Phinehas rai wadamto, tsangshiq ka shenyap nü wang na siti Israilnok maiqphan phanroqshi kra khuthaq wa, maiq aphan kaüwatek wa weshishi wadamto.

¹⁵ Raüta tsangshiq ka Gilead wang na, Reuben phan, Gad phan kiimaq Shedong nü na siti Manase phan phana riihum wato.

¹⁶ Raüta Tatiwe sengi mungmaiqse tlotli miitu bom ka akha nguto, “Namshiq raq ara abi pinthum jaqsham ara jam nguto Israilnok Shiikeawe man na klo lan? Namshiq raq namshiq miitu ara berong-wacha hai lanta Tatiwe aming jin lan! Namshiq ka Tatiwe wokhong wa dongholan she!

¹⁷ Nashiq raq Peor chela maq ngarai tang laita, Tatiwe raq asenginok ka thabi tiidong raüta tiijiim baiqtaq ira tsan na asi khata? Kra ngarai kha na nashiq ka ümchaü niitaq chamchao tiikai ara. Riita kra ngarai thaq na jaram tiitsuq wa?

¹⁸ Riita ümchaü min, namshiq ka apaiq wokhong wa pong na dongho she shea? Namshiq raq ümchaü Tatiwe kiq khii han jiila, anap ranaiq apaiq ka Israilnok kunli ma atsankhiq miraq.

¹⁹ Riita ümchaü min, namshiq hiqshong ka Tatiwe shomnoq thekmak jiika, Tatiwe asi Tombutiip sitlaq mung kiina kirongra. Lanta naishiq hiqshong kiiwa hiq wiijam namshiq rii jaü ronglaq. Shatmaq Tatiwe aming ka naq jin rongkiq. Riimakla Tatiwe nashiq Shiikeawe berong-wacha kra tlea lanta, berong-wacha achan ashi haiho lanta, nashiq liipan wa maiq wiijam ma ngarai naq tiitang rongkiq.

²⁰ Jera se Akan raq tiimiqchup shiithenbaiq chang nguta aming akuq hupsam kra tiithenbaiq mak tri jin raüta, mra pintaq ira tsan na tiitsang ronglaq. Kra ngarai tang kha na, Israilnok mungmaiqse kunli raq mohoto. Apaiq ngarai khana, Akan apaiqli ka tsaimak.”

²¹ Kiijiishe Reuben phan, Gad phan, kiimaq Shedong nü na siti Manase phan raq Shenyap nü na siti maiqphan weraü welabi kriimaq akhiishe treto,

²² “Ajong Pinthum kli Shiikeawe! Apaiq kli Tatiwe! Ajong Pinthum kli Shiikeawe! Apaiq kli Tatiwe! Apaiq raq asap naishiq raq ara jamkhano klokai, kiimaq namshiq riimin sap ronglaq! Naishiq raq apaiq kiq khiikai dea jiila kiimaq Tatiwe ma kamtsantsii thümai dea jiila naishiq ka atra naq tiisi rongkiq she!

²³ Ngohea dea naishiq raq Tatiwe aming jin laita, atra honglu chaq chang, kiimaq rai awong honglu chaqchang, kiimaq rintii honglu chaqchang, naishiq maiqmii miitu berong-wacha haikai jiila, Tatiwe apaiq raq naishiq ma mo mitiiholaq.

²⁴ Riimak! Naishiq raq ara klokai arka, jai na miitu tiihai laita klokai. Rawiichii saüpat sepat na, namsaü namsetiim raq, naisaü naisetiim ma, ‘Namshiq raq Tatiwe Israilnok Shiikeawe rai riibomdam chang asi shea?

²⁵ Apaiq raq naishiq nai namshiq Reuben phan kiimaq Gad phan liipan na hiq ka Jordan rai maq raikuqto. Namshiq raq Tatiwe rai riibom kai chang lam ahü,’ nguta mongo miraq nguta ara klokai. Kiikhiishe nguhaü jiika, namsaü namsetiim raq naisaü naisetiim ka Tatiwe shomnoq wa tiiwa mak she miraq.

²⁶ Kra ningkhan naishiq raq berong-wacha haikai. Shatmaq arka honglu ataakuq nyamse chaq ma riimak, kiimaq honglu kewan miitu min riimak.

²⁷ Shatmaq, arka namshiqnok nai naishiqnok liipan na, miithii shong ashi mirlaq nguta, kiimaq naishiq tsai jai, rawiichii saüpat sepat miitu, naishiq riimin Tatiwe ka apaiq sichang asii Tombutiip kiijii dea naishiq honglu wa na chaq chang kra lamho laita kiimaq nyamse take chang honglu kiimaq rintii honglu thun ka lamholaita shomnoq tiikai nguta mithii shong klokai. Arka namsaü namsetiim raq naishiq ma, naishiq riika Tatiwe rai riibom kai chang lam ahü nguta bom chang ahü mirlaq nguta klokai.

²⁸ Naishiq raq tiima wan kai, ngohea shaqshaq kriishe dea nguraüla, naisaü naisetiim raq akha mingulot, ‘Liirong laq! Ara naititiim pat na Tatiwe berong-wacha ikha haithütaq ara! Arka honglu thun ka wa na chaq ma riimak, kiimaq nyamse atra honglu take miimin riimak, shatmaq nashiqnok nai namshiqnok liipan na atiitsang miitu mithii shongthüto.’

²⁹ Naishiq ka ümkhiiriita jiimin Tatiwe kiq ka khiimai. Kiimaq ümchaü wa na chaq chang honglu, kiimaq rai awong honglu kiimaq nyamse atra take chang berong-wacha hai laita, Tatiwe wokhong wiika ümtiikii jiimin dongho mai. Naishiq raq Tatiwe nashiq Shiikeawe berong-wacha apaiq sichang Tombutiip rinkea na chaptlaq berong-wacha kra tlea laita, ahin berong-wacha ka haiki mai.”

³⁰ Ramwe Phinehas nai apaiq rai akidam mung welabi weroqshi kriiraq, shenyap mung na siti aweraü khuthaq wa welabi raq, Reuben phan, Gad phan, kiimaq Shedong nü na siti Manase phan shiilangbi raq tsangshiq ma bom tru chongkuqtaq kra tai raütiishe, tsangshiq ka mit si mitsaq, tsansang she riito.

³¹ Kiijiishe, ramwe Phinehas Eleajar se raq, tsangshiq ma akhiishe nguto, “Ümchaü ka naishiq riimin sap kai she. Tatiwe nashiq rai asi. Namshiq raq apaiq kiq ka tlea man dea. Krai mren, namshiq raq Israilnok ka Tatiwe moho chang wa tiichhii kuq lan.”

³² Kra raütiishe, Phinehas nai apaiq rai akidam welabi ka, Reuben phan nai Gad phan ka Gilead wang na baiqthü raüta, Kanan mung na, Israilnok phaniishe jang wanto. Raüta tsangshiq ma tsütsa ka chongkuq wanto.

³³ Kra tai raüta Israilnok ka mitsi mitsaq she riito, kiimaq tsangshiq raq Shiikeawe ka tiitsamto. Tsangshiq raq arkhat kai chang, raüta kra Reuben phan nai Gad phan hiqshong ka shiithen baiq kai bom ka riichong mak she riito.

³⁴ Kiimaq Reuben phan nai Gad phan riimin, akha nguto, “Ara berong-wacha arka nashiq tarü ma, Tati Shiikeawe kli dea Shiikeawe,” nguta saqse sitlo. Krai mren, tsangshiq raq kra mang ka “saqse” nguta mangto.