João 1 - Kaxinawá Bíblia (BR) Kaxinawá Bíblia (BR)
João 1

¹ Bawakĩ taewariama Deusũ Xinaĩ Hãtxati Epa Deusbe hiwea habiaska dabes Deus ipaunibukiaki, niti ikamarã. Hakiri matu yuinũ nĩkakãwẽ.

^2-3 Bai taei yura hayariama habias hawẽ Xinaĩ Hãtxati Deusbe yubakatã habetã dasibi damiwakĩ keyunikiaki. Dasibi damiwakĩ habe pashkama hiwea hauma Deusũ hawa wariama hakia hawẽ Xinaĩ Hãtxatibetã dasibi betsa betsapa damiwanũ ishũ damiwakĩ keyunibukiaki.

⁴ Haska inũ, hawẽ Xinaĩ Hãtxati shaba keskatũ txanima hãtxa hiwekuĩakiri hatu xinãmai

⁵ hubiakẽ txakabu xinãkĩ yurabu mexu merã nia keskabũ txanima hãtxa nĩkakatsi ikama ha shaba hiwemanika beshtekĩ nemanũ ibiakĩ atirubuma inibukiaki.

⁶ Hanua hawẽ Xinaĩ Hãtxatĩ yusĩkĩ taewariama huni betsa hawẽ kena João Deusũ yunua

⁷ hawẽ Xinaĩ Hãtