JEREMIA 3 - BUKUIT NE TILIIL Sireet ne Dutero Kanon

¹ Mwaei icheek kole, Ngot koon chii osotyonnyi, ak kobagaakta ineendet ak koek osotyotap chiito age, ko tos ta koweekyigei chiichooto kwonyooto kogeny? Tos ma imurwoni emet miising'? Ago ki iyai kugoinatet kobooto chamanik che chaang', ago tos oweekyage kogeny? Mwaei Kamuktaindet ne Toroor.

² Onyal parak ak ogeer tuloonook che churyotin. Tos mi ano komoswek che tomo oruiye tuwai? Ki igen icheek eng' ortinwek taban, ko uu Arabuindet eng' surkwen, ak ki imurwon emet eng' kugoinateng'ung' ak eng' sogornateng'ung'.

³ Kigeger anyun ropta amu nooto, si mata kobiit ropta ne po let, ago itinye togeetap chepkugoniot ak ieesyoi ililan.

⁴ Tos mechame iriircho kobooch nguno, ile, “Abba, ii kandoindetap ming'inatennyu?”

⁵ Tos nereechi ineendet agoi? Nereechi agoi kagesunet? Keero, ki ing'alaal ko uu ni, ak ki iyai tuguuk che yaacheen ak ki isup oreng'ung'.

Kuurset agobo siguunet

⁶ Kimwaiwo anyun Kamuktaindet ne Toroor eng' peetuusyegap Josiah laitoryat koleenjo: “Tos ki igeer nooto ki yai Israel, ole kigogetyigei let, ole kitogosta tulweet age tugul ne kooi ak kwo kelutap keetit age tugul ne tuon, ak koyai kugoinatet eng' olooto?”

⁷ Ki abwaat anyun ale, kingo kagoyai tuguuchuuto tugul, ko weekyinagei ineendet. Ago ma week, chepkamennyi Judah kaberberindet ko ak ki keer niito.

⁸ Ki aroo agobo ng'olyoondoniito, ye kingo kagoyai Israel ibeetapkei, kogiaoon ineendet ak agoochi parweetap peesyet, ago ma iyweis Judah chepkamennyi kaberberindet. Ago ki wo agine koyai kugoinatet.

⁹ Ee iman, ki komurwon emet eng' kugoinatennyi ne po tangoi, ko uu ye ki ipkei ak koik ak subenik.

¹⁰ Ak eng' chu tugul, ko chepkamennyi Judah kaberberindet, koma weekyagei eng' muguleldo komugul, ago eng' ng'aalseet, mwaei Kamuktaindet ne Toroor.

¹¹ Kimwaiwo Kamuktaindet ne Toroor koleenjo ki ibartagei Israel ne kigogetyigei let kole po iman kosiir Judah kaberberindet.

¹² Ui, mwachi ng'aleechu komostap murot kaataam, ileenji, weege, inyee Israel ne ki iweekyigei let, mwaei Kamuktaindet ne Toroor. Ma ageerok eng' nereegek. Amu atinye rireenet, mwaei Kamuktaindet ne Toroor, Manereechi agoi.

¹³ Ng'aany tengektong'ung' kityo; ile ki ingelelji Kamuktaindet ne Toroor Kamuktaindeng'ung' ak ki iseerchi toek ortinweguk eng' kelutap keetit age tugul ne tuon ak ma ogasa iit kutinnyu, mwaei Kamuktaindet ne Toroor.

¹⁴ Oweege, okweek lagok che motinye kayaneet, mwaei Kamuktaindet ne Toroor, Amu anee ko aa manong'otyot eng' okweek, amutu chii agenge agenge eng' nganaseet age tugul, ak piik aeng' che po ooreet agenge, ak amutak agoi Zion.

¹⁵ Agoonok mestoweek che chamei muguleldanyu, che paok eng' naet ak kaguiyet.

¹⁶ Ye tuun kaotesage ochaang'itu eng' emet, eng' peetuusyechooto, mwaei Kamuktaindet ne Toroor, koma komwaei icheek kogeny kole, “Moingetap arorutyetap Kamuktaindet ne Toroor.” Ama chutei metit, ama kobwaati icheek, ama kemage kiy; ama keyaei kogeny.

¹⁷ Eng' peetuusyechooto, ko tuun kuuree `icheek Jerusalem ng'echeretap laitornatet ne po Kamuktaindet ne Toroor, ak koyumjigei pororyosyek tugul, koyumjigei kainetap Kamuktaindet ne Toroor, eng' Jerusalem. Ama kobendote uuindap mugulelwekwak che yaacheen.

¹⁸ Eng' peetuusyechooto, ko tuun pendoti kootap Judah ak kootap Israel, tuun pwoonei tuwai komong' eng' emet ne po murot kaataam kobwa emet ne ki agoochi kwanisyekwok kobunji.

Kootei `piigap Kamuktaindet ne Toroor kanamonik

¹⁹ Ago ki ale, “Imuktoi ano andein otebi ak lagok ak agoonin emet ne karaaran, poroteet ne myee ne po lugosyegap pororyosyek? Ki abwaati ale, oguureno ‘Abba’; ama omastoi ometa.

²⁰ Ago ko uu ye pagaktoi `osotyot manong'otyondennyi eng' kaberberisyet, ko uu nooto, ki oyaiywo kaberberisyet, ee kootap Israel,” mwaei Kamuktaindet ne Toroor.

²¹ Kigasei waagaat eng' tuloonook che churyotin, riirek ak soomutigap piigap Israel; amu ki komaas ooreenywa, kigoutye Kamuktaindet ne Toroor Kamuktaindennywa.

²² Oweege, okweek lagok che ki ogetyigei let, si asoop kachuchugeng'wong' pogei. Ak owolu oleen, Kagibwonjin, amu ii Kamuktaindet ne Toroor, Kamuktaindennyo.

²³ Iman, kigeni puch toreteet ne punu tuloonook, nooto wasetapkei ne mi tuloonook. Iman eng' Kamuktaindet ne Toroor Kamuktaindennyo komi yetunetap Israel.

²⁴ Ago kiit ne po kalilanet ko kigoam poisyonigap kwanisyekyok kobooch ming'inatennyo, kobooto keechiirekwak, akwotisyekwak, weeriikwak ak tiibiikwak.

²⁵ Ongeruiye eng' kalilanennyo ak ingotuchech teweernatennyo. Amu kigeyachi tengekto Kamuktaindet ne Toroor Kamuktaindennyo, acheek ak kwanisyekyok kobooch ming'inatennyo agoi peetuuni; ak ma ki kas iit kutitap Kamuktaindet ne Toroor Kamuktaindennyo.