Biblia Todo Logo
La Biblia Online
- Anuncios -


DUNGWVNC 15 - Hawa Naga Bible 2001


Moshe Shic

1 Kvruex yimaq Moshe nuiyc Israel miqsaz rueq Yehowa muex vkhoc tvtsvmc shix wuez tueq. “Ngaz rueq Yehowa muex tvtsvmc shix vshaungx, yvmx khoc lac ngoz ruiux lec vpiq rueq taungx gay tueq; vpiq rueq mvre htenc nuiyc kvyuq ngaungc jix htenc kuex svmuktvrax nuex tvhtuip gay tueq.

2 Yehowa kuex ngvy kvwungx juing hungc vlaungc; vpiq kuex ngvy palc jix waz rvtueq. Vpiq kuex ngvy Tishox rvtueq, ngaz rueq vpiq kuex tvtsvmc shaungx, iwaz Tishox ningkhvnc nuex vpiq yungx luz yaq lvmz kuex ngaz rueq tvtsvmc shix taungx.

3 Yehowa kuex shvrvyx rvtueq; Yehowa kuex vpiq muingc rvtueq.

4 “Vpiq rueq Ejip nolaungx bix nuiyc renc htenc kuex svmuktvrax nuex tvhtuip gay tueq; vhvlx pinhtumc vyungx vlaungx bix htenc kuex Yuix Shawx Jumx nuex tuip gay tueq.

5 Svmuktvrax yuix thuiuz hvlc rueq tsuingshiq kuex luimz wvnc vtueq; tsuingshiq kuex lung ikhoc ghaq nuex suingx wvnc tueq.

6 “Yehowa lex, m-yaukkeq kox luimc vkawc kuex vkawc yawc juing rvtueq; m-yauk phumz maq ralx htenc kuex tvbunx gay toq.

7 Mnoz rueq ngauz vngax maq ralx htenc kuex tvbunx gay toq; mthuinz khvy kuex wvr ikhoc luic vtueq, tsuingshiq kuex tsvmkuiz ikhoc khamc gay tueq.

8 Mnoz rueq svmuktvrax yuix muy koq tueq, yuix daungx kuex joz tueq; khoalx tuk ikhoc jvp tueq; svmuktvrax yuix khung nuex muinz ghaq tsanz dez yaungx tueq.

9 Ralx rueq ngoc, ‘Ngaz rueq tsuingshiq kuex yurc vtueq lvp shaungx; tsuingshiq kox wawc vlvp hup svmx htenc kuex rv-phvlc vtueq, ngaz rueq vroc lvmz shaungx; ngvy yaung jvt vtueq tsuingshiq kuex lvnc shaungx.

10 Yuq muinz Yehowa mnoz rueq raungguil kuex muy gay koq tueq, yuix rueq Ejip miqsaz kuex luimz gay tueq; tsuinghez kuex yuix daungx khung nuex junx ikhoc htuip wvnc wuez vtuex.

11 “Yehowa lex, mnoz kvkhoc tishox htenc kuex ukhaq lac? Sawc hvlc vwangc juing mnoz kvkhoc ukhaq lac httax yaq nguinx? Mnoz rueq ikhoc vwangc juing nuiyc vkawc yawc juing yauk shuimc kuex uraq lac shuimx lot shuinx?

12 M-yaukkeq kox tenz koq tueq, ghaq rueq nuiyshiq ralx htenc yuk gay tueq.

13 Mbomkhvmc tvmtuing rvtueq rulc rv-ngvlc, mnoz rueq vpalc wvnc miq htenc kuex shvlx wvnc toq; Vsawc mmungtan kuex mhungc vlaungc maq mnoz rueq tsuinghez kuex shvlx toq.

14 Miq phvnx ruip rawx rueq kvruex thaungc kuex tay vtueq hiyaz kvkhuirc wuez tueq; Philistin miqsaz kuex kawc yawc wuez tueq.

15 Edom mungx wawc walaungx bix kuex kvkhuirc hisungx wuez tueq; Moba mungx wawc hungc vlaungc vhttax jix htenc kuex kvkhuirc wuez yaq; Kanaan miqsaz kuex thuinz bac vtueq nulx wuez yaq.

