Êxodo 20 - Kaxinawá Bíblia (BR)

Deusũ nemati inũ hawẽ yunuti mekẽ dabeti hatu inãnikiaki, na hãtxarã

¹ Hanushũ dasibitũ hau nĩkanũbũ Deus hãtxakĩ eska hãtxa hatu yuikĩ:

² “Earã, ẽ matũ mekenika Senhor Deuski. Habũ Egito anushũ matũ shenipabu tsuma wakĩ escravo wanishũ dayama txakayamakĩ bika hatu tenemaibu haria eã ẽ matu iweimaki.

³ Haskakẽ hamapai yushĩ betsa betsapa duawakĩ kẽwãyamakubaĩshãkãwẽ, ea besti ẽ matũ Senhor Deuskirã.

⁴ “Ha inũ, betsarã, hawara hawẽ kẽwãti dami wakĩ yushĩ itsa wayamakubaĩshãkãwẽ, nai anu hiweabu inũ, mai anu hiweabu inũ, hawara hene merã hiweaburã.

⁵ Ha yushĩ betsa betsapa dami tibi anurã, ha bebũ dãti ishũ duawakĩ kẽwãyamakubaĩshãkãwẽ. Matũ mekenika Senhor Deusrã, ẽ eaki, tsuabura enabu washũ hatu mekei ẽ hatu yaushimisrã. Habũ ea danãkĩ dami betsa kẽwaĩbu hatũ ibubũ txakabuwamisbuwẽ taeshũ hatũ bakebu inũ, hatũ bababu inũ, hatũ bababũ bakebu ẽ hatu kupikubaĩshanaii.

⁶ Hakia hatũ ea betxipaikĩ ẽ yunuti hãtxa nĩkatã txibãpakeshanaiburã, habu inũ hatũ bakebu paibu hatu beshteama hatuwẽ nuikĩ ẽ hatu duahaira wanũbariaii.

⁷ Ha inũ, betsarã, earã, ẽ matũ mekenika Senhor Deusũ kenaki meseama hamẽ shabakabi yuiyamakubaĩshãkãwẽ. Hakia meseama ẽ kena hamẽ yuibaunaibu hawa hatu hakimama ẽ hatu kupishanaii.

⁸ Ha inũ, betsarã, sábado huĩrukũtitiã hakimama ea shinaĩ ha shabatiã enas ikubaĩshãkãwẽ.

⁹ Dayairã, 6 dia shaba besti hanu dasibi matũ daya akubaĩshãkãwẽ.

^10-11 Eanã, nai inũ, mai inũ, hene inũ, hanu hiwea akeakeabu 6 shaba dayakĩ ẽ hatu damiwaniki. Hakia hanu huĩrukũti wakĩ sétimo shaba meribi wakĩ hanu ea kẽwãti shaba pewakĩ ẽ meribi waniwẽ taeshũ semana tibi 6 shaba ikũkainaya matũ daya dasibi akubaĩshãkãwẽ. Hakia sétimo shabarã, hanu matũ mekenika Senhor Deus, earã, hanu ea shinãti huĩrukũtitiã ipakeshanikiki. Hanu dayatimarã, matũ huni bakebu inũ, matũ aĩbu bakebu inũ, matũ huni tsumabu inũ, matũ aĩbu tsumabu inũ, matũ inabu inũ, nawa betsabu matũ mae anu hiweabu habu dayatirubumariki.

¹² Ha inũ, betsarã, matũ epa inũ matũ ewa duawakubaĩshãkãwẽ. Mã haska waibũ ha mai pakea anu iyushũ ẽ matu ibuwamashanai anushũ matu inũ matunabu pakubainaibu bari itxapa inãkĩ ẽ hatu duawakĩ pe hiwemapakeshanaii.

¹³ Ha inũ, betsarã, e iskaũ sinatakĩ tsua tenãyamakubaĩshãkãwẽ.

¹⁴ Ha inũ, betsarã, kemui aĩyã inũ beneyabia betsabe txutanameyamashãkãwẽ.

¹⁵ Ha inũ, betsarã, yura betsabũ hamapai tibi biaĩ yumetsutaskayamashãkãwẽ.

¹⁶ Ha inũ, betsarã, yura betsa haskamabiakẽ hamẽmẽs hakiri txanitxakakĩ nuitapawayamashãkãwẽ.

¹⁷ Ha inũ, betsarã, yura betsã mae anu hawara haya uĩ hawẽ kemutaskayamashãkãwẽ, hawẽ hiwe inũ, hawẽ aĩ inũ, hawẽ huni tsuma dayaru inũ, hawẽ aĩbu tsuma dayaru inũ, hawẽ inabu inũ, hawẽ hamapai tibi haya uĩ hawẽ kemuamarã”, akĩ Senhor Deusũ hawẽ hãtxa hatu yuia

Israelbu Deuski datenibukiaki, na hãtxarã

¹⁸ kana bakatã tĩ ikaĩkaini inũ, txashuwã mashũ puri ati txã akĩ txaipa wai inũ, txi kuĩ meshu mayai dasibibũ nĩkakĩ uĩ datei saki saki iki Israelĩ enabu txishtekiri sheketã benãta mapushũ

¹⁹ dasibibũ dateyabi Moisés yuikĩ: —Miã besti nuku hãtxa wawe, nũ mia nĩkakubainunã, hau Deusũ nuku ana hãtxa wayamanunã. Nuku ana hãtxa waya nũ mawatirubuki— akabu

²⁰ hatu daewakĩ Moisĩ yuikĩ: —Dateyamakãwẽ, mã mawamakirã. Deus bututã mã haki datei mesepakeshanũbũ matu unãti waikiki. Pe bestikũkaini hiwei mã ana txakabuyamashanunã— hatu wa

²¹ benãta mesteã mapuyuabũ Moisés ana mapekei nai kuĩ meshupa anu ka Deuski nukunikiaki.