ГАЛЯТАЎ 4 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ГАЛЯТАЎ 4

¹ Кажу ж вам: пакуль спадкаемец дзіця, ён нічым не адрозніваецца ад нявольніка, хоць ён і гаспадар над усім,

² але знаходзіцца да вызначанага часу пад апекунамі і аканомамі.

³ Так і мы, пакуль мы былі дзецьмі, былі паняволены стыхіямі свету.

⁴ А калі прыйшла поўня часу, паслаў Бог Свайго Сына, народжанага жанчынай, стаўшага пад закон,

⁵ каб адкупіў тых, якія былі пад законам, каб і мы атрымалі ўсынаўленне.

⁶ А дзеля таго, што вы – сыны, паслаў Бог Духа Сына Свайго ў сэрцы вашы, Які кліча: «Абба, Ойча!»

⁷ Так што ты ўжо не нявольнік, але сын; а калі сын, дык і спадкаемец Божы праз Хрыста.

⁸ Але тады, калі не ведалі вы Бога, служылі тым, якія па сутнасці не ёсць багамі.

⁹ Цяпер жа, калі вы ўжо пазналі Бога і самі пазнаныя Богам, чаго вяртаецеся да бяссільных і бязродных стыхій, якім зноў хочаце служыць?

¹⁰ Вы глядзіце на дні, месяцы, часы і гады!

¹¹ Баюся за вас, што, можа, надарма працаваў у вас.

¹² Браты, прашу вас, будзьце такімі, як і я; бо і я стаўся такім, як вы. Нічым вы мяне не скрыўдзілі.

¹³ Вы ж ведаеце, як праз слабасць цела першы раз я дабравесціў вам,

¹⁴ і вы не пагардзілі спакусай маёй у целе маім, і не адрынулі, але прынялі мяне як анёла Божага, як Хрыста Ісуса.

¹⁵ Дзе ж тады тое шчасце ваша? Сведчу вам, што, калі б гэта было магчыма, дык, вочы сабе вырваўшы, аддалі б іх мне.

¹⁶ Дык ці ворагам стаўся я вам за тое, што казаў вам праўду?

¹⁷ Рупяцца яны пра вас не з дабра, але хочуць адарваць вас, каб аб іх вы рупіліся.

¹⁸ Добра рупіцца аб добрым заўсёды, а не тады толькі, калі я знаходжуся паміж вас;

¹⁹ дзеткі мае, зноў вас нараджаю ў муках, пакуль уфармуецца ў вас Хрыстос.

²⁰ Хацеў бы я быць у вас цяпер ды змяніць голас мой, бо сам я ў неўразуменні аб вас.

²¹ Скажыце мне тыя, што хочаце жыць пад законам: ці закону вы не чулі?

²² Напісана, што Абрагам меў двух сыноў: аднаго з нявольніцы, другога з вольнай.

²³ Але той, што з нявольніцы, паводле цела нарадзіўся, а той, што з вольнай, – праз абяцанне.

²⁴ Гэта як алегорыя сказана, абазначае гэта два запаветы: адзін – на гары Сінай, што на няволю родзіць, гэта Агар.

²⁵ Бо гэтая Агар – гара Сінай у Арабіі, адпавядае цяперашняму Ерузаліму і зняволена з сынамі сваімі.

²⁶ Той жа Ерузалім, што ўгары, вольны, і ёсць маці ўсім нам.

²⁷ Напісана бо: «Узвесяліся, няплодная, якая не нараджаеш, усклікай і крычы, якая не пакутуеш родамі, бо ў пакінутай больш дзяцей, чым у той, якая мае мужа».

²⁸ Мы ж, браты, паводле Ізаака дзеці абяцання.

²⁹ Але як і тады той, што паводле цела нарадзіўся, пераследаваў таго, які паводле духа, так і цяпер.

³⁰ А што кажа Пісанне? «Выгані нявольніцу і яе сына, бо не будзе спадкаемцам сын нявольніцы разам з сынам вольнай».

³¹ Дык вось, браты, мы дзеці не нявольніцы, але вольнай.