JEREMIA 16 - ASII LAKDAP Bible (BSI)

Tatiwe Raq Jeremia Rilung Miitu Thapthitlo

¹ Tatiwe raq ngi rai bomto raüta akha nguto,

² “Ümniika maiq naqlamkiq. Kiimaq akha hiqshong miika sehü miili silaq.

³ Noresere thun ara hiqshong na rawü chhitlaq thun nai anyung wetiim thun ma jamlai akhing wa misaü wan kra ngi raq ümniima chongpha.

⁴ Tsangshiq ka thadong henghea phiiptsi chang dongtlaq kiina mijiim. Tsangshiq maajoti maiq jumin ahü miraq. Kiimaq tsangshiq maaphong kra lapsheti min ahü miraq. Tsang maaphong ka minsaü daiq phong wak na aphong ikha mirphong. Tsangshiq ka redong akhing na re raq mijiipbaiq, riimakla ramdong raq amang maq mijiim. Tsangshiq maaphong ka wushikong raq miphaq kiimaq rum wa ngam kong raq miphaq.

⁵ “Ümniika maiq maaho manyi jam na düwa maimak. Maiq ka juli tsai raü min naqjokiq. Ngi raq isenginok ma hansang shiiman kuqmang she. Kiimaq tsangshiq ma lungwii tsü nai tiihang mangchan tiichhikuq mangshe.

⁶ Armung wa chiithe maiqse nai miitsan maiqse thun ka wiita mitsai. Shatmaq tsangshiq maaphong lapti maiq ka ahü miraq. Kiimaq tsang maa joti maiq ahü miraq. Maajo tsanbi tiichhi tsangshiq dü na tiimi hanti riimakla tsangkhu kra loktam maq si raüta maahoketi maiq jumin ahü she miraq.

⁷ Maiqmii jamti tsaiki raü min, apaiq rai adam na ngaraüta tsaido jido mangchan tiichhiketi abom damti maiq ka jumin ahü she miraq. Anyung lo riimakla awe lo tsaikaiti miimin tsaiji tiijong ma riibom damwati maiq ahüshe miraq.

⁸ “Juta jam niiwa maiq chenyang dungsea polotlaq, kra jam na naq nyapkikiq. Tsangshiq rai phaqsea lomdam naq chap ngadamkiq.

⁹ Ngi Ajong Pinthum Tatiwe, Israilnok Shiikeawe raq jamlai bom chongke chang wa sitlaq kra tailaq. Ngi raq chojong chise maiqnai trang kiimaq khoqriiq shishiiq wiinum shewa maiqlam polotlaq kra wiitashe mitiitsaq baiqha. Armung na siti maiqse raq ara chong tiikang mra pin ka michhi.

¹⁰ “Riita ümtiikiiwa ümniiraq tsangshiq ma arthun bomtsi ara michong kuqhaü, tsangshiq raq ümniima riita akha wiqwiq ka Ngi raq tsangshiq ka jam nguta tsat son rea wa nguta bom miwai. Tsangshiq raq tsangshiq Tatiwe Shiikeawe man na jamlai phan no shuttkai kiimaq jamlai ngarai wa tangkai nguta bom miwai.

¹¹ Raüla, tsangshiq ma Tatiwe raq jamlai wa chongtaq kra chongkuqlaq. ‘Namtitiim pat na tsangshiq ka iwokhong wa donghoto. Raüta phanhin sumla phra thun shomnoq wanto. Raüta tsangshiq raq Ngi ka miimbaiq thüto. Kiimaq tsangshiq raq ibomchong tri raütu ka langmak riito.

¹² Shatmaq kriithaq niimin namshiq riika namtitiim thaq na thittlaiphok she ashut klo wantlan. Namshiq tarü ka nilan wanshakshak kong kiimaq abi siisaq, kiimaq namshiq raq ibom taiman.

