DUNGWVNC 34 - ASII LAKDAP Bible (BSI)

Thongnai Ngojashe Longpen Wiinai Hainongto

¹ Tatiwe raq Mosheq ma nguto “Apha lak wa kiikha longpen anai hailaq. Raüla Ngi raq apha lak awaiqha bomtsi longpen wiinai ümniiraq tiibun baiq laü kra bomtsi hali miwaiq nongha.

² Anap ranap na tiijelaq. Laüta Sinai Pum khuthaq na Ngi rai riihumwa wara. Kiijaq Ngi rai mirhum haü.

³ Ümniirai ahinti jumin wadam maimak. Ara pum tro na maiq jumin khumkai maimak. Kiimaq ara pumji na sku lo minsaü lo, kriimin nyiimjaq tiiphaqkai mai mak.”

⁴ Krai mren Mosheq raq longpen anai hali hai nongto. Kiimaq anap ranaiq na ranap chu maq apaiq raq kra longpen wiinai ka pi raüta Sinai Pum khuthaq na, Tatiwe raq aming tattaq kra phan phan wawanto.

⁵ Kiimaq Tatiwe ka phumda mong maq satkito. Raüta kiijaq apaiq rai chapkito. Raüta apaiq asii mang chong, Tatiwe kra chongto.

⁶ Raütiishe Tatiwe ka apaiq miki na lea wanto. Raüta akha riimto, “Ngi, Tatiwe ka, Shiikeawe pinthum mangchan tsii rümti kiimaq tsan tsihea maq mangchanti, mokhiq khiq mang phan, kiimaq lungwii tsii jonghea rümti kiimaq pinthum tsapkapti.

⁷ Ngi raq ikiq kham bomtsi ka maiq pat pat ahing amun na saüli thütiikang. Kiimaq abi kiimung nai ngarai kra diikuq tiikang. Shatmaq Ngi riika anyungwe ngarai miitu, asetiim ma kiimaq asaütiim ma kiimaq maiqpat pat tsam na kiimaq patblai na saüli mo tiiho ka tiipoi mang mirha.”

⁸ Kiimaq Mosheq ka taülaü khiq hiq na bumsaq raüta Tatiwe shomnoqto.

⁹ Apaiq raq nguto, “Tatiwe, ümniika ngohea shaq shaq ngi ma khoqriiq tlaü jiila, ngi raq ümniika naishiq rai adam na wa i nguta tiipaiqnea tiikang. Arnok arka nilan wanshak shak nok. Shatmaq naishiq abi kiimung nai ngarai ka adii riikuqlaq. Kiimaq naishiq ka ümsenginok shaq ma rümshat riilaq.”

Tongshong Ka Anye Ma Tiijanongto

¹⁰ Tatiwe raq Mosheq ma nguto, “Ngi raq ümchaü Israilnok rai tongshong tiikang. Tsangshiq rai mantut na Ngi raq ara mangjong hiq na siti maiq mung thun na ümtiikiimin sham mak dongdii phan jaqsham jonghea mishamkuqha. Ngi, Tatiwe raq ümtinkhan jonglu wa jaq shamlot tiikang kra maiqse wiita raq she michhi. Jamkhano ngukla Ngi raq namshiq miitu phiiptsi chang jaq she mishamha.

¹¹ Ümchaü ranaiq Ngi raq namshiq ma thungtri raütu thun kuq tiikang kra lang ronglaq. Ngi raq Amoraiqnok, Kanannok, Hitaiqnok, Perijaiqnok, Hiwaiqnok, kiimaq Jebusaiqnok thun kra namshiq jamkho sinkhu na wawantlan, kra phan phan wiita mijobaiqha.

¹² Namshiq raq jiiwantlan maiq mung thunti rai wehea riija tong naqshong rongkiq. Akhla riihan jiila, namshiq khlaq wan chang hiqbi thiikho bok ma mijaki.

¹³ Kra rii na, tsangshiq berong-wacha thun ka arun riibaiq ronglaq. Kiimaq tsangshiq asii khamchong thun ka atiithen riibaiq ronglaq. Kiimaq tsangshiq phra nyung Ashera berong thun ka atiithen riibaiq ronglaq.

¹⁴ “Namshiq raq laihin phra naq shomnoq rongkiq. Jamkhano ngukla, Ngi, Tatiwe raq Ngi rai riilongtibi ka ninlot mang.

¹⁵ Kra mungti rai namshiq raq wehea riija tongshong raamak. Jamkhano ngukla tsangshiq raq tsangshiqnok thatsang phra kong kra shomnoq tlaq akhing na kiimaq honglu takuq tlaq akhing na, tsangshiq raq namshiq min lomki dam rongkiq nguta, namshiq ka mihea, kiimaq namshiq ka tsangshiqnok phra kong ma honglu na ataakuq phaqsea kra lomdam chang she mijaki.

¹⁶ Kiimaq namsetiim raq pong mung maiqse sheare kra molam wan she moraq miraq. Raüla kra nyungre raq tsangwesetiim ka Ngi miimthü raüta lamjiq niishe misheaho. Raüta tsangshiq thatsang phra kong kriishe mitiishomnoqho.

¹⁷ “Jin maq phra sumla thun naqhai rongkiq kiimaq naq shomnoq rongkiq.

