Adlezenn 4 - Bibl Koad 21: Ar Bibl e Brezhoneg evit ar Vretoned

Pennad 4 Sentiñ ouzh an AOTROU. Kêrioù-repuiñ

¹ Bremañ Israel, selaou ar reolennoù hag ar barnedigezhioù a gelennan deoc'h evit ober diouto, evit ma vevot ha ma'z eot da berc'hennañ ar vro a ro deoc'h an AOTROU, Doue ho tadoù.

² Ne lakaiot netra ouzhpenn er c'homzoù a gemennan deoc'h ha ne lammot netra diouto, met mirout a reot gourc'hemennoù an AOTROU ho Toue a gemennan deoc'h.

³ Ho taoulagad o deus gwelet ar pezh en deus graet an AOTROU en afer Baal-Peor; an AOTROU da Zoue en deus distrujet eus ho touez pep den hag a oa aet war-lerc'h Baal-Peor.

⁴ Met c'hwi, ar re a zo en em staget ouzh an AOTROU ho Toue, c'hwi holl a zo bev hiziv.

⁵ Setu, kelennet em eus deoc'h ar reolennoù hag ar barnedigezhioù, evel m'en deus gourc'hemennet din an AOTROU va Doue, evit ma reot diouto e-kreiz ar vro ma'z eot e-barzh d'he ferc'hennañ.

⁶ O mirit ha grit diouto, rak eno e vo ho furnez hag ho skiant dirak daoulagad ar pobloù, a lavaro o klevout an holl reolennoù-se: Ar vroad vras-mañ eo ar bobl hepken a zo fur ha skiantek!

⁷ Rak pehini eo ar vroad vras he defe he doueoù tost outi evel an AOTROU hon Doue bep gwech ma c'halvomp anezhañ?

⁸ Ha pehini eo ar vroad vras he defe reolennoù ha barnedigezhioù reizh evel an holl lezennoù-se a lakaan hiziv dirazoc'h?

⁹ Koulskoude, en em ziwall ha taol evezh gant pled ouzh da ene, gant aon n'ankounac'hafes an traoù o deus gwelet da zaoulagad, ha gant aon na'z afent er-maez eus da galon deiz ebet eus da vuhez. O c'helenn a ri da'z mibien ha da'z mibien-vihan.

¹⁰ Az pez soñj eus an deiz ma en em zalc'hjout dirak an AOTROU da Zoue en Horeb, pa lavaras an AOTROU din: Dastum din ar bobl, hag e rin dezho klevout va c'homzoù evit ma teskint doujañ ac'hanon e-pad an holl zeizioù ma vevint war an douar hag evit ma henn kelennint d'o mibien.

¹¹ Tostaet oc'h d'en em zerc'hel e traoñ ar menez. Ar menez a zeve gant tantezioù betek kreiz an neñv, hag e oa teñvalijenn, koumoul ha dic'houloù.

¹² An AOTROU a gomzas a-greiz an tan; klevet hoc'h eus ur vouezh a gomze hep gwelout skeudenn ebet, klevet hoc'h eus ur vouezh hepken.

¹³ Hag e roas da glevout e emglev, a c'hourc'hemennas deoc'h da virout: an dek gourc'hemenn. Hag e skrivas anezho war ziv daolenn vaen.

¹⁴ En amzer-se an AOTROU a c'hourc'hemennas din kelenn deoc'h reolennoù ha barnedigezhioù, evit ma reot diouto e-kreiz ar vro ma'z eot e-barzh d'he ferc'hennañ.

¹⁵ Taolit evezh gant pled ouzh hoc'h eneoù, peogwir n'hoc'h eus gwelet skeudenn ebet e deiz ma komzas an AOTROU ouzhoc'h en Horeb a-greiz an tan,

¹⁶ gant aon n'en em vreinfec'h en ur ober ur skeudenn gizellet, ur skeudenn eus un idol bennak, an taolennadur eus ur par pe ur barez,

¹⁷ an taolennadur eus ul loen bennak a vefe war an douar, an taolennadur eus ul labous askellek a nij en oabl,

¹⁸ un taolennadur eus ar re a ruz war an douar, an taolennadur eus ur pesk a zo en doureier dindan an douar.

¹⁹ gant aon ivez penaos o sevel ho taoulagad war-zu an neñv hag o welout an heol, al loar, ar stered, holl arme an neñv, na vefes bountet da stouiñ dirazo ha da servijañ an traoù-se, a zo bet lodet gant an AOTROU da Zoue d'an holl bobloù a zo dindan an neñvoù.

²⁰ An AOTROU en deus ho lakaet da vont kuit eus forn houarn an Ejipt, evit bezañ dezhañ pobl e hêrezh, ar pezh ez oc'h hiziv.

²¹ An AOTROU a fuloras a-enep din en abeg deoc'h hag a douas na dremenjen ket ar Jordan ha n'ajen ket er vro vat a ro dit an AOTROU da Zoue evel hêrezh.

²² Emaon o vont da vervel er vro-mañ, ne dremenin ket ar Jordan, met c'hwi a dremeno hag a berc'henno ar vro vat-se.

²³ Taolit evezh gant aon na ankounac'hafec'h an emglev en deus graet an AOTROU ho Toue ganeoc'h ha na rafec'h ur skeudenn gizellet pe un taolennadur eus un dra bennak, ar pezh en deus difennet ouzhit an AOTROU da Zoue.

