JEREMIA 51 - ASII LAKDAP Bible (BSI)

Bebilon Kha Abiri Mipho

¹ Tatiwe raq ngutlo, “Ngi raq Bebilon mung nai tsang mungti khuthaq na atiithenbaiqti rathaiq henghea tiisaü wan tiikang.

² Ngi raq pongmungti tiiki lata rahai raq tsam chhii pan wan tlaq ikha Bebilon mung kra mitiithen baiqha. Kra athen wan akhing she saüwa raüla, tsangshiq raq Bebilon mung ka shokrap norii miishe mikhat wan. Raüta kra mung ka hiq maq hutse tiisiirai mitiithen baiq.

³ Tsangshiqnok phenlabi ma liq maq ahiip akhing ka naq kuq rongkiq, kiimaq tsangshiq ja apiq nai liiq kriimin wi akhing min naqkuq rongkiq. Jerobi thun ka naq tiihang rongkiq! Tsangshiqnok phenlabi ka tiithumpak jiipbaiq ronglaq!

⁴ Tsangshiq ka asho miraq. Raüta tsang chela thun na chiihea wea lam thun kiijaq mijiim.

⁵ Ngi, Tati Shiikeawe, Ningkun Ajongwe raq Israil mungti nai Juda mungti ka, Ngi Israilnok Ma Asiiwe, makki na ngarai pahea tang wanto. Li jiimin, Ngi, raq tsangshiq ka shubaiqtlii ka shubaiq mang.

⁶ Bebilon mung wa namchiim jin jutlo ronglaq! Bebilon mungti ngarai tiikho na dealanta naq tsai rongkiq. Ngi raq ümchaü iphuk lam tiikang. Lata apaiq ngarai tok na shin lata tiicham chao tiikang.

⁷ Bebilon mung ka ijaq na chaq khap ikha shamkang. Lata mangjong maiqse tlotli ma che ka phetak tiibak nyang kang. Maiq mung raq maiqmiimii che khap ka bak nyangto. Raüta tsangshiq ka chok rai raüta chephe maakaiq chhaq sunghü tsiihü she riito.

⁸ Bebilon ka tiihanghiiq miili dea wanto. Raüta tiisiirai she thento! Amaa hoq ronglaq! Apaiq mi thun kra phum ma tsiq rit ronglaq. Jursap tsiq maq phum raülo heaki jiiq riila

⁹ Pongmungti kiijaq sitibi raq ngutlo, ‘Naishiq raq Bebilon mungti ka khrumke dankai. Shatmaq kriika diikiq adea wawi she. Arningkhan apaiq ka baiqthü rong i. Laita nashiq ka jam niishe wawan rong i. Shiikeawe raq Bebilon mung ka aningkun aheng maq mo tiihoto she. Raüta apaiq ka miqchup she tiithenbaiqto.’”

¹⁰ Tatiwe raq ngutlo, “Isenginok lei, akha gitrang ronglaq, ‘Tatiwe raq tiichhikuqto. Nashiq ka maiqsang dea. Jam jiq mai. Jerusalem na warong i. Laita kiijaq siti ma nashiq Tati Shiikeawe raq jamlai jaq wa sham kuqtaq kra chong wa rong i.’”

¹¹ Tatiwe raq Media mung hokhambi tiishai baiqto. Kriika Bebilon mung kra tiithenbaiq miitu. Apaiq Shomjam tiithen baiqtaq phuk lam she Bebilon ka mitiithenbaiq. Renok siihiip jongbi raq akha aming kuqtlo, “Namshiq liqsin ka siraü min ronglaq! Maiqmii liiq piraq kheronglaq!

¹² Bebilon chela ruk thun kra run miitu jaq maq jap lanta tiichhi kuq ronglaq. Phenlabi ka apa maq tiikhe ronglaq! Kintsongti thun ka tsong ronglaq! Bom hai lanta tiikheli ronglaq!” Tatiwe raq Bebilon mungti khuthaq na jamlai mikloha ngutiiwa chongtaq, kriika kloto she.

¹³ Kra mung na jürai pahea asi. Kiimaq tsiiqtum pahea asi. Shatmaq apaiq pat ka thumto she. Apaiq tsitsü raüchong ka ümchaü chum baiqto she.

¹⁴ Tati Ningkun Ajongwe raq apaiq maiqmii mang ka chong raüta apaiq raq rewe pahea tsuqho raüta Bebilon mung kra kupchi kong ikha mitiikhat ha nguta atoqtan wishe. Raüta tsangshiq ka rekhat tang raüta tsangla chong dokdok miriiriiq.

Shiikeawe Tiitsam Shi

¹⁵ Tatiwe raq hiq ka aningkun maq tiiqto; apaiq nyan phaqchi maq mangjong hiq ka phansangto, kiimaq ramungtan thun kra tiikha chanto.

¹⁶ Apaiq aming tai raüta ra khu thaq wa kham thun ka blun wanto; apaiq raq phum thun ka hiq tiisup thun wa tsuq wantlo. Apaiq raq rajun mong na rachhai ralüp tiidongtlo, kiimaq rahai ka atsamtiip wa tiidongtlo.

¹⁷ Arthun ara chhiraüta, maiq thun ka angok angi ikhli sitlo, sunghü tsiihü she jakitlo; sumla tiiqtibi ka tsiim jüshushu she sitlo. Jamkhano ngukla tsangshiq raq alo phra thun ka arot kiimaq rilung tsitsü ahü.

¹⁸ Tsangshiq ka thiihü hiqtili maiqsai asi; Tatiwe ka saüho raüta tsangshiq kha mipho, raüta tsangshiq ka mitiithenbaiq.

¹⁹ Jakob Shiikeawe ka tsangshiq kiikha riimak; apaiq ka phanrap phansangtiwe, kiimaq apaiq raq Israilnok ka awokhong na sima asenginok miishe tsea wanto. Tati Ningkun Ajongwe ka apaiq mang.

Tatiwe Sintu

²⁰ “Tatiwe raq ngutlo, Bebilon lei, ümniika i sintu, ire khat chang. Ngi raq ümniika ijaq na sham lata, maiq mung thun nai mungtan thun tiibun tiiqbaiq wan kang.

²¹ Lata kumrang kong nai achaoti thun tiibun tiiqbaiq kang, kumrang leng thun nai ajiiqti thun tiibunbaiq kang.

²² Lata maiqwere nai jechakre thun jiipbaiq kang, nyungwere nai jerobi thun jiipbaiq kang, lata maiqwe sere nai jechak sere tiiqbaiq kang.

²³ Lata skurümti kong nai tsang skukong jiiqbaiq kang, lata nitheti kong nai tsang kumrang kong jiipbaiq kang, lata mung pengtibi nai ajong alabi jiipbaiq kang.”

Bebilon Mung Mitiithenbaiq

²⁴ Tatiwe raq ngutlo, “Bebilonti raq Jerusalem ka jamkho tiithenbaiqtaq, kra thiitham ka Ngi raq Bebilon mung ma mikuqha kra namshiq mak maq michhihan.

²⁵ Bebilon lei, ümniika pumkaü jonghea ashi raq mangjonghiq tlotli tiithenbaiqti ikha. Shatmaq, Ngi, Tatiwe ka ümniima wesang. Ngi raq ümniika rangho lata, hiq na tiipili she misoq baiqha. Lata botkhulai rai mishot baiqha.

²⁶ Ümchela athenki hiqmiq changkhü kriiwa longkaü thun kriika maiq jurmin riichom raüta jamhai ma lang mak she miraq. Ümniika pattup pat-sa rumnyangkhi kumtsaiphii miishe mijahaü. Arka Ngi, Tatiwe raq toqtan tiikang.

²⁷ “Rekhat chap wan miitu jaq maq jap laq! Hünong ka buk laq! Laüta maiq mung thun raq mitailaq! Maiq mung thun kun kun Bebilon mung khatkai miitu rechap tiije ronglaq! Ararat mungti ma chonglaq. Minini mungti ma chonglaq. Kiimaq Ashkenaj mungti ma khat ronglaq nguta chonglaq. Phentu jong weshi ma lam tiishea laüta tiikhat phaholaq. Kumrang phong ka kupchi longtlaq ikha tsuq wan laq.

