Kasta
120 Diosamp sumankthapiñ tuqit Biblian jiskʼa tʼaqanakapa
Take acanacsti Dios quipcaraquiw luri, jupampisa sumancthapiyjjaraquistu ucatsti Cristo tokew, takenirus Diosampi sumancthapiyañ arunac loktañwa jaytaraquistu. Diosajj acapachampejj Cristo tokwa sumancthapiscäna, jakenacan juchanacapat jan amtasisa. Jiwasarusti uca sumancthapiñ arunacwa jaytawayaraquistu mayninacar churañasataqui.
Diosan uñisiripäcasinsa Dios quipcaw sumancthapiyistu jupan Wawapan jiwatap toke, ucataracwa jichhajj uca Wawapan jacäwip toke khespiyatäñäni, jupampi sumancthapitas laycu.
Uqhamatwa Cristojj crusan jiwasina paypach marcan ch'ajjwanacap tucuyawayi, Diosampis sumancayaraqui, jupanacat mä sapa cuerporu tucuyasina.
Ucatsti munaraquïnwa aca orakpachpana Cristo toke sumancañajj utjañapa, take aca orakpachanquirinacampi, alajjpachanquirinacampisa, sumancthapiñapa Criston crusan jiwäwip toke.
Nayrajj jumanacajj Diosat jayancasipcäyätawa chuymanacamansti Diosan uñisirinacaparaqui, jan walinac lurapjjatam laycu. Ucampis jichhajj Diosajj jupampejj sumancthapiyjjapjjtamwa, Cristojj janchipan jiwatap toke. Acsti jumanacar jupa nayräjjar uñstayañataquiw luri, jan cuna k'añuni ni cuna juchansa.
Iyawsäwi laycu Dios nayrakatan asquit uñt'atäjjatasatwa Diosampi sumancañajj utjistu Jesucristo Tatitusana.
Ucatpï Diosarojj jac'achasiñasajj take chuymampi, mä suma cheka iyawsañampi, jupaw chuymanacasjj k'omacharaqui jan juchani amuyasiñasataqui, janchinacasajj k'oma umamp jarekatäjjewa.
Ucampis jichhajj Cristo Jesusampejj mayaquëjjapjjtawa. Nayrajj jayancapjjäyätawa, jichhajj Criston jiwatap laycuw jac'ancjjapjjtajja.
Tatitojj siwa: “Jutapjjam, uca jan wali luratanacamat parlapjjañäni. Juchanacamajj wila colorar uñtatäcchinisa, nayajj qhunjam jank'ow tucuyäjja; ch'iyar wila isir uñtatäcchinisa, nayajj jank'o t'arwaru uñtata tucuyäjja.
Uqhamasti, qhititï Cristompëjjchi ucajj machak jakëjjewa. Nayra luräwinacasti tucusjjaraquiwa, jichhajj take cunas machakar tucutawa.
Jichhasti janiw cuna juchañchäwis utjquiti Cristo Jesusanquirinacataquejja, qhitinacatejj jan jacapqui janchin munañaparjama [jan ucasti Ajayun apnakata jacapqui ucanacataquejja].
“Tatitur thaktapjjam jicjjatañjamäquipana, jac'ancquipan jawsapjjam. Khoru jakejj sarnakäwipjja apanucpan, ñankha amtañan jakesti amtañanacapjja apanucpan; Tatitun ucar cuttanjjapjjam, jupasti jumanacatjja qhuyapayasipjjätamwa; Diosasar maqhatjjapjjam, jupasti perdonañataquejj janc'aquiwa.
“Diosajj acapachar wal munatap laycuw mä sapa Yokapar qhitani, take qhitinacatejj jupar iyawsapqui ucanacajj jan chhakañapataqui, jan ucasti wiñay jacañanïñapataqui. Diosajj janiw Yokapjja acapachar juchañchañataqui qhitanquiti, jan ucasti acapachajj jupa toke khespitäñapataquiw qhitani.
Ucatsti leyirjamajj niya take cunanacaw wilampi k'omachatäñapa; janiw juchat k'omachasiñajj utjcaspati, janitejj wilajj wartascaspa ucqhajja.
“Janiw yakha Diosajj jumjam utjquiti, jumasti pampachtawa ñankha luratanacapjja, juma contra sayt'asitanacapsa armaractawa, qhitinacatï marcamatjja jilt'apqui uca juc'aniru. Jumaw munasiñamjja uñacht'ayapjjesta, colerasiñamsti janiraquiw wiñayatac catjjäsctati. Nanacatsti wasitatay qhuyapt'ayasipjjeta, ñankha luratanacajjsti jach'a kotar jakontjjam.
Uqhamasti jan wali lurañanacjja apanucupjjam, ucatsti arrepientisipjjam juchanacamajj perdonatäñapataqui. Ucatwa Diosajj jumanacar cusiscañ urunac churapjjätam,
camisatejj inti jalsut inti jalantcam wali jayajja, uqhäm jiwasanacat juchanacas jayarst'ayistu.
Jiwasatejj juchanacas arsusiñänejja, jupajj chekawa, asquiraquiwa juchanacas perdonañataqui, uqhamarac take jan walinacata k'omachañataquisa.
Ucampis jupajj jiwasan Diosasataqui sayt'asitas laycuw chhojjriñchjatänjja, jiwasan ñankha luratanacas laycuw wali t'akhesiyatänjja; jupan t'akhesitapasti jiwasataquejj sumancañ apani, chhojjrinacap laycuw kollata uñjasiractanjja.
Tatitojj janiw armt'asquiti arunacapar phokhañjja, cunjämtï mayninacajj amuyapqui uqhama, jan ucasti jupajj suma chuymampiw suyt'asquistu; jupasti janiw munquiti qhitin chhakañapsa, jan ucasti muniwa takeninsa Diosar cutcatañapa.
Diosajj jach'a munasiñapatwa Yokapan jiwäwipa toke khespiyistu, juchanacassa perdonasaraqui.
Ucampis jucha luratajjaw utjäna, uc amuyasta, ucat jucha luratanacajj jan imt'csmati; juchanacajj jumar arsusiñataquiw amtta, Tatay, jumasti juchanacajjat pampachista.
“Ucampis nayajja, Diosamätajj laycojj, jake jiwayatanacamjja pichsmawa, juchanacamatsti janiw mayampsa amtascjjäti.
Jesusajj saraquïnwa: —Nayätwa thaquejja, chekasa, jacañasa. Naya tokequiw Awquin ucar puriñajj utji.
Cristo quipcaraquiw juchanacas laycojj jiwäwipanjja t'akhesiwayejja jan mayampitaqui. Jupajj asqui jakënwa, ucampis jiwasan jan walïtas laycuw t'akhesiwayi, jiwasar Diosar irpañataqui. Janchinaqui jiwatänjja ucampis ajayupanjja jactanjjewa.
Janiw yakha qhitinsa khespiyasiñajj utjquiti. Janiraquiw acapachanjja yakha sutejj Diosan churata utjquiti, jakenacan khespiyasipjjañapataquejja.
janiw cuna asqui luratas laycuti, jan ucasti qhuyapayasiñap laycuwa khespiyistu jarekäwi toke. Kollan Ajayu toke machakat naciyaraquistu machak jacañ churasa. Khespiyir Jesucristo tokew Diosajj Kollan Ajayu jilarquir churistu, uqhamat qhuyapayasiñapan jiwasar catokañapataqui, uqhamarac wiñay jacañ suyt'ctansa uc catokañasataqui.
Tatitojj llaquimp aynacht'atanacan jac'apancasquiwa, jupanacar khespiyañataqui, aynacht'at chuymanacap waytañataqui.
Ucampisa jumanacan ñankha luratanacamasti, mä perkjamaw sayt'i jumanacampi Diosampi jaljasajja; jumanacan juchanacamaw jupan ajanupjja imantasiyi, janiraquiw ist'añsa munapctamti.
Juchan wajjt'asiñapasti jiwañawa, ucampis Diosan wajjt'äwipajj wiñay jacañawa Cristo Jesús Tatitusana.
Diosan munasiñapatwa jumanacajj khespiyatäpjjtajja iyawsañ laycu. Acasti janiw jumanacan luräwinacamäquiti, jan ucasti Diosaw jumanacar churapjjtam. Janiraquiw cuna luräw tokëquisa, uqhamat jan qhitis jach'achasiscañapataqui.
Take qhitinactejj Awquejj churquitu ucanacajja nayaruw juti; qhititejj nayaru jutqui ucarojja janiw ankaru alisnuccti.
Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.
Sapjjsmawa, uqhamaraquipï cusisiñajj Diosan angelanacap taypinjj utjejja mä juchararan arrepientisitapatjja.”
Nayaw juchanacamsa, pantasitanacamsa chhaktaytjja, cunjämatejj kenayanacajj chhaktapjje uqhama. Nayan ucar cuttanjjam, nayajjay jumarojj khespiysmajja.”
Uqhamajj Diosan qhitanacapjamawa jumanacar jutapjjsma, Dios quicpas jumanacar achict'apquiristam nanac toke uqhama. Tatitun sutipjjaruw achict'apjjsma: sumancthapjjapjjamay Diosampejja.
Dios Tatay, jumatejj takpach juchanac amjjäsiscaquismajja, ¿qhitirac nayrakataman sayt'aspasti? Ucampis jumaw juchanacat pampachapjjesta, uqhämat jumar wakaychañ yatichapjjesta.
ucatsti takeni jucha lurapjjatap laycusti Diosampejj janiw catokatäpquiti. Ucampis Diosajj jupan jach'a munasiñapanjja ina ch'usatacwa catokestu, Jesucristo tokwa jiwasanacarojj khespiyaraquistu.
Ucatwa wiñay khespiyañataqui ch'amanejja qhitinacatejj jupa toke Diosarojj jac'achasipqui ucanacarojja. Jupasti wiñay jake jupanacatac Diosat mayiñataqui.
Ucampis Diosajj munasiñapwa uñacht'ayistu, cunapachatejj jiwasanacajj juchanïscäyätan ucapachaw Cristojj jiwasanac laycu jiwawayi.
Sumancapjjam, maynit maynicama qhuyapt'ayasirïpjjam, perdonasirïpjjaraquim maynit maynicama, cunjämtejj Diosajj jumanacaru perdonapjjtam Cristo toke uqhama.
Nayajj wiñay jacañwa churta, janiw cunapachas jiwapcaraquiniti, ni qhitis amparajjatjja apakcaraquitaniti.
Tatay, jumajj munasiñanïtawa, juch pampachiriraquïtawa, jumar art'asirinacataquejj qhuyapayasirïtawa.
Aqhamanquiw munasiñajja: janiw jiwasanacati Diosar munapcäyätanjja, jan ucasti jupaw munistu Wawap qhitanisina juchanacasat khespiyañataqui.
Mä sapa Diosaquiw utji, Diosampi jakenacampi sumancthapiyirejja mayniquiraquiw utji, ucasti Jesucristowa.
Nayar uñt'añataquejja janiraquiw waquiscjjaniti, yatichasipjjañanacapajj maynit maynicama amigonacaparusa, uqhamarac familianacaparusa, takeniraquiwa jisc'at jach'acama nayarojj uñt'apjjetani. Nayasti jupanacarojj ñankha luratanacapatjja perdonaraquïwa, jucha luratanacapatsti janiw mayampsa amtascjjaraquïti. Naya Tatituw ucjja arsta” sasa.
Tatay, juchanacajjajj waljapuniwa, sutiman jach'ätap laycuy takpach juchanacajjat pampachita.
“Uqhamasti jumatejj altararu ofrenda apcasina amtassta jilamajj mä cunatsa juma conträtapjja, jumajj uca ofrendama altar nayrakatar jaytawayasinjja, jilamampi sumancthapiri saram, ucatsti cuttanim uca ofrendam altaran churañataqui.
Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu,
Jumanac purajj llamp'u chuymampi sarnakapjjam, maynit maynirus perdonasipjjaraquim jan wali lurasipjjsta ucapachajja. Cunjämtï jumanacarojj Cristojj perdonapjjtamjja, uqhamarac jumanacajj perdonapjjam.
Diosar jac'achasipjjam, jupasti jumanacarojj jac'achasiraquiniwa. Juchararanaca, amparanacam k'omachasipjjam. Jumanaca qhitinacatï acapachampiru, Diosampiru munasipcta ucanacasti chuymanacam k'omachasipjjaraquim.
Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.
Pachpa sumancañ Diosajj jumanacarojj phokhat k'omachäwimp k'omachpan, uqhamarac imaracpan ajaysa, almsa, janchissa, jan acch'a juchani Tatit Jesucristosan jutañapcama.
Aca khanañchäwejja, Diosajj wiñay jacañ churistu ucawa; aca wiñay jacañasti Yokapanquiwa. Qhititejj Diosan Yokaparojj catokqui ucajja wiñay jacañaniwa; ucampis qhititejj Diosan Yokapar jan catokqui ucajj janiw wiñay jacañanïquiti.
Uqhamajj jichhajj yattwa, janiwa cunas Diosan munasiñapatjja apakquistaspati, janiw jiwañasa, ni jacañasa, ni angelanacasa, ni alajjpach ch'amanacasa, ni jichhasa, ni jutcani ucasa, ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.
Janiw juc'ampi jach'a munasiñanejj utjcaspati cawquïritejj amigonacap laycu jacañap apt'asquis ucat sipanjja.
Take profetanacaraquiw uca Jesusjjat parlapjjäna: Take qhitinacatejj jupar iyawsapqui ucanacajj jupan sutip laycuw juchanacapat perdón catokapjjani —sasa.
Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa. Jupar arquirinacan munataparjamaw phokhe, arnakasitanacap ist'i, khespiyaraqui.
Mä wawaw jiwasataqui yurini, Diosaw mä yokall wawa churistani, uca wawaw jichhajj apnakaraquini. Aqham sasaw sutichapjjaraquini: ‘Amtäwinacapanjja Muspharcaña, jan atipjcay Dios, Wiñay Awqui, Sumancañan Jilïripa’ sasa.
Yatipjjam Dios Awquejj kawksa munasistu wawanacapat uñt'atäñasataqui, jïsa wawanacapapunïsctanwa. Ucatpï Diosar jan iyawsirinacajj jan uñt'quistutejja, Diosar jan uñt'apjjatap laycu.
Chuymasatejj cunatsa juchañchchistojja, Diosajj juc'amp jach'awa chuymasat sipansa, jupasti take cunwa yatiraqui.
Nayar jutapjjam take karjatanaca jatjatanaca, nayaw samarayapjjäma. Nayan yugojja apapjjam, ucatsti nayat yatekasipjjaraquita. Nayasti llamp'u chuymani, alt'at chuymaniraquïtwa, ucatwa almaman samarañapjja jicjjatapjjäta. jisct'añataqui —¿Jumätati jutañapäquis uca Cristojja, jan ucajj yakharuch suyapjjäjja? —sasa. Nayan yugojjasti jasa apañaquiwa, qhumojjasti sinti phisnaquiraquiwa.”
Jan jumanacajj cunats llaquisipjjamti, take cunsa Diosar sapjjam oracionana, mayipjjam yuspagarapjjaraquim. Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.
Juparutejj jan take chuyma arccañäni ucas, jupajj janiw armasquistaniti, Diosajj janiw jupapachpa armascaspati.
Acjj sapjjsmawa jumanacajj samarañ jicjjatapjjañamataqui nayaru iyawsatanacam laycu. Acapachanjja jumanacajj t'akhesipjjätawa, ucampis ch'am catjjatapjjam, nayajj acapacharojj atipjtwa —sasa.
