AJONJÜ 2 - ASII LAKDAP Bible (BSI)

Tatiwe Raq Jerusalem Shiithento

¹ Tatiwe raq atsankhiqtsi ma Jajon ka, ranyaq maq khup baiqto, apaiq thaq wa ramungtan khushü chhainyii, ashthen riibaiqto. Apaiq tsankhiq ranaiq apaiq raq, Shomjam kiimin tiishaübaiqto.

² Tatiwe raq Juda mung wa, maiqhiq shong kunkun shiithenbaiqto. Kiimaq kra mung wa rewa tochang chela tro ruk thun, wiita robbaiqto. Apaiq raq kra mungtan thaq na, nai hokhambi khuthaq na, thoda maq phongto.

³ Atsankhiq tsi ma Israilnok ningkun wiita, tiibun baiqto. Re raq naishiq khatwan kiita, Apaiq raq ajaq tiitam wanto. Atsankhiq wa naishiq thaq na, wakchaq walü wa ikha chaqto.

⁴ Rewe khan apaiq liq ka naishiq thaq na neishat riito, Apaiq raq naishiq tsan ran chang nai, chochi changti thun, wiita tsatbaiqto. Naishiq raq Jerusalem na, apaiq tsankhiq kei maq chaq baiqto.

⁵ Tatiwe ka rewe ikha ja raüta, Israil mung shiithen baiqto; Apaiq raq Israil mung wa, phentiip thun nai hokham jam thun, wiita runbaiqto. Apaiq raq Juda mungti thaq na, jonjü thaq na jonjü tiitsuq kuqto.

⁶ Apaiq shomnoq chang Jam, bunlak buncha tiibun baiqto. Apaiq raq asii liipan ranaiq thun, nai Asii Niitiitsak Ranaiq lang akhing, wiita tangta baiqto. Atsankhiq moho sintsang ka, Hokhamwe nai ramwebi ma, pilichhaq tiihoto.

⁷ Tatiwe raq apaiq hongluke chang, berong-wacha nai, apaiq asii Shomjam kiimin jai maq nong baiqto. Apaiq raq rewe ma atuk thun, runbaiq miitu kiinong kuqto. Man na naishiq shomnoq chochi chang Jam na, tsangshiq raq tang raüta riiriiq wanto,

⁸ Tatiwe raq Jajon ruk ka, tiithen baiq raa dongdii nguta, tiithen baiqto. Apaiq raq thiwiithi maq ruk ka tiitsiirai runbaiqto. Rewa khechang kongmong chong thun, bunlak buncha tiithen baiqto.

⁹ Chela kilü thun tiithenbaiqto, kiimaq kilü lachang jinpan min ngoqbaiqto. Hokhamwe nai shiilangbi thun, ümchaü pongmung na shumwi tiijato. Thungtri ka ümchaü shrinkuq makshe, Kiimaq shammibi ma, Tati nü wa riisham bomtsi min, saümak she.

¹⁰ Jerusalem wa nyungwere kaiqshakshak maq, hiq na ngaraqraq, tsangkhu na botkhulai tiinyat raüta, wunthaü riinaü khea riijob sam raqraq. Junriire ka tsangtok hiq na kuraqraq.

¹¹ Aho makphai raq bok raüta, imak wiita miiwanto. Itsan imongjii bunlak bun wanto, iphan imaq then wan kha na, rokngoq riingoq jonjü wan kang. Nosere nai pünyangtibi, chela lam na haü wanto.

¹² Tsangramtsi nai khamnyangtsi raq haü wan raüta, anyungtiim rit hoqtrangtlo. Tsangshiq chiihea wea lam na, asho aphi ikha küram liira riwanto. Raüta chaosusu maq, Raüta anyungtiim jaq pum na tsai wanto.

¹³ Itsan imong tsi chang Jerusalem lei, ngi raq ümniima jamlai wa michongha? Ngi raq ümniika jamkho mitiijaiq ha? Ümnaq chamchao akhiika, jumin chamchao mak dea. Ümnaq chamchao arka, sammoktra chum jong ikha jonghea, aran phan chang ahü she.

¹⁴ Ümshammibi raq ümniima, hon atsii chongke chang min ahü. Tsangshiq raq arot akiq li chongtlo. Tsangshiq traho bomtsi chong ka atuli, ümniili laoliitlo. Tsangshiq raq ümngarai ka khot chongmak dea, kriikha ümniiraq mra tiidii chang ahü riito.

¹⁵ Chela lam maq alea wanti thun raq, ümniika thophi riiqphi lea wantlo. Tsangshiq raq tokbai laqlaq raüta, Jerusalem then wantaq kra liitlo. “O, arshea man na tsomhea chela ira? Mangjong tlotli raq ra tsa ikha tsaki wantaq ira?”

¹⁶ Ümjaqtinok raq ümniika slailiisiq tlo, kiimaq ümtheaphi na liiraü raüta, thophi riiqphi tsaihai wantlo. Tsangtili ka leahihi raüta, “Naishiq raq tiithenbaiqkai! Nashiq raq ara akhing ardea khe wan kai ihata!” nguta slaisiqtlo.

¹⁷ Tatiwe raq mirha nguta, angu ka kloto she. Apaiq raq man na chongtaq krai mren, ümchaü nashiq tiihang mak, tiithen baiqtoshe. Apaiq raq nashiqnok ka, najaqtinok jaqkhon mong niishe, kiinongkuq baiqto. Raüta najaqtinok tiichochito.

¹⁸ O Jerusalem lei, ümchela ruk riimin, Tatiwe man na aho mirlaq! Ümmakphai sa ka tangwa rajun ikha, ranaiq rawa tiisa laq. Ajon ajü lam miili she tsai wan laq!

¹⁹ Waruru tiidokiki laüta, Tatiwe man na hoqsii wan laq. Laüta ümsetiim miitu, ümtsan tsii ka bunki namnam, Tatiwe jaq wa tiikhup wongkuq liidea, nguta achu jaü laq. Nosere ram raq chiiheawea lam jong na, küram liira jiim wanto!

²⁰ O, liilaq, Tatiwe lei, ümniiraq tiichamchao tlaü maiqse thun ka liilaq! Anyungre raq maiqmii chhü maq adea, asetiim maa kriishe paqtlo. Ramwebi nai shammibi thun ka, Shomjam mong maq jiipbaiq wantlo!

²¹ Nyungwere nai nosere thun wiita, chiihea wea lam na jiipbaiq wanto, re raq jetu jerobi min wiita tsatbaiqto. Ümniiraq mangchan tiichikuq maü maq, ümtsankhiq walü ranaiq, tsangshiq jiipbaiq wan laü.

²² Ümniiraq ijaqtinok ka heawan laüta, tsangshiq ngi tro na nga raüta, phiiptsi jiiptsi chiqdong redong she, tiiwiinum siq wan laü. Krai mren ümtsankhiq walüwa, tiichhikuq laü matdong ranaiq, jumin tiichhii lot mak riito. Ngi raq mangchan lata atiichhanchhi wan wa, isetiim wiita tsangshiq raq tsatbaiqto.