16 Kvruex hez kuex tawgawz vtueq hisungx wuez yaq. O Yehowa lex, tsuingshiq rueq mhungc vlaungc kuex khiz vtueq, dax yaungx yaq wawc mnoz rueq tvdung wvnc toq, mmiqsaz htenc lvy wvnc yaq nuex tsuingshiq kuex hiyaz vtueq kuiyqshuik dvyx httax tueq.

17 Yehowa lex, mnoz rueq tsuinghez kuex gvl wvnc vtueq, mnoz httaz tvkoc thvl taq shec toq, mnoz rueq Shomc Yuimx guirx toq kanx kvyuq tvhttax shuiuz.

18 Yehowa mnoz kuex hokhvmx muex pattup pat-sac yaungx tuiux.


Miriam Shic

19 Israel miqsaz kuex ghaq wulthawk htauk maq svmuktvrax kuex yanz wvnc wuez tueq. Yuq muinz Ejip miqsaz renc htenc rulc vdvmz tsuingshiq mvre htenc nuiyc vruip jix htenc kuex svmuktvrax nuex kaz wvnc koq tueq, Yehowa rueq yuix kuex tvyek vtueq, yuix rueq tsuingshiq kuex luimz wvnc tueq.

20 Arun shvlx nyuiuz shvmmax Miriam rueq nungx kuex shuimx vtueq tuimz tueq, yalxjuik rulx lotlaz rueq piq yix nuex phvnx vtueq nungx kuex tuimz ruiux wvnuemz wuez tueq.

21 Tsuingshiq tvkoc Miriam shix tueq kuex, “Yehowa muex tvtsvmc shix wuez shuinz, yvmx khoc lac ngoz ruiux lec vpiq ngauz vngax maq taungx wvnc tueq; vpiq rueq mvre htenc nuiyc kvyuq ngaungc jix htenc kuex svmuktvrax yuix nuex tvhtuip gay tueq,” ngoz tueq shix tueq.


Yuix Khuip Ruilx

22 Kvruex yimaq Moshe rueq Israel miqsaz kuex Svmuktvrax Yuix Shawx maq Shur ngoz yaq kumtsvy tvnx nuex shvlx wvnc tueq. Tsuinghez kuex kumtsvy tvnx nuex nuiyq thuimx khuemx wvnc tueq, yuq muinz yuix humc muq.

23 Kvruex yimaq tsuingshiq kuex Mara ngoz yaq kvyuq httuiuc waung tueq, yuq muinz kvwawc yuix vkhuip rvtueq tsuingshiq rueq nuingx lot muq. Yuix khuip dung yaq rvkoq tueq kvruex hong kuex Mara ngoz tueq muingc tueq.

24 Miq htenc rueq Moshe muex ngoc, “Nuiyshiq rueq yvmx lac nuingx vshix,” ngoz tueq kvbot wuez tueq.

25 Moshe rueq Yehowa kox wawc daungdaungx vjux thoz koq tueq, Yehowa rueq piq muex pulx htaq vshiz tvkhic kuq tueq, piq rueq pulx htaq kvruex yuix nuex tuip koq tueq, yuix khuip kuex yuix ruimx muex yaungx kaz tueq. Yehowa rueq kvruex hong kvmaq, tsuingshiq rueq phvnc tvkoc tvrac htenc kuex kuq tueq, vpiq rueq tsuingshiq kuex taruiyx lawc tueq.

26 Vpiq rueq, “Mkhoc shoc maq nuimshiq rueq ngaz rueq nvr shaungx htenc nuiyc ngvy tvrac kuex tvkhvlc muit maq phvnx ruiux yuq, ngaz rueq Ejip miqsaz htauk nuex tvhttuiuc kuq tauk thuimkux kuex nuimshiq htauk nuex tvhttuiuc mauk rvshaungx. Ngaz kuex nuimshiq tvhvlc jix Yehowa rvtauk,” ngoz tueq jungx tueq.

27 Kvruex yimaq tsuingshiq kuex yuix saz ruilx rokshiz rac vnueyc dung yaq nuiyc pam pulx jungx rok mvshix httax yaq, Elim hong nuex httuiuc waung tueq; tsuingshiq kuex yuix hep nuex jerak tec wuez tueq.

Hawa Naga Bible © Bible Society of Myanmar, 2014.

Bible Society of Myanmar
Síguenos en:



Anuncios


¡Síguenos en WhatsApp! Síguenos