DUNGWVNC 14 - ASII LAKDAP Bible (BSI)

Tsangshiq Ka Khamjong Khamshii Chum Nü Na Jang Wanto.

¹ Kiijiishe Tatiwe raq Mosheq ma nguto,

² “Israilnok ma jai nü na jang ronglaq. Lanta Migdol chela nai Khamjong Khamshii Chum liipan na Baal Jephron chela tho na Pi Hahiroth chela kiijaq piitiip tei wan ronglaq nguta chonglaq.

³ Hokhamwe raq Israilnok ka kra wang na lam min hummak mangmii raitlo. Kiimaq kumtsaiphii rumnyangkhi wang na tiitaü rai hoto nguta mitiima.

⁴ Ngi raq apaiq ka wanshak shak mitiitsin baiqha. Kiimaq apaiq raq namshiq ka mijoho. Kiimaq Ngi raq hokhamwe nai asengi phen phung khat lata mitangha. Kra lümaq ikhushü ka mitiijong. Kiijiishetiq Ejip mungti raq Ngi ka Tatiwe ngutiishe misap wan.” Tsangshiq ma chongkuqtaq kra phan phan Israilnok raq kloto.

Israilnok Ka Ejip Mungti Rai Atiithum Riihumto Ejip Mungti Raq Israilnok Jowanto

⁵ Riita Ejip mung hokhamwe ma Israilnok ka laü wanto she nguta chongkiita, apaiq nai asengi ajong alabi raq tsangshiq tsantsii ka aklai she riinongto. Raüta tsangshiq liipan na akha riingoto, “Nashiq raq ara jamlai wa riikai? Nashiq raq Israilnok ka tiijubaiqkai she. Kiimaq tsangshiq ka nashiq dikong wa sumphaq kai she ahata!”

⁶ Kiimaq hokhamwe raq arekhat chang kumrang leng ka tiijeto kiimaq aphenlabi kra rechap miitu tiijeto.

⁷ Apaiq ka akumrang leng thun kra sheaho raüta, rekhatti pinthum ahea kumrang leng shitrok kra nong nong maq, aphenlabi ma tiishea raüta kihoto.

⁸ Tatiwe raq hokhamwe ka wanshak shak tiija baiqto. Kiimaq apaiq raq Israilnok ka johoto, Israilnok ka tang wan tlii laü wanto.

⁹ Ejip mung phenlabi ka, kumrang kong wiita maq, kumrang leng thun, kiimaq kumrang leng jiiqtibi thun nongnong maq, Israilnok ka johoto. Raüta Israilnok ka Khamjong Khamshii chum tho na Pi Hahiroth chela nai Baal Jephon chela tho na piitiip tei raüta sitlaq kriiwa lohoto.

Israilnok Ka Ejip Mungti Phenlabi Ma Kai Phiipto

¹⁰ Kiimaq Israilnok raq Ejip mung hokhamwe nai asengi phenlabi phong ka tsangshiq khat kai akai rai kra chhito. Kra chhi raüta tsangshiq ka phiipraq tsaito. Kiimaq tsangshiq ka Tatiwe ma aho anyi khrum kuqlaq nguta hoq trangto.

¹¹ Kiimaq tsangshiq raq Mosheq ma nguto, “Riita Ejip mung na maiq maa lap chang hiq ahü sha? Ümniiraq naishiq ka ara kumtsaiphii rumnyangkhi arjaq mitsailaq ngutiisha sheaho laü? Liilaq, ümniiraq naishiq ka Ejip mungwa tsuqho laüta jamlai wa riilaü kra!

¹² Naishiq raq mikihohai shaq niiphü akha mirhumjo nguta ümniima chongmai sha riikai? Naishiq raq ümniima naishiq ka naq paq laqkiq li nguta chongmai sha riikai. Kiimaq ümniima Ejip mung na tsangshiq dikong ma jalaitli si rong i nguta chongkai ihata. Maiqdikong ma jalaita kiijii li siriiwe ka ara kumtsaiphii na jiim rai nam ma ahea lin.”

¹³ Kiijiishe Mosheq raq treto, “Naqhai rongkiq! Namhok ni kli tiipha ronglaq. Kiimaq ümchaü ranaiq namshiq tiichhiike miitu Tatiwe raq jamlai wa klotlaq kriili liironglaq. Namshiq ara Ejip mungti ara jai na ümtiikiimin chhinong man she mirhan.

¹⁴ Tatiwe raq namshiq rii na re mikhat, kiimaq namshiq raq sham chang jam min ahü.”

Shiikeawe Raq Israilnok Ma Naqhai Rongkiq Nguto

¹⁵ Kiijiishe Tatiwe raq Mosheq ma nguto, “Ümniika khrum jaüli jam nguto hoq rai tlaü? Mungmaiqse ka sinkhu na warong laq nguta thaülaq.

¹⁶ Laüta ümnyeakii ka ra na dolaq. Kiimaq khamjong chum khuthaq kiina tiinyi laüta doshat maq shamlaq. Raüla khamjong chum ka mannai ma mitiipheaki. Kiimaq khamjong chum phii ka shinriiqriiq mishinki. Kra shinriiqriiq khamhü phii lam kriimaq Israilnok ka aheawiq miwa wan.