¹³ Arningkhan na, Ngi raq namshiq ka armung arwa maiq mung ashi, namshiq maiqmii riimin sapman, kiimaq namtitiim riimin sap mak mung kiiniishe miphong baiqha. Krai mren, kra mung kiijaq, laihin phra sumla thun kriishe ranaiq rawa mishomnoq wanhan. Kiimaq Ngi raq namshiq ma tiihang mangchan tiichhikuq mang she mirha.’”

Munglu Shumwi Asiwa Tsangmung Na Jang Wan Nongto

¹⁴ Tatiwe raq ngutlo, “Akhing ashi misaü wan mungmaiqse raq ngi mang chong raüta ngi ka atra Shiikeawe tsangshiq ka Ejip mung wa shea wantiwe ngutiika tiitum mak she miraq.

¹⁵ Kra ngorii na, tsangshiq raq ngi mang chong raüta, ngi ka atra Shiikeawe tsangshiq Israilnok ka shekhu nü mung thun kiiwa riichom wan lata, kiimaq maiq mung thun ahin pahea na tsangshiq ka atiipin baiq wan ha kiiwa riichom wantiwe nguta mingu. Ngi raq tsangshiq ka tsangmung na tsangti tum ma akuq wan ha mung kiina hali mitsuq wan nongha. Arka Ngi, Tatiwe raq ngutiikang.”

Shiikeawe Raq Israilnok Ma Mo Mitiiho

¹⁶ Tatiwe raq ngutlo, “Ngi raq ngiq khupti maiq pahea tiihea wakang. Lata arnok ara mitiikhupha. Kra latiishe Ngi raq ngamhiipti kong maiq pahea mitiihea wanha. Lata tsangshiq ma Israilnok ka pum aweatek wa kiimaq ku akin aweatek wa kiimaq chongkhong longsha aweatek wa, longraq mong wa wiita kunkun mitrit wanha.

¹⁷ Tsangshiq raq jamlai wa klotlaq kriika Ngi raq wiita kunkun achhiha siisaq. Ngi raq chhimang chang ka jamlai min ahü. Imakki wiika tiipaü kilot mak. Tsangshiq raq ümchuwa ngarai tangtlaq kriika wiita ngi raq chhishat rashra.

¹⁸ Ngi raq tsangshiq ka tsangshiq ngarai ümchuwa klo wantaq kra thaq na thep tliip lata tsangshiq ma mithamkuqha. Tsangshiq raq thep liip raüta imo ka miho. Jamkhano ngukla tsangshiq raq ngi raq akuqha mungtan ka tsitsü ahü sumla phra phong kra noq wan raüta wiita tiisheshi baiq wanto. Kiimaq tsangshiq raq arot akiq phra phong kra hiqma rama phong wan raüta ihiq shong ka tiisheshi wanto.”

Jeremia Raq Kamto Maq Tatiwe Jaq Wa Achu Jaüto

¹⁹ Tatiwe ümniikli ngi khup wongtiwe kiimaq ngi ma ningkun shoqketiwe. Ümniiraq ngi ka litkot chamchao ranaiq na khrum kuq tlaü. Maiqmung pahea wa maiq ka ümphana wa raüta, akha mingu, “Naititiim pat na jam min ahü shaqmii siwanto. Tsangshiq raq arot phra phongkli shomnoq wanto. Jamlai liip min ahü, shatmaq thiihü sumla phra phong kli shiili liiwanto.

²⁰ Riita maiq weshi raq apaiq phra ka mitiiqlot shea? Lot mak. Apaiq raq klo raüka, kriika riikhaqli phra kong ka riimak.”

²¹ “Ikhla,” nguta Tatiwe raq ngutlo, “Ümchaü sanha Ngi raq klang maq lakshi maq panthit, Ngi raq mangjong hiq na maiq mung ümchuwa sitlaq kriima, Ngi ningkun jong nai Ngi arang jonglu kriishe mitiichhi kuqha. Raüla tsangshiq raq Ngi ardea Tatiwe nguta misap wan.”