“Tatitun ajayupajj nayjjanquiwa, Tatituraquiw nayarojj yakhachasitu; pobrenacaru suma yatiyäwinac yatiyiriw qhitanitu, llact'atanacaru chuymachañataqui, preso catuntatanacaru khespiyat sarnakasiñ yatiyiri, carcelanquirinacarusti khespiyat sarnakasiñ chuririraqui,
Uca suyt'äwinsti janiw cuna mayjt'añas utjquiti, Diosasti jiwasan chuymanacasarojj munasiñapwa phokhantistu Kollan Ajayu churquist uca toke.
Jichhajj jilatanaca, cusisitäpjjapunim. Jacañanacamansti chekapapunïpjjam, chuymachasipjjaraquim, sumanaraqui jumanaccamajj jacapjjam. Samarañ churir munasir Diosaw jumanacampïscanejja.
Diosaw nayar khespiyirejja, juparuw iyawsta, janiw cunsa ajjsarcäti. Tatituw nayan arjjatirejjajja, nayar ch'amañchirejjasa, jupaw khespiyirejjajja.”
Ucampis juparu catokapqui iyawsapcaraqui ucanacarusti munañanïñwa churi Diosan wawanacapa tucupjjañapataqui.
Chuymajjasa, janchejjas tucusisquiwa, ucampis Diosaw wiñay catokäwejjajja, jupaw chuymajjarojj catjjäsisqui.
Diosajj arsutanacaparojj phokhapuniwa. Juparaquiw Jesucristo Tatitusampi chekäpjjañamataqui jawsapjjtamjja.
Aca wiñay jacañajj juma sapa chekpach Diosar uñt'añanwa utji, uqhamarac Jesucristoru cawquïrirutejj jumajj qhitancta ucaru.
Pachpa samarañan Tatitojj jumanacarojj samarañ churpan take horasansa, cunayman toketsa. Tatitojj take jumanacampïpan.
Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.
Tatituw khanajjasa, khespiyasiñajjasa, ¿qhitirurac ajjsarästi? Tatituw jacañajjar arjjati, ¿cunarurac ajjsarästi?
Tatitu Diosaw jumanac taypincasqui, ¡jupajj take ch'amaniwa, juparaquiw khespiyätam! Diosasti jumar uñjasinjja cusisiniwa, munasiñapampejj machaka jacañrac churätam; cusisiñapansti k'ochuraquiniwa,
Qhititejj Yokar iyawsqui ucajja wiñay jacañaniwa, ucampis qhititejj jan Yokaru iyawsqui ucajja janiw wiñay jacañanïcaniti, jan ucasti Diosan ajjsarcañ mutuyäwipwa catokani.”
Jupasti jiwañaru catuyatänwa jiwasanacan juchanacas laycu, ucatsti jactayataraquïnwa jupa toke jiwasanacajj Diosampi catokatäñasataqui.
Uqhamaraquiy jumanacajj amuyasipjjam juchataquejj jiwatäjjapjjatama, ucampis Diosataquejj jacasipctawa, Cristo Tatitun mayaquëjjapjjatamata.
Yupaychañäni Diosaru, Jesucristo Tatitun Awquiparu, jupasti jach'a qhuyapayasiñap laycuwa jiwasarojj machakat naciyistu, Jesucriston jiwatanac taypit jactatap toke. Ucasti jiwasanacarojj suyt'añanwa jacayaraquistu,
Cristojj libre sarnakasiñwa churistu, jiwasanacan uqham sarnakasiñasataqui. Jumanacajj ch'amampi uca khespiyat jacañan sarantapjjam, jan wasitampi esclavon jacäwiparu cutt'apjjamti.
Cunjämtejj Adán chachancatas laycojj take jakenacajj jiwarapjjejja, uqhamaraquiw Cristoncjjasinjja take jakenacajj jacapjjani.