¹⁸ “Pi Maq Shohü Winsii Phaq Poi kra lang ronglaq. Ngi raq jamkho aming kuq kang, kra phan phan Abib jipi lü na ramiishi na saüli Pi Maq Shohü Winsii kra phaq ronglaq. Jamkhano ngukla kra jipi lü na namshiq ka Ejip mung wa laüwan lan.

¹⁹ “Loweatek chhikhuse maiqwese rawiichhitlaq kra nai jam nyamse chhikhu nyungtlaq kriika Ngi rii.

²⁰ Shatmaq namshiq raq loweatek kumtoq se chhikhu nyungtlaq kriika ijaq wa skuse ashi ka pumsong honglu na kuq lanta dawan lili ronglaq. Namshiq raq kra ijaq wa riwan man jiila, kra kumtoqse dangkong ka atiingo buk ronglaq. Maiqwese chhikhuse loweatek ka ijaq wa ada riiwan ronglaq. “Ngi phana maiq jumin honglu kechang ahü jaqmii maq sham tiichhiwa maimak.

²¹ “Namshiq ma minshiiq sea miitu liipan shi wa ratrok asi. Shatmaq ramiishi ngo ranaiq na jaqsham kai maimak. Arka nithechoji niimin kiimaq tsamjut choji niimin jaqsham kai maimak.

²² “Ümtiikiiwa namshiq raq bunwong tsam nye siqphahotlan kiitiikaq Tsamwi Poi ka klo ronglaq. Kiimaq Lamjaptiip Poi ka liidong wan na petsi anye pansiq phahotlan akhing na klo ronglaq.

²³ “Wiishi na jangtsam namshiq maiqwere kunli raq, Ngi Tatiwe, Israilnok Shiikeawe ka shomnoq wa ratlo.

²⁴ Ngi raq namshiq khaki na maiqmung thun sitlaq kra jobaiq wan jai, lata nam mung hiq trai ka tiijong kewan jai na, ara laktsam poi klotlan akhing na jurmin nammung ka khat wa la nguta manhii mak miraq.

²⁵ “Namshiq raq Ngi ma nyamse honglu takuqtlan akhing na, pi maq asho winsii ka Ngi ma honglu na kewan maimak. Tiichhiiwan Poi na ataaphaq han ngam ka anap ranap na tiisaüli naq thü rongkiq.

²⁶ “Rawiitek Tatiwe jam na, namshiq raq apha shaq shaq bunwong hantlan kra kuq ronglaq. “Skuse ngam lo riimakla chhechhise ngam lo ka akaü nyakpü maq naq lum rongkiq.”

²⁷ Tatiwe raq Mosheq ma nguto, “Ara bomtsi thun ara awaiq laüta thülaq. Jamkhano ngukla ara bomtsi thaq na seng lata Ngi raq ümniirai kiimaq Israilnok rai ara tongshong wan tiikang ara.”

²⁸ Mosheq ka kiijaq Tatiwe rai raroq blai ranaiq rawa sidamto. Apaiq raq kra bala dung min siq mak kiimaq kham min nyang mak riito. Apaiq kra longpen wiinai kiijaq tongshong bomtsi thun Aming Roqshi kra waiqto.

Mosheq Ka Sinai Pum Wa Satkito

²⁹ Ümtiikiiwa Mosheq ka Sinai Pum maq Aming Roqshi kra piho raüta satkitaq akhing na, atheaphi ka achhai anyii riito. Jamkhano ngukla apaiq ka Tatiwe rai riibom shat riito. Shatmaq apaiq riika hemak dea.

³⁰ Aron nai mungmaiqse raq Mosheq sham na liito. Kiimaq atheaphi ka achhai anyii chhito. Kiimaq tsangshiq ka apaiq tho na wa ma ahai riito.

³¹ Shatmaq Mosheq raq tsangshiq ka heato. Kiimaq Aron nai mung thaq wa welabi thun ka apaiq phana wato. Kiimaq Mosheq raq tsangshiq rai riibomto.

³² Kra jai miishe, Israilnok mungmaiqse kunli she apaiq tro na riitamto. Kiimaq Mosheq raq apaiq ma Tatiwe raq Sinai Pum maq akuq thungtri raütu thun ka wiita tsangshiq ma kuqto.

³³ Ümtiikiiwa Mosheq raq tsangshiq ma bom ka chongkuq lot taq, apaiq raq atheaphi ka khea maq khup pangto.

³⁴ Kiimaq Mosheq ka ümtiikiiwa Tatiwe asi Tombutiip na Tatiwe rai riibom wa watlaq, apaiq raq akhu pang chang khea ka alin riibaiqtlo. Kiimaq ümtiikiiwa apaiq ka kinphai na dongkitlaq, Tatiwe raq apaiq ma aming thun ümchu wa chongkuqlaq nguta kuqtaq kra, apaiq raq Israilnok mungmaiqse ma chongkuqtlo.

³⁵ Kiimaq tsangshiq raq atheaphi ka achhai anyii chhitlo. Kra lot raütiishe apaiq raq kra khea maq atheaphi ka Tatiwe phana riibom wa nong miwa nong shaq wiiwii, pangshat riitlo.