Adlezenn 23 - Bibl Koad 21: Ar Bibl e Brezhoneg evit ar Vretoned

Pennad 23 Ar re ne c'hellont ket bezañ ezel eus ar vodadenn. Lezennoù a bep seurt

¹ Un den gant kelloù friket pe gant ar c'halc'h troc'het ned aio ket e bodadenn an AOTROU.

² Ur bastard ned aio ket e bodadenn an AOTROU, memes en dekvet rumm ned aio ket e bodadenn an AOTROU.

³ An Ammonad hag ar Voabad ned aint ket e bodadenn an AOTROU, memes en dekvet rumm ned aint ket e bodadenn an AOTROU, biken,

⁴ peogwir n'int ket deuet a-raok deoc'h war an hent, gant bara ha dour, pa zeuec'h eus an Ejipt, ha dre ma lakajont da zont evit arc'hant, a-enep dit, Balaam mab Peor eus Petor e Mezopotamia, evit da villigañ.

⁵ Met an AOTROU da Zoue ne fellas ket dezhañ selaou Balaam, hag an AOTROU da Zoue a droas evidout ar vallozh e bennozh, dre ma kar ac'hanout an AOTROU da Zoue.

⁶ Ne glaski ket o feoc'h nag o eurvad e-keit ha ma vevi, biken.

⁷ Na'z po ket euzh ouzh an Edomad, rak da vreur eo, na'z po ket euzh ouzh an Ejipsian, ra diavaeziad out bet en e vro;

⁸ ar vibien a vo ganet dezho a yelo e bodadenn an AOTROU en trede rumm.

⁹ Pa yelo da armead a-enep da enebourien, en em viri diouzh pep tra fall.

¹⁰ Ma vez unan bennak ac'hanoc'h dic'hlan en abeg d'ur gudenn e-pad an noz, e yelo er-maez eus ar c'hamp ha ne zeuio ket en-dro d'ar c'hamp;

¹¹ da fin an abardaez en em walc'ho en dour, ha pa vo kuzhet an heol e tistroio d'ar c'hamp.

¹² Ul lec'h az po er-maez eus ar c'hamp, hag eno, er-maez, ez i.

¹³ Ur benveg az po gant da draoù, ha pa fello dit mont war vaez, e toulli gantañ hag e c'holoi da fank.

¹⁴ Rak an AOTROU da Zoue a gerzh e-kreiz da gamp evit da zieubiñ hag evit reiñ da enebourien dit; ra vo da gamp eta santel, gant aon na welfe ennout un dra bennak dic'hlan ha na zistroio diouzhit.

¹⁵ Ne zaskori ket d'e vestr ur sklav a vo aet da repuiñ davedout digant e vestr.

¹⁶ Chom a raio ganit, ez touez, el lec'h a zibabo en unan eus da gêrioù, ne heskini ket anezhañ.

¹⁷ Ne vo gast ebet e-touez merc'hed Israel, ha ne vo pitaouer ebet e-touez mibien Israel.

¹⁸ Ne zegasi ket e ti an AOTROU da Zoue gopr ur c'hast na priz ur c'hi evit gouestl ebet, rak o-daou a zo un euzhusted dirak an AOTROU da Zoue.

¹⁹ Ne bresti ket da'z preur war gampi, na kampi arc'hant na kampi boued na kampi eus petra bennak a c'heller tennañ kampi gantañ.

²⁰ D'an diavaeziad e c'helli prestañ war gampi, met ne bresti ket da'z preur war gampi, evit ma vennigo ac'hanout an AOTROU da Zoue e kement labour a ri gant da zaouarn, er vro ma'z ez e-barzh d'he ferc'hennañ.

²¹ Pa ez po graet ur gouestl d'an AOTROU da Zoue, ne zalei ket d'e beurober, rak an AOTROU da Zoue ne vanko ket d'henn goulenn diganit, hag e vo ur peched ennout.

²² Pa dremeni hep ober ur gouestl, ne vo ket a bec'hed ennout.

²³ Mirout a ri ar pezh a vo deuet eus da vuzelloù hag e ri dioutañ, evel ur prof a-youl-vat, hervez ar gouestloù az po graet d'an AOTROU da Zoue hag az po lavaret gant da c’henoù.

²⁴ Pa'z i e gwinienn da nesañ, e c'helli debriñ rezin hervez da naon ha da c'hoant, met ne lakai ket dioutañ en ur baner.

²⁵ Pa'z i en edeg da nesañ, e c'helli kutuilh tañvouezennoù gant da zorn, met ne lakai ket ur falz en edeg da nesañ.