“Khanacwa sapjjsma, qhititejj nayan arsutajjar ist'quejja, uqhamarac qhititejj qhitanquitu ucarus iyawscaraqui ucajja wiñay jacañaniwa, janiraquiw juchañchatäcaniti, jan ucasti jiwañat jacañaruw pasawayjje.
Cheka uñjäwisti sumancañwa utjayani, samarañana sarnakasiña, jan ajjsarasa, ucasti wiñayataquïniwa.
Acjja kellkanipjjsmawa Diosan Yokapar iyawsapcta ucanacaru, wiñay jacañanïpjjatam yatipjjañamataqui.
Diosan reinopajj janiw mank'añäquis ni umañäquisa, jan ucasti cheka sarnakaña, cusisiña, sumancaña Kollan Ajayu toke ucawa.
“Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.”
Yupaychañäni Diosaru, Tatit Jesucristosan Awquiparu, Cristompi mayachasitas laycuwa jupajj bendiciwayistu take casta ajayun bendicionanacampi alajjpachanacana.
Alajjpachanquir Take atipirin imat sarnaker jakejja, Chijejj janiw jac'achascätamti, usus janiraquiw utamar purincaniti, Diosajj angelanacaparuw qhitanini, sarnakäwim imañataqui. Amparapjjaruw apapjjätam, cayuman kalar jan lanctasiñapataqui; catarinacarusa, asïrunacarus takjjatascaquïtawa, leonanac taypinsa, ajjsarcañ animalanac taypinsa, sarnakascaquïtawa. “Nayar munasitap laycusti, juparojj khespiyäwa, nayar uñt'atap laycusti, juparojj imaraquïwa. Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä; walja maranacaw jacayä, ¡khespiyäwejjampiw jupar cusisiyaraquï!” Tatiturojj siwa: “Jumätaw imantasiñajjajja, jarc'akasiñajjasa, Diosajjay, jumaruw takpach chuymamp alcatsma” sasa.
Jesucristo quipcaraquiw juchanacasjja pachpa cuerpopjjaru apawayjje, crusan jiwasina, uqhamata jiwasajj jucha lurañar jiwañasataqui, mä suma jacañan jacañasataqui. Jupajj chhojjriñchjatänwa jumanacajj c'umaräpjjañamataqui.
takenirus saraquïwa: ¡Samarañajj utjpan jayanquirinacampi, uqhamaraqui jac'anquirinacampisa! ¡Nayaw marcajjarojj kolljjatasjjä!”
Ucampis llamp'u cancañampi chuymachasiñampi churir Diosajja jumanacan jacäwimana yanappan sumaqui mayninacajj mayninacampi jacapjjañamataqui, Tatit Jesusanquirinacjama,
Uqhamasti Cristotejj ch'amañchapjjstam, jupan munasiñaparaqui chuymachapjjstam, Ajayuparaqui jumanacampïchi, jupan munasiñapsa qhuyapayasiñapsa uñt'apjjsta ucqhajja, Uqhamat Jesusan sutip ist'asinjja take jaquir jakenacasa, acapachansa, alajjpachansa, mankhapachansa, quillt'asipjjañapataqui, ucat takeni arsuñapataqui Jesucristojj Tatitütapa, Dios Awquejj jach'achatäñapataqui. Ucatpï, munat jilatanaca, cunjämtï jumanacajj ist'apjjapunistajja cunapachatejj jumanacampïcäyät ucqhajja, jichhasti juc'ampi ist'apjjeta jayancatajj laycu. Jumanacan quipca khespiyasiñanacamatsti, alt'at chuymampi ajjsarañampirac phokhapjjam. Diosaw suma amtäwinac churapjjtam, jupa pachparaquiw yanapasipctamjja uca lurañanac phokhañanjja jupan munañaparjama. Take cunsa amuc lurapjjam jan jumanac pura ch'ajjwasa, uqhamat jan qhitis cunatsa jumanacar juchañchañapataqui, jan ucasti Diosan wawanacapjama jan cuna k'añuni jan wali jakenac taypins jicjjatasipjjañamataqui. Jumanacasti jupanac taypinjja c'ajapjjapunim cunjämatejj mä warawarajj ch'amac taypin c'ajqui uqhama, jacañ arunac jupanacaru yatiyasa. Uqhamata cunapachatejj Cristojj jutcani ucqhajj, jumanacat uqham ist'asinjja cusisiñajjataqui, jan inamay jalatajja, inamaya ch'am tucutajjsa yatisina. Nayan quipca jacañajjas sacrificatäcchinejja, cawquïr catuyäwtï iyawsapjjatam laycu Diosaru loktapctas uca phokhañataqui ucajja, nayajj cusistwa, jumanacampi chicaraquiw cusisiractjja. Cusisipjjaraquimay jumanacajja nayan cusisiñajjansa. Tatitun munañapächi ucqhajja, suyasctwa jumanacar uñjiri janc'aqui Timoteor qhitaniña, ucat jumanacat yatisina cusisiñajjataqui. cusisiyapjjapunita uqham mä wawaqui suma jacasipjjatamampejja, mä munasiñan mayachataquiraqui uca quipca ajayuniquiraqui, mä sapa amtäwiniquiraqui.