²⁸ Maiq mung thun ka Bebilon khat wan miitu tiijelaq. Media mung wa hokhambi thun ka tiiheakikiq. Tsang mungtubi kiimaq ajong alabi thun. Kiimaq tsangshiq raq pengtlaq mung thun kiiwa phenlabi ka tsuq wan rong laq nguta tiiheakikiq.

²⁹ Mangjong hiqraikhü ka tiikhaitlo kiimaq tiibairaitlo, jamkhano ngukla Tatiwe raq Bebilon mung ka kumtsaiphii miishe tiijabaiq wantlo. Kiijaq maiqse ka jumin simak she miraq.

³⁰ Bebilon mungti phenlabi raq rekhat ka athaq she riibaiqto. Raüta tsangshiq ka chela kiitelong ruk mong niili ngakito. Tsangshiq ningkun ka ajom she, jechakre ikhiishe haitlo. Chela tro wa kilamchong thun kiimin wiita thenkito. Jamthun ka wa miishe chaqbaiqto.

³¹ Kiimwebi tsasoqti ka riijo riijo ju raüta, Bebilon hokhamwe ma chela tro wa kiitelong ruk thun ka barap binrii miishe tiibun siiqbaiq wanto nguta tsütsa ka tiitai chong watlo.

³² Re raq jürai jin wan chang ba lam ka jiiwanto she. Raüta chela tro kiitelong ruk ka wa miishe chaqbaiqto. Bebilon mungti phenlabi ka wiita phiip riishe tsai wanto.

³³ Jaqlo liipan niili re raq tsangshiq ka mijiipbaiq. Raüta tsam khaolüm nitlaq ikha hiq na nishishi she minibaiq. Arka Ngi, Tati Ningkun Ajongwe, Israilnok Shiikeawe raq ngutiikang.”

³⁴ Bebilon hokhamwe raq Jerusalem ka tiibunbaiqto, raüta wiita phaq baiqto. Apaiq raq chela ka hamlii tsabum wa hupsam tiidongbaiqtlaq ikha tiidongbaiqto; ngorokaü raq ikha apaiq raq jokbaiqto, Apaiq raq aroro tiithumpak runto, kiimaq kriiwa chantlaq ka wiita wanbaiqto.

³⁵ Jajon chelati raq ngu ronglaq, “Bebilon mungti raq naishiq tsatta wantaq kra kha ka miholaq!” Jerusalem chelati raq akha mingulaq, “Bebilon mungti khupo na naishiq ümtinkhan wa chamchaokai kra kha miholaq!”

Tatiwe Raq Israilnok Mikhrumkuq

³⁶ Krai mren Tatiwe raq Jerusalemti ma chongto, “Ngi raq ümkha ka miphoha. Lata ümjaqtinok raq ümnaq jamkho tiichamchaotaq kra miitu atham mijaüha. Ngi raq Bebilon mung wa jürai kuk thun ka atrü mirbaiqha. Lata jürai thun wa kham ka wiita mitrübaiqha.

³⁷ Kra mung ka hiqmiq changkhü miishe mijaki. Kiijaq rumngam phongli she misi wan. Kriika aliilot chang riimak miraq. Maklii jai na tiijang phat miraq. Kiijaq maiq ka simak she. Kiimaq kra mung ka chhiti maiqse kunli ka phiipraq mitsai.

³⁸ Bebilon mungti ka wiita hangsi kong ikha gitrangtlo. Kiimaq hangsi sekong gantlaq ikha gantrangtlo.

³⁹ Tsangshiq ka shakaq kong sha? Ahea. Ngi raq tsangshiq miitu phaqsea poi jonghea mitiijeha. Lata tsangshiq ka che maq mitiichokha kiimaq mitiichochiha. Raüta tsangshiq ka akon makaiq she mibum wan. Kriika samki nong mak she miraq.

⁴⁰ Ngi raq tsangshiq ka tsuqho lata skukong ikha, chhechhi kong ikha, kiimaq skuresekong ikha mitiitaa baiqha. Arka Ngi, Tatiwe raq toqtan tiikang.”

Bebilon Mung Ningthoi

⁴¹ Tatiwe raq Bebilon mung miitu akha ngutlo: “Mangjong maiqse kunli raq shomra wantaq chela irka ümchaü re raq jiiwanto she! Bebilon chela thentaq kriika maiq mung thun maklii na phiiptsi jiiptsi she jakito!

⁴² Khamjong chum ka blun phom wan raüta Bebilon ka lam wanto. Raüta khamphom blun wantlaq kriiraq wiita mawanto.

⁴³ Chela thun ka wiita thento. Raüta maklii jai na tiijangphat maiqphiip maiqjiip sitlo. Raüta khamhü mung rumnyangkhi kumtsaiphii mung ikha maiq sikai min maimak kiimaq akhumkai dongdii min maimak she thento.

⁴⁴ Ngi raq Bebilon mungti phra kaü Bel ma mo mitiihoha. Lata apaiq raq ahuk wan tsiiq nai nyam thun ka wiita mitiithaq baiqha. Maiq mung thun raq apaiq ka shomnoq mak she miraq. “Bebilon chela tro ruk ka thento she.

⁴⁵ Israilnok lei, kriiwa jutlo ronglaq! Lanta namshiq ka itsankhiq walü nyaitlaq kriiwa namchiim jintlo ronglaq.

⁴⁶ Tsaiji naq tran rongkiq. Kiimaq maiq tsütsa kra tai lanta naq kiinyii rongkiq. Rawiitek namshiq raq shapshaü ka phan phan mitai han. Kra mung na hokham weshi raq hokhamwe weshi rai riikhat wanto nguta tsütsa ka mitaihan.

⁴⁷ Kiimaq arai mren, akhing misaü wan, Ngi raq Bebilon mungti sumla phra kong kha ka miphoha. Tsangmungti kunli ma jea mitiingaüha. Kiimaq asenginok mungmaiqse thun ka hiq maq hutse wiita mijiipbaiqha.

⁴⁸ Bebilon mungti ka shekhu nü mung wa re saüho raüta tiisiirai mishthenbaiq. Kra chhi raüta ara mangjong hiq na sitlaq wiitsitsü phan kunli raq kiimaq ra na siti kunli raq pinthum chojong chise she misiitrang.

⁴⁹ Bebilon mungti raq mangjong hiq wa maiqse pahea tiitsatbaiqto. Kiimaq apaiq raq Israilnok pahea tsatbaiq wanto. Kriikha na ümchaü ka apaiq kiishe mitsai. Arka Ngi, Tatiwe raq ngutiikang.”

Israilnok Bebilon Mung Na Siti Miitu Shiikeawe Tsütsa

⁵⁰ Tatiwe raq asenginok Bebilon mung na siti ma chongtlo: “Namshiq ka atsai maakho wa lun lan! Ümchaü ka warong liishe! Naq khe rongkiq! Namshiq ka maiqmii mung maq luhea na sitlan. Li jiimin Ngi, namshiq Tatiwe arshe tiima ronglaq. Kiimaq Jerusalem kra tsan na tiima ronglaq.

⁵¹ Namshiq nga, ‘Nashiq khushü ka tiijamto. Kiimaq jea tiingaüto. Nashiq ka ümkoq ümphaq lishe sitiikai. Jammin chhechha lot mai. Pong mungti raq Shomjam mong wa asii khok thun ka wiita jii wanto.’

⁵² Arningkhan Ngi raq akha ngutiikang, akhing ashi misaü wan, Ngi raq Bebilon mungti sumla phra kong kriishe mitiithen baiqha. Kiimaq maiq asho kong thun ka kra mung tlotli na tsang pit-tsi ma agam agu watrang lishe miraq.