²⁴ Rak an AOTROU da Zoue a zo un tan loskus, un Doue gwarizius.

²⁵ Pa ez po mibien ha mibien-vihan, ha pa ho po chomet pell er vro, mar en em vreinit en ur ober ur skeudenn gizellet pe un taolennadur bennak, oc'h ober an droug dirak daoulagad an AOTROU da Zoue evit e fuloriñ,

²⁶ e kemeran an neñvoù hag an douar da dest en hoc'h enep, penaos e viot distrujet buan a-ziwar c'horre ar vro emaoc'h o vont da berc'hennañ en tu all d'ar Jordan, ne hiraiot ket ho teizioù eno, met mont a reot prim da goll.

²⁷ An AOTROU a stlabezo ac'hanoc'h e-touez ar broadoù, ha ne vanot nemet un niver bihan e-touez ar pobloù e-lec'h ma kaso an AOTROU ac’hanoc’h.

²⁸ Hag e servijot eno doueoù graet gant daouarn an den, koad pe maen, na welont ket, na glevont ket, na zebront ket, na c'hweshaont ket.

²⁹ Mar klaskez ac'hane an AOTROU da Zoue, e kavi anezhañ, pa en klaski eus da holl galon hag eus da holl ene.

³⁰ Pa vi er glac'har ha ma vo erruet an holl draoù-se ganit, neuze, en deizioù war-lerc'h, e tistroi d'an AOTROU da Zoue hag e senti ouzh e vouezh,

³¹ rak an AOTROU da Zoue a zo un Doue trugarezus, na'z tilezo ket ha na'z tistrujo ket, na n'ankounac’haio ket emglev da dadoù, en deus touet dezho.

³² Goulenn digant an deizioù tremenet a zo bet a-raok dit, adalek an deiz ma krouas Doue an den war an douar, hag adalek penn an neñvoù betek dibenn an neñvoù, hag-eñ ez eus bet un dra ken bras, hag-eñ ez eus bet klevet un dra heñvel?

³³ Hag-eñ ez eus bet ur bobl o klevout mouezh Doue o komz a-greiz an tan evel ma ec'h eus klevet, hag a vefe chomet bev?

³⁴ Hag-eñ ez eus esaeet un doue dont da gemer e-unan ur bobl a-greiz ur bobl all dre amprouennoù, sinoù, mirakloù ha stourmadegoù, dre un dorn kreñv hag ur vrec'h astennet, ha dre spontoù bras, evel kement en deus graet an AOTROU ho Toue en Ejipt dindan ho taoulagad?

³⁵ Diskouezet eo bet dit evit ma'c'h anavezi penaos eo Doue an AOTROU, ha n'eus hini all ebet nemetañ.

³⁶ Eus an neñvoù en deus graet dit klevout e vouezh evit da gelenn, war an douar en deus diskouezet dit e dan bras; klevet ec'h eus e gomzoù a-greiz an tan.

³⁷ Dre m'en deus karet da dadoù, en deus dibabet o lignez war o lerc'h hag en deus lakaet ac'hanout da vont kuit eus an Ejipt dirazañ e-unan dre e c'halloud bras,

³⁸ evit kas kuit a-zirazout broadoù brasoc'h ha nerzhusoc'h egedout, evit da lakaat da vont en o bro hag evit he reiñ dit da hêrezh, evel m'emañ hiziv.

³⁹ Gouez eta hiziv ha merk ez kalon penaos eo Doue an AOTROU, d'an nec'h en neñv ha d'an traoñ war an douar, ha n'eus hini all ebet nemetañ,

⁴⁰ mir e reolennoù hag e c'hourc'hemennoù a gemennan dit hiziv, evit ma vi eürus, te ha da vibien war da lerc'h, evit ma vo hiraet da zeizioù war an douar a ro dit an AOTROU da Zoue.

⁴¹ Neuze Moizez a lakaas a-du teir c'hêr en tu-mañ d'ar Jordan, d'ar sav-heol,

⁴² evit ma tec'ho enno ar muntrer en devo lazhet e nesañ diratozh, hep bezañ bet kasoni diagent, evit ma vevo en ur dec'hout da unan eus ar c'hêrioù-se,

⁴³ da c'houzout: Bezer er gouelec'h, er blaenenn, evit ar Rubeniz, Ramod e Galaad evit ar C'hadiz, Golan e Basan evit ar Vanasiz.

⁴⁴ Setu al lezenn a lakaas Moizez dirak mibien Israel.

⁴⁵ Setu an testenioù, ar reolennoù hag ar barnedigezhioù a roas Moizez da vibien Israel goude ma oant aet kuit eus an Ejipt,

⁴⁶ en tu-mañ d'ar Jordan, en draonienn, a-dal da Vet-Peor, e bro Sihon, roue an Amoreaned, a oa o chom en Hesbon hag a voe pilet gant Moizez ha gant mibien Israel goude ma oant aet kuit eus an Ejipt.

⁴⁷ Int a berc'hennas e vro ha bro Og, roue Basan, daou roue an Amoreaned a oa en tu-mañ d'ar Jordan, d'ar sav-heol,

⁴⁸ adalek Aroer war ribl froud Arnon, betek Menez Sion hag a zo an Hermon,

⁴⁹ hag an holl blaenenn en tu-mañ d'ar Jordan, d'ar sav-heol, betek mor ar blaenenn e traoñ ar Pisga.