¹⁷ Ngi raq Ejip mungti tsantsii ka wanshak shak mitii tsin baiqha. Krai mren tsangshiq ka Israilnok jai ka mijo wan. Kiimaq Ngi raq hokhamwe nai asengi phenlabi, akumrang leng thun, kiimaq akumrang leng jiiqtibi thun kra mikhat ha, lata mitangha. Lata ikhushü mitiijongha.

¹⁸ Riita ümtiikiiwa Ngi raq tsangshiq ka khat lata mitangha, kiitiikaq Ejip mungti raq Ngi ardea Tatiwe nguta misap.”

¹⁹ Kiimaq Shiikeawe rase Israilnok phenlabi kong khaki na watlaq kriika, kiho raüta Israilnok jai nü niishe tiijakito. Kiimaq phum kham chong kriimin tiisot ho raüta,

²⁰ Israilnok nai Ejipnok heawea niishe tiijakito. Kra phumkham chong raq Ejipnok miitu ra ka atiinyaq riibaiqto. Shatmaq Israilnok miika wa tiinii kuqto. Krai mren noknai ri wa phenlabi ka nokshi riimin nokshi tho na walot mak she, rawa minru shangbaiqto.

Israilnok Raq Khamjong Chum Ka Shinriiqriiq Jinwanto

²¹ Mosheq raq ajaq ka khamjong chum khuthaq tiithi kiijaq tiinyi raüta shamshat riito. Kiimaq Tatiwe raq khamjong chum wa kham ka rahai shedong nü wa henghea tiisaü raüta tsuq baiqto. Rahai ka rawa minru tingkhit haito. Raüta khamjong chum wa kham ka siimko nai ri na tsuqbaiqto. Raüta ahea wea na lam ikha shinriiqriiq lam ka tan kuqto. Kham ka atiikho riibaiqto.

²² Kiimaq Israilnok ka khamjong chum khü shinriiqriiq hea kriimaq laü wanto. Kiimaq siimhap ri niika kham ka khetuk kaü wiinai ikha chap kito.

²³ Kiimaq Ejip mungti raq Israilnok ka jowanto. Tsangshiq raq khamjong chum mong na lam kra phan phan tsangshiq kumrang kong thun, kumrang leng thun, kiimaq leng jiiqtibi thun nong nong maq jowanto.

²⁴ Ranap rawiiho nini niishe Tatiwe raq watu khamchong kaü nai phum khamchong kaü mong maq Ejip mungti phenlabi kra hiq nü na ku raüta liito. Raüta tsangshiq ka phiip ajiip miishe tiitsaito.

²⁵ Apaiq raq tsangshiq kumrang leng thun jikom ka hiq niishe tiikan baiqto. Kra ningkhan tsangshiq ka la maq ngila nguraü shetiq khumtlo. Kiijiishe Ejip mungti raq nguto, “Tatiwe raq Israilnok miitu nashiqnok she khat wanto. Nashiq ka arwa jaqlo pintlo rong i!”

Tatiwe Raq Ejip Mung Phenlabi Tiisii Rai Tsatbaiqto

²⁶ Kiijiishe Tatiwe raq Mosheq ma nguto, “Ümjaq ka khamjong chum nü kiina tiinyi laüta tiinyishatmaq ra nü na dolaq. Raülaq kham ka Ejip mungti khuthaq na kiimaq tsangshiq kumrang leng thaq na kiimaq leng thun jiiqtibi khuthaq niishe mima wan.”

²⁷ Krai mren Mosheq raq ajaq ka ra na do raüta khamjong chum nü kiina tiinyi raüta doshat maq shamto. Kiimaq ranap rawüho niishe kham tso thun ka maiqmii kaichang jükhü kiiniishe jang wan nongto. Kiimaq Ejip mungti ka aju riilai nguta shiikutto. Shatmaq Tatiwe raq tsangshiq ka khamjong chum mong niishe tiithap baiqto.

²⁸ Khamtso wiinai ka siimko nai wiita wa jang wanto. Raüta kumrang leng thun, leng jiiqti thun, kiimaq Ejipnok phenlabi thun Israilnok jai jowanti thun ka khamjong chum mong na tiithap baiqto. Tsangshiq ka weshi ra min tiichong mak jiimto.

²⁹ Shatmaq Israilnok ka khamjong jükhü shinriiqriiq lam maq wawanto. Kiimaq tsangshiq walam siimhap ri niika khamtso khechong maq atuk baiq ikha riito.

³⁰ Kra ranaiq Tatiwe raq Israilnok mungmaiqse ka Ejip mungti jaq khon mongwa tiichhii kuqto. Kiimaq Israilnok raq Ejip mungti maa phong ka khamjong chum kii na küram liira riiphongtlaq kra chhito.

³¹ Kiimaq Israilnok raq Tatiwe raq ningkun henghea maq Ejip mungti ka khat raüta tangtaq kra chhi raüta, tsangshiq ka khakii huhu maq Tatiwe ka shrengto. Kiimaq tsangshiq raq Tatiwe ma kamto kiimaq apaiq jaq shi se Mosheq ma kamto.