⁵³ Bebilon mungti ka ra na düwan raüta, kiitelong maq chela tro na jamlai riimin chhemak phan ruk hai raü min, Ngi raq kiijaq maiq tiiwa lata kra chela ka mishthen baiqha. Arka, Ngi, Tatiwe raq toqtan tiikang.”

Bebilon Ka Thongshiri Hali Minannong

⁵⁴ Tatiwe raq ngutlo, “Taironglaq Bebilon mung na maiqho trang ka, tsangmung thentaq kriikha na maaho.

⁵⁵ Ngi raq Bebilon ka tiithenbaiq tiikang, lata tiikaiqshak bukbaiq tiikang. Rewe phen phung ka sammoktra chum blun moktlaq ikha saü wanto, raüta arü watrangla khat wanto.

⁵⁶ Tsangshiq ka Bebilon tiithenbaiq wa wato, asengi phenlabi ka re raq lapto, kiimaq tsang liq thun ngoqbaiqto. Ngi ka abi kloti ma motiihoti Shiikeawe; kiimaq Ngi raq Bebilon kha ka akha tsintlaq kra khan khan tri atsin ma miphoha.

⁵⁷ Ngi raq amungtuwebi ma che mitiibak nyangha lata mitiipheha; taksubi, tuwebi, kiimaq phenlabi. Tsangshiq ka akon mirwan, kiimaq ümtiikiimin samkimak she miraq. Arka, Ngi hokhamwe raq ngutiikang, Ngi ka Tati Ningkun Ajongwe.

⁵⁸ Ningkun ajong Bebilon ruk thun ka hiq na tiiphongtsok mitiibunbaiq, raüta ruk diiluhea ruk kilü thun wiita, wa maq hihut michaqbaiq. Maiq mung thun jaqsham ka atuli she mithumki, tsangshiq raq minshiiqtaq ka wa maq chaqbaiqto. Arka Ngi, Tati Ningkun Ajongwe raq toqtan tiikang.”

Jeremia Bomtsi Ka Bebilon Na Tiiwanto

⁵⁹ Hokhamwe Jedekia apaiq pumsii jaqshi ka Seraia. Awe mang ka Neria kiimaq ati mang ka Mahseia. Jedekia ka Juda mung na hokham jawanli maq wiiblai she riito. Seraia ka Jedekia rai Bebilon mung na wawan damto. Kiimaq ngi raq apaiq ma tsii chongkuq kang.

⁶⁰ Ngi raq Bebilon mung ka hiq rai shottlii mithen wan bomtsi tsütsa ka lakdam ashi na waiqkang. Kiimaq kriiwa chan raüta Bebilon khuthaq na abi thun thenjen wan chang bomtsi kriimin waiqkang.

⁶¹ Ngi raq Seraia ma akha chongkuq kang, “Ümtiikiiwa ümniika Bebilon mung niishe saü wantlaü, tsan na tiitsang dada maq, ara lakdam na awaiqthü bomtsi ka tlotli mungmaiqse ma tiihong laüta phatkuqlaq.

⁶² Kra laüta akha achu jaülaq, ‘Tatiwelei, ümniiraq armung arka atiithen mirbaiqha nguta ngulaü. Krai mren, armung na atra phan ka jammin ahü she miraq. Maiqse min simak she miraq. Kiimaq ngamsaü ngiqse min simak she miraq. Armung ka pattup pat-sa rumnyangkhi kumtsaiphii ikhiishe mijaki.’

⁶³ Seraia lei, ümniiraq ara lakdam ka mungmaiqse ma phat kelot jai she, lakdam arjaq longkaü ashi paq laq. Laüta Euphretis jürai na tiidea baiqlaq.

⁶⁴ Kra laüta, akha ngulaq, ‘Ara lakdamkom jamkho chum mong na sang wantlaq akha, Bebilon mung ka chummong na mitiideabaiq. Krai mren ümtiikiimin thongshi ka ra na dong lot mak she miraq. Jamkhano ngukla Tatiwe raq armung ka mitiithenbaiq.’” Jeremia bomchong ka arshe thumto.