Diosaw khant'ayistu, imaraquistu; jupaw qhuyapayasiñampi, aytat cancañamp churi. Jan camscay asqui jaquir jakenacarojj, Tatitojj munasiwa, jach'aruw apti, asquinacap churaraqui.
“Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa.
Tata, jumaw nanacar asqui cancañ churapjjesta; chekpachansa juma sapaquiw take lurañanacajj-jja lurta.
Tatitusti jumanacar jiltaypan, juc'ampi maynit maynicam munasiñanacamajj utjaracpan, cunjämtejj nanacajj jumanacar munasipjjsma uqhama. Uqhamaraqui chuymanacamanjja ch'amañchatäpjjañamataqui, k'omachata jan cuna juchani Dios Awquisan nayrakatapana, cunapachatejj Tatit Jesusajj take jupanquirinacapampi jutcani ucapachajja.
Cristojj chuymanacaman iyawsañ toke jacañapataqui. Uqhamaraquiw mayta jumanacajj munasiñanjja ch'amanïpjjañamataqui suma saphintatjama, jumanac iyawsir purajj suma chuymamp jacapjjañanacamataqui, Criston munasiñapajj take tokeru sinti jach'ätapa amuyt'apjjañamataqui. Mayiractwa, Criston uca munasiñap uñt'apjjañamataqui uca munasiñapajj take cuntejj uñt'ctan ucat sipansa sinti jach'awa jan tucusquiriraquiwa, uqhamat Diosampi phokhantatäpjjañamataqui.
Diosajj khanapjja ch'amacan khantaycäna, uca pachpa Diosaraquiw khanapjja chuymanacasan khanayi. Uca khanampisti Diosan c'ajquir cancañapajj Jesucriston ajanupan khanquis uc uñt'apjjañasataquiwa.
Yupaychañäni Jesucristo Tatitusan Dios Awquiparu. Jupaw jiwasar qhuyapayasir Awquisajja, uqhamarac chuymachirisasa. Take t'akhesiñanacasanwa Diosajj chuymachistu, jiwasajj t'akhesirinacar chuymachañasataqui, cunjämtï Diosajj jiwasar chuymachquistu uqhama.
“Tatitur take chuymamampi catuyasim; juman ch'iqhi cancañamaruquejj jan alcatasimti. Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.
Ucampis uca Diosan amtäwipajja Kellkatanacarjamäscaraquiwa: “Jupar munirinacataquejja Diosajj jan qhitin uñjata, jan qhitin ist'ata, jan qhitin amtat yänacwa waquichi.”
Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.
Jupanacaruw Diosajj aca imantatjja uñacht'ayaraqui, cuna kamir cancañatejj Diosan utjqui jan judiöpquis uca jakenacaru. Imantäwisti Jesucristojj jumanacancqui ucawa, juparaquiwa cuntejj catokapcäta uca suyt'äwisa.