Daniel 3 - Kaxinawá Bíblia (BR)

Mane ouro dami kẽwanibukiaki, na hãtxarã

¹ Hanushũ hatũ shanẽ ibuhaira inũ hawẽ mekenika yushibubukiri dasibibu hatu shinãmati dami wakĩ hawẽ keyatapa 27 metro inũ hawẽ hashpa 2 metro inũ 70 centímetro mane ouro dami watã hau Babilônia mai pakekauana mapãpa hawẽ kena Dura anu hau nitxĩshanũbũ shanẽ ibuhaira Nabucodonosorĩ hatu yunua mane dami pewanikabũ nĩkatã haska hatu yunua akubaĩkĩ ma keyushunabu

² mai pakea ewapa shanẽ ibubu tibi inũ, detenamenikabũ shanẽ ibubu tibi inũ, mai pakea hatiuma província shanẽ ibubu tibi inũ, hatu merabewakĩ hatu yusĩ pewamisbu tibi inũ, shanẽ ibũ pei mekenikabu tibi inũ, unanepabu mekenãbu tibi inũ, hamapai sharabu shanẽ ibu beshmas tibibũ ha dami hatu amaima kẽwãkĩ hau shabakabi wai benũbũ Nabucodonosorĩ hawẽ tsumabu yunua hatu yuitãshinabu

³ dasibi hatu kenashina ha shanẽ ibubu beake beakeshina kẽwaĩ besinũ ika ha dami bebũ ma itxai keyuabũ

⁴ besi taekĩ hatu banabimati huni betsã hui kushipawẽ hatu yuikĩ: “Yurabu shukuabu tibi anua inũ hãtxa betsa betsapawẽ hãtxamisbu tibi anua hunibu tibibuũ, pes shũ ea nĩkakãwẽ.

⁵ Trombeta inũ, teperewe inũ, buzina inũ, lira inũ, saltério inũ, gaita inũ, mimawati tibi mawaibu nĩkatã dãti iki beutã mane ouro shanẽ ibuhaira Nabucodonosorĩ hatu dami wamashina kẽwãkãwẽ.

⁶ Hamẽ tsuabura ha dami kẽwaĩ mã dãti iki beutã kẽwãbumakẽ haburã, hawaira txi here hi ikai anu matu urẽkanikiki. Uĩrakãwẽ”, hatu wa

⁷ hanu itxai keyuabũ ha mimawati mawaibũ nĩkai dãti iki beutã mane ouro dami kẽwãkĩ keyuaibũ

⁸ Caldéia nawabu Judeubuki sinatamis betsa ma hanu hatu pewashuna haska shinaĩ hatu txitekatsi shanẽ ibuhaira Nabucodonosor bebũ mapushũ

⁹ yuikĩ: —Shanẽ ibuũ, habi mĩ hiweyukũkaĩshanaii, hawa beshtekeamarã! Mĩ kena hau shinãkubaĩshanũbũwẽ!

¹⁰ Mimawati mawaibu dasibibũ nĩkatã dãti iki beutã mane ouro dami hawaira hau kẽwanũbũ mĩ ma hatu yunushuki.

¹¹ Tsuabura ikabumakẽ txi here hi ikai anu hau hatu urenũbũ mĩ hãtxariashuki.

¹² Hakia Judeubu betsabu Babilônia mai pakekauana mekekĩ hau hatu mia yunushũkubaĩshanũbũ mĩ hatu yunuima Sadraque inũ, Mesaque inũ, Abede-Nego habũ mikiri pe shinãbuma mĩ mekenika yushibubu kẽwãbuma mane ouro dami mĩ hatu nitxĩmashina habũ hawa kẽwãbuma nũ uiaiĩ— akabu

¹³ haska yuiabu nĩkai sinatahairakĩ Sadraque inũ, Mesaque inũ, Abede-Nego hau iwenũbũ Nabucodonosorĩ hatu yunua hatu itãshũ shanẽ ibu bebũ hatu nitxiãbu

¹⁴ shanẽ ibuhairatũ hatu yukakĩ: —Ẽ mekenika yushibubu inũ mane ouro dami ẽ hatu yunua ashiãbu mã kẽwãma ishurã, txanimamẽ?

¹⁵ Mimawati mawaibu nĩkakĩ hawaira mane ouro dami ẽ hatu amashina bebũ dãti iki beutã mã kẽwãtirumẽ, ikisrã? Hakia mã kẽwãmakẽ na habiatiã txi here hi ikai anu matu urẽkanikiki. Haska matu waibũ haratura yushinẽ matu mekekĩ piskumatirumẽ?— hatu wa

¹⁶ Sadraque inũ, Mesaque inũ, Abede-Negõ kemakĩ yuikĩ: —Ha dami kẽwãtikiri nũ mibe haska hãtxa hayamaki.

