2 Tiomóid 3 - Tiomna Nua 1951 (de Siúnta)

¹ Acht bí cinnte de’n méid seo, go dtiocfaidh aimseara peiriaclacha ins na laethibh deireannacha.

² Óir béidh na daoine leithleasach, sanntach, maoidhteach mórtasach, masluightheach, easumhal d’aithreachaibh agus do mháithreachaibh, díombuidheach, mí‐naomhtha, gan grádh nádúrtha,

³ cruadh‐chroidheach, bíodánach, do‐smachtuighthe, fíochmhar, gan grádh do’n mhaith;

⁴ béidh siad ’n‐a bhfealltóiribh, béidh siad ceanndána, lán d’uabhar, gur mó a ndúil i bpléisiúr ’ná i nDia;

⁵ cuma na cráibhtheachta ortha, acht go bhfuil diúlta aca d’á brigh; fan amach ó n‐a leithéidibh sin.

⁶ Óir daoine de’n aicme sin is eadh iad‐san shleamhnuigheas isteach i dtighthibh agus árduigheas leo chum daor‐bhroide mná baothánta atá fá ualach peacaidhe, d’á luascadh ag miantaibh de’n uile shaghas,

⁷ mná bhíos ag síor‐fhoghlaim gan a bheith ar chumas dóibh teacht ar eolas na fírinne.

⁸ Agus fá mar chuir Iannes agus Iambrés i n‐aghaidh Mhaoise, mar sin is eadh atá na fir sin ag cur i n‐aghaidh na fírinne; fir go bhfuil a n‐aigne truaillighthe, agus iad ar mearbhall i dtaobh an chreidimh.

⁹ Acht ní rachaidh siad níos faide: óir béidh a ndíth‐céille follasach do’n tsaoghal, mar bhí dith‐céille na bhfear úd.

¹⁰ Acht do leanais‐se dem’ theagasc, dem’ dheagh‐iomchar, dem’ chuspóir, dem’ chreideamh, de’m fhoighid, dem’ ghrádh, dem’ sheasmhacht, dem’ ghéirleanamhnaibh, dem’ anacraibh.

¹¹ Is eol duit an méid d’fhulaingeas i nAntuaigh, i Listra; géire na gcrádh d’fhulaingeas agus do shaor an Tighearna asta sin uile mé.

¹² ’Seadh, agus gach duine gur mian leis a shaoghal do chaitheamh go cráibhtheach i nÍosa Críost, fulaingeochaidh sé géirleanmhain.

¹³ Acht éireochaidh droch‐dhaoine agus mealltóirí níos measa agus níos measa, ag mealladh agus d’á mealladh féin.

¹⁴ Acht lean‐sa de na neithibh atá foghlamtha agat agus go bhfuil tú dearbhtha dhíobh, agus a fhios agat ciarbh iad ó n‐ár fhoghlaimis iad;

¹⁵ agus ó bhís id’ leanbh go raibh eolas agat ar na naoimh‐scrioptúiribh fhéadas thú do dhéanamh eolgach chum slánuighthe tré chreideamh i nÍosa Críost.

¹⁶ Is ó Dhia tháinig gach scrioptúir, agus atá sí fóghantach chum teagaisc, chum spreagtha, chum ceartuighthe, chum foircheadail i bhfíréantacht:

¹⁷ chum go mbéidh an duine le Dia lán‐oilte gléasta go h‐iomlán le h‐aghaidh gach deagh‐ghnímh.