Provérbios 21 - Kaxinawá Bíblia (BR)

¹ Haska shanẽ ibuhairatũ shinãkĩ atirurã, Senhor Deusũ kushipawẽ haska betxipaiai amamiski, hawẽ shinã hene bai tapia keska washũkinã.

² Hunibũ hawara watã shinãkĩ; “Dasibi ẽ pe washuki”, iwanã, yuibiakubainaibũ hakia hatũ shinã uke merã Senhor Deusũ uĩkĩ hatu unãti wamiski.

³ Hiwei pekaĩkĩ Deusũ yunuti kushipa inũ dasibi haska betxipaiai tibi tsuãra hawẽ yunua ashuainã, daewakĩ inabu kuashũmisbu binuhairamiski.

⁴ Hati txakabuhaira Senhor Deusũ danãmiski: ibubis kẽmisbu inũ, haska dasibi hawẽ shinanẽ unã keyuaikiri txanibaunaibu inũ, kanekĩ txakabu tibi akubaini hiwemisburã.

⁵ Hawara akatsi bebũkiri shinã pewakubaĩkĩ yubakatã akaiburã, pekaĩkũkaĩmiski. Hakia hawara akatsi bebũkiri shinã pewariama yubakatã anikapai nuitapakubaĩmisbuki.

⁶ Parananaĩ txanitxakabetanã mabu inũ pei itxapa itxawakubaini hawẽ hiwemisburã, kuĩ puabaini hawaira yamabaĩmis keskai hatũ mawa benamisbuki.

⁷ Hawara yunuti kushipa pepa txibaĩ hiwei pekatsi ikamawẽ taeshũ huni txakabu mẽtsisipakĩ hatũ kushipawẽ hamapai txakabu betsa betsapa atimapa wai ibubis yamai keyushãkanikiki.

⁸ Haska huni txakabubũ shinaĩ hiwemisburã, hawa mestẽma hawẽ bai kayatapiamaki. Hamẽ haska huni pepabu hiwekĩ hatu uĩmamisburã, hawa txakabu hakiri hãtxaisbuma pepabu bestiki.

⁹ Hiwe ewapa hawẽrua anu hiweshũ aĩbũ hawẽ bene ha a txakayamakĩ hiwe txakamamisrã, haska hiwea pemaki. Hamẽ ha binumai huni betsã hiwe manaũri tsuara deshũ betsa ewapama anu ha mesti haskanu hiwea peki.

¹⁰ Tsuãra hatu txakabuwanũ, iwanã, huni txakabubũ shinãkubaĩmisbuki, ha dikabi ha dapi hiweabu hatu uĩbiakĩ ana hatu duawatikiri shinã pewamarã.

¹¹ Ẽhẽ iki yura betsabuki kashemisbu hatu kupiaibũ habũ bebũkiri pe shinaĩsmatũ uĩkĩ hatuwẽ hawenakiri tapĩkubaĩtirubuki. Hakia tsuara yusinanaĩ unanepabũ nĩka bestitã tapĩmisbuki.

¹² Deus pepatũ huni txakabubu inũ hawenabu hatu uĩkubaĩmiski. Hanushũ ha huni txakabubu hatu kupikinã, hatu nuitapawamiski, ana hawa pepa hayama hatu wakinã.

¹³ Tsuara nuitapakĩ hatu ea abiabu hawa merabewakĩ hatu uĩmaismarã, txipu habiaskariai merabe yuka iki ea iriaya ha manakukĩ tsuã hari hawa inãma ishanikiki.

¹⁴ Tsuara sinata txakayamabiaya ha haki sinataitũ hune hawara inãkuĩkĩ ha sinatahairai daewatiruki.

¹⁵ Shanẽ ibubũ yunuti kushipa pepawẽ yunukubainaibũ huni pepabu benimamisbuki. Hakia shanẽ ibubũ hãtxa nĩkama hunibu atimapakubaĩkĩ hatũ mabu benukĩ keyumisbuki.

¹⁶ Bebũkiri shinã pewai hiwebiakũkainima haska henetã ana txibãmarã, hanu mawabu bumisbu anu hari kashanikiki.

¹⁷ Benimaiwẽ kemu bestinũ ishũ vinho hawẽ paẽti inũ, sheni ininipa inũ, besiti tibi betxipaikĩ kemukĩ beya wairã, hawauma nuitapai keyushãkanikiki.

¹⁸ Huni pepa parananaĩsbumã hatũ shãtukũ huni txakabu txanitxakamisbu yumãkubaĩshãkanikiki.

¹⁹ Hawẽ aĩ hawaira sinatai ha itxakayamakũkaĩmisbe habe hiwearã, bikaki. Haska binuirã, hari tsua hiweabuma anu ana bikama hiwekũkaini haska peki.

²⁰ Huni unanepatũ hawẽ hiwetã piti inũ sheni inĩti inũ mabu pepa sharabu itxawatã unãshubira me pewakubaina hawẽ mabu hawaira keyutirumaki. Hakia huni unaĩsmapatũ hawẽ hiwetã piti inũ mabu pepa itxawabiatã meke pewama hawaira puta puta amisbuki.

²¹ Tsuara hiwei pekaini ana txakabukatsi ikama pepa bestikĩ hatu uĩmaiwẽ taea hakiri hãtxa peaibu nĩkai haska hiwea betxipaimis hayashanikiki.

²² Maewã anu shanẽ ibu detenamenika kushipabu itxapa hayabiakẽ unanepabũ hatu maematirubuki, hatũ mae mishki kushipawẽ kenebaunibu haki txiti ibiabũ hatu berãkĩ keyũkinã.

²³ Tsuara hari shinaĩ hãtxakatsi bebũkiri shinã pewatã hawẽ hãtxa pe kaĩmamisrã, hamapai txakabuwaismawẽ taea hakiri shinã txakatirubumaki.

²⁴ Hawẽ unanepa inũ hawẽ tapinika hãtxawẽ keĩ betsabuki kashekĩ hatu kenamamisburã, “Ha huni hamẽ uĩbaĩ yui txitenamei hãtxa bestimiski”, akĩ yuimisbuki.

^25-26 Txikishbu shaba betsatiã dasibi hawarawẽ kemui betxipai hayakatsis ibiai daya shinãkĩ betxipaisbumaki. Hakia tsuara pepa txikishmatũ huni betsa nuitapaibuwẽ nuikĩ hawẽ hawara hatu inãkubaĩmiski, yaushiamarã.

²⁷ Huni txakabubũ shinã txakabiakĩ Senhor Deus daewanũ, iwanã, inabu sheni hatu kuamakĩ ha huni txakabubũ inãbiabu Senhor Deusũ hatu danãkĩ betxipaismaki.

²⁸ Huni txakabubũ hawara uiãma inũ uĩbiai txani besti unaĩbu hatũ dakewẽ taea mawashãkanikiki. Hakia hawara nĩka pewatã unaĩbu unãti wanikabũ hatu yukabu shabakabi hatu kematirubuki.

²⁹ Huni txakabubu datebiai bemakis mestẽ pe itsai mapumisbuki. Hakia huni pepabu hawa shinã txakabuwaismawẽ taea dateama hiwekubaĩmisbuki.

³⁰ Unanepa inũ, tapinika hãtxa inũ, yubakai penikã habũ Senhor Deus yuibiakĩ binukĩ maematirubumaki.

³¹ Hawẽ detenameti pewakĩ hunibũ hatũ cavalo bebũkiri tapĩmakĩ unãmamisbuki. Hakia detenameaibu kushipa wakĩ Senhor Deusũ hatu merabewakĩ binumamiski.