DUNGWVNC 15 - ASII LAKDAP Bible (BSI)

Mosheq Shinge

¹ Kiijiishe Mosheq nai Israilnok raq ara Tatiwe tiitsam shito: “Ngi Tatiwe ma mishiha, apaiq raq rekhat khushü jonghea tangto; apaiq raq kumrang kong nai kumrang thaq na chaoti thun khamjong chum na dobaiqto.

² Tatiwe ka ningkun aheng ngi tiiwongti; apaiq raq ngi khupwongto. Apaiq ka ngi Shiikeawe, kiimaq ngi raq apaiq mitiitsamha, iwe ma Shiikeawe, kiimaq ngi raq apaiq jonglu mishiha.

³ Tatiwe ka nolajong; apaiq mang ka Tatiwe.

⁴ “Apaiq raq Ejip mung phenlabi nai tsangshiq leng thun khamjong chum na dobaiqto; tsang phentubi pinthum ahea Khamshii Khamjong chum na tiithap baiqto.

⁵ Khamjong tsaü hea raq tsangshiq lam wanto; tsangshiq ka longkaü ikha chumphii mong na sang wanto.

⁶ “Tatiwe lei, ümjaq jaq tsi nü ningkun ka maiqkii maiq nyii henghea; kriimaq re thun ka bunlak buncha bukbaiqtlo.

⁷ Achhai anyii khushü jonghea, ümjaqti thun tanglaü; ümtsankhiq walü hengto, kiimaq tsangshiq ka tsamkü ikha khiimbaiqto.

⁸ Ümniiraq khamjong chum ka melaüta kham ka ra na dii luwiq atso blun wanto; raüta khetuk ikha chapkito; khamjong tsaühea ba ka hiqsii thung ma jakito.

⁹ Rewe raq nguto, ‘Ngi raq tsangshiq ka mijoha lata milap-ha; Ngi raq tsangshiq tsiiq tum milapha, kiimaq ngi raq aroro milam wanha; Inepja michat ha, lata tsangshiq hupsam wiita milamhoha.’

¹⁰ Shatmaq ümniiraq tsitsü jangshi heakaütli, Tatiwe, Ejip mungti ka jü na thap wanto; tsangshiq ka chumtru na chunpo asang wan ikha phiiptsi rakrak thap wanto.

¹¹ “Tatiwe lei, ümnaq khan phra phong na asi sha? Ümnaq khan, asii pinthum asi sha? Ümniiraq shamtlaü khan awang chang nai ningkun aheng jaqshamti asi sha?

¹² Ümniiraq ümjaq jaqtsi nü ka tliisaq tlii laü, kiimaq hiq raq naijaqtinok jokbaiqto.

¹³ Ümkiq kham bomtsi tsapkapkap thülaü, ümniiraq atiichhii haü mungmaiqse ümniiraq shea wan laü; ümningkun maq tsangshiq ka ümmungtan asii mung na tsuq wan laü.

¹⁴ Maiq mung thun raq taito, raüta haisitsi ma tiikhaito; Philistainnok ka phiip riishe tsai wanto.

¹⁵ Edom mung welabi phiipjiip wanto; Mob mung nola jongbi atiikhai riitlo; Kanan mungti tsangshiq tsaiji tiidoqto.

¹⁶ Aphiip ajiip kiinyii wanto. Tsangshiq raq ümningkun jong chhito, Tatiwe lei, raüta haisitsi ma tsaihü jihü ngatlo ümsenginok milea wan shaq wiiwii, ümniiraq dikong wa adokda wan nok kra.

¹⁷ Ümniiraq tsangshiq ka tsuq wanlaü, laüta üm pum thaq na tsangshiq ka shong laü, hiq bashi ümniiraq, Tatiwe lei, üm jam miitu tsea laü, Shomjam ümjaq maq hai laü.

¹⁸ Tatiwe lei, ümniika pattup pat-sa hokham mija haü.”

Miriam Shito

¹⁹ Israilnok ka khamjong chum mong phii shinriiqriiq lam maq wawanto. Shatmaq Ejip mungti kumrang leng thun kumrang kong nong maq nai leng na chaoti thun ka khamjong chum lam maq wato, shatmaq Tatiwe raq khamjong chum kham tso ka atiijang riibaiqto. Raüta tsangshiq ka tiithap baiqto.

²⁰ Shammi nyung Miriam, Aron shea-nyung raq jaqsinpin kra tsunhit riito. Kiimaq jechakre thun wiita apaiq jai phan, jaqsin nong thun tsii raüta wiinum neato.

²¹ Miriam raq tsangshiq ma akha shito: “Shironglaq Tatiwe ma, apaiq raq khushü jonghea rekhat tangto; apaiq raq kumrang kong nai achaoti thun khamjong chum na dobaiqto.”

Kham Ka Akhapwiq

²² Kra raütiishe Mosheq raq Israilnok ka khamjong khamshii chum kriimaq Shur kumtsaiphii rumnyangkhi wan nü niishe sheahoto. Tsangshiq ka ranaiqtsam tinkhit kra kumtsaiphii rumnyangkhi lam maq wawanto. Shatmaq kham ka ahü hummak riito.

²³ Kra miishe tsangshiq ka hiq bashi Mara ngutlaq kiijiishe saühoto. Shatmaq kiijaq kham ka akhap wiq anyang maimak riito. Kra ningkhan kra hiq ba ka Mara nguta mangto.

²⁴ Mungmaiqse raq Mosheq ma akha botto, “Naishiq raq jamlai wa minyang hai?”

²⁵ Kiimaq Mosheq raq atsan tiitsi raüta Tatiwe ma achu jaüto. Kiimaq Tatiwe raq apaiq ma pepan ashi tiichhi kuqto. Apaiq raq kra pepan ka kham mong na baiqto. Kiimaq kham ka anyang ma amai ahea she riito. Kiijaq Tatiwe raq tsangshiq ma asi wan miitu tri raütu kuqto. Kiimaq kiijaq apaiq raq tsangshiq ka maitaito.

²⁶ Apaiq raq nguto, “Namshiq raq ibom ka kunli phaqchii nichii maq tai hanla, lanta Ngi raq jamlaiwa riikhaqli nguta thapthi tiikang kra klo hanla, kiimaq Ngi raq akuqha aming thun ka wiita lang hanla, Ngi raq namshiq ma mo ka tiiho mang mirha, Ejip mung khuthaq na thadong tiisaü kaü thun ka, namshiq khuthaq na ashi ra dongdii min tiisaü mang mirha. Ngi ka Tatiwe, namshiq thatsi tiiheaketi.”

²⁷ Kriimaq anap ranaiq miishe tsangshiq ka Elim hiq niishe saühoto. Kiijaq tsiimse raisetiim roqshi ri anai asi riito. Kiimaq palm chong ka chong roq miishi riito. Kiijaq tsangshiq ka tsiimse raikii na piitiip teito.