ГАЛЯТАЎ 5 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Дык стойце ў свабодзе, якой вызваліў нас Хрыстос, і не патрапляйце зноў пад ярмо няволі.

² Вось, я, Паўла, кажу вам, што, калі вы дасцеся абрэзацца, Хрыстос не прынясе вам ніякай карысці.

³ Яшчэ сведчу, што кожны чалавек абрэзаны павінен выконваць увесь закон.

⁴ Вы, што шукаеце ў законе апраўдання, ад Хрыста аддзеленыя і ад ласкі адпалі.

⁵ Мы ж духам ад веры маем надзею апраўдання.

⁶ Бо ў Хрысце Ісусе ані абразанне, ані неабразанне не маюць сілы, а толькі вера, што дзейнічае праз любоў.

⁷ Вы беглі добра, і хто ж перашкодзіў вам быць паслухмянымі праўдзе?

⁸ Перакананне гэта не ад Таго, Які вас кліча.

⁹ Трохі кіслі ўсё цеста квасіць.

¹⁰ Я ўпэўнены ў вас у Госпадзе, што інакш гэтага не разумееце; а хто бунтуе вас, той панясе асуджэнне, хто б ён ні быў.

¹¹ Калі ж я, браты, і далей прапаведую абразанне, дык чаму я цярплю пераслед? Тады знікла б згаршэнне крыжа.

¹² О каб былі адсечаны тыя, якія вас бунтуюць!

¹³ Бо вы, браты, пакліканы да свабоды; толькі каб свабоду вы не давалі як падставу для пажадлівасці цела, але любоўю духа служыце адзін аднаму.

¹⁴ Бо ўвесь закон адным выразам спаўняецца, вось гэтым: «Любі блізкага свайго, як самога сябе».

¹⁵ Калі ж адзін аднаго кусаеце і з’ядаеце, глядзіце, каб вы адзін аднаго не загубілі.

¹⁶ Кажу вам: кіруйцеся духам, ды не падпадайце пад пажадлівасць цела.

¹⁷ Цела бо цягне супраць духа, а дух – супраць цела; яны супрацівяцца адно аднаму, каб не тое, што хочаце, вы рабілі.

¹⁸ Калі будзеце кіравацца духам, вы не пад законам.

¹⁹ Вядомыя ж учынкі цела, вось яны: чужаложства, распуста, нячыстасць, разбэшчанасць,

²⁰ балванапаклонства, чараванне, варожасць, сварлівасць, нянавісць, забойствы, гнеў, звадкі, нязгода, герэзіі,

²¹ забойствы, п’янства, гулянкі і ім падобнае. Аб гэтым я і папярэджваў вас, і папярэджваю, што тыя, якія такое чыняць, Валадарства Божага не атрымаюць.

²² Плод жа духа – любоў, радасць, супакой, доўгацярплівасць, ласкавасць, дабрыня, вера,

²³ сціпласць, стрыманасць. Супраць такіх няма закону.

²⁴ Тыя ж, што належаць Хрысту Ісусу, укрыжавалі цела з заганамі і пажадлівасцямі.

²⁵ Калі жывём Духам, дык Духам і ходзім.

²⁶ Давайце не імкнуцца да пустой славы, дражнячы адзін аднаго, зайздросцячы адзін аднаму.