¹⁷ Txi here hi ikai inũ dasibi mĩ nukũ shanẽ ibũ nuku txakabuwakatsis ikai nukũ Mekenika Deus nũ kẽwãmistũ nemakĩ nuku binumatiruki.

¹⁸ Hakia nuku merabewamabia shanẽ ibuũ, mianã, uĩrahairawe. Mĩ yushibubu nũ kẽwãma inũ mane ouro dami bebũ hawa dãti ishũ nũ kẽwãmariki— akaibuwẽ taea

Txi here hi ikai anua Deusũ hatu merabewa hawa menuama inibukiaki, na hãtxarã

¹⁹ haska hãtxa wakĩ yuiabu Nabucodonosorĩ nĩkatã hatuki sinata txakayamai hawẽ besu tashipe iki keyutã mai kini keru anu txi kuabu here hi hi ikai anu urẽmisbu anu hatũ beya binumakĩ ana 7ki karu itxapa napukĩ hau keti wakĩ hi a txakayamanũbũ hatu yunua keti wabu dekeĩ keyua mesea daka hi hi ikai anu

²⁰ Sadraque inũ, Mesaque inũ, Abede-Nego tapu manaũrishũ txi anu hau hatu putanũbũ hawẽ detenamenikabu kushipa datebuma hatu yunua

²¹ hatũ daya tari hawẽrua saweabu ha dabe inũ besti huni hatũ mekẽ inũ hatũ tae neashũ manaũrishũ txi dekẽhaira anu hatu putabu

²² haska shanẽ ibuhairatũ hatu yunuai bebis hawaira akĩ txi dekẽhaira anu detenamenikabũ hatu putaibu here bubikĩ hatu besti menukĩ tenãyã

²³ hakia mai kini anu Sadraque inũ, Mesaque inũ, Abede-Nego neashũ putabu kauani txi dekẽhaira anu tĩ ikaibũ

²⁴ hatu haska waibu uinũ ika hawaira Nabucodonosor benikaĩ e ikĩ hawẽ unanepabũ merabewamisbu yukakĩ: —Huni dabe inũ besti neashũ txi anu putakãshumẽ?— hatu wa habũ kemakĩ yuikĩ: —Haa. Haska wakãshuki— akabu

²⁵ shanẽ ibũ ana hatu yuikĩ: —Haska wabiakãshukẽ eã uĩkinã, huni dabe inũ dabe neakama txi anu mapubaunaibu hawa menui txakabuama ẽ uiaiĩ. Ha betsarã, tsuã ha txi anu ureãma yushibũ huni bake itsaki— ikĩ

²⁶ hãtxakĩ yuikubaini kai, hanu karu kuamisbu kini kesha anu kemashũ hui kushipawẽ hatu kenakĩ: —Sadraque inũ, Mesaque inũ, Abede-Nego Deus dasibi binuatũ tsumabuũ, tashnibirani nenu eanu bekãwẽ— hatu wa, txi here anua ha dabe inũ besti mapekei kaĩbiranaibũ

²⁷ shanẽ ibuhairatũ merabewanikabu inũ hawẽ shanẽ ibubu beshmasbũ hatu uinũ ika bei ha dabe inũ besti anu itxa mapushũ hatũ yura hawa txĩ hatu metsama inũ, hatũ bu hawa hatu siwakama inũ, hatũ tari hawa menuama ishu uĩkĩ hawa itsa maiai sheteabumakẽ

²⁸ habiatiãri hawaira Nabucodonosorĩ hatu yuikĩ: —Sadraque inũ, Mesaque inũ, Abede-Nego hatũ mekenika yushĩ Deus dasibibũ hau kẽwãkubaĩshanũbũwẽ! Habu mawaki dateama hatũ mekenika Deus ikũwaĩ hawara yushĩ betsa bebũ dãti ishũ kẽwaĩsbuma inũ ea ẽ shanẽ ibũ yunuti hãtxa hawa akabumawẽ taeshũ txiwẽ nũ hatu kupiaya hatũ mekenika Deusũ hawẽ nai tsuma yunukĩ hawẽ dayarubu txanima txi nemashũkĩ hatu merabewashuki.

²⁹ Natiã haska hatu merabewashu keska yushĩ betsã haska watirumawẽ taeshũ eã eskakiri ẽ yunuaii. Yurabu inũ shukuabu betsa betsapa inũ hãtxa betsa betsapa hawẽ hãtxamisbu anushũ Sadraque inũ, Mesaque inũ, Abede-Nego hatũ mekenika Deuskiri hãtxa txakabu tsuãra danaĩ shanẽ ibubũ hawẽ yura bais ashũ meshterabetã hau hatũ hiweri tekekĩ hanus mãtxĩkubaĩshanũbũwẽ— hatu watã

³⁰ txipu Babilônia mai pakekauana anu shanẽ ibũ ha dabe inũ besti daya betsa kushipahaira ana hatu inãkĩ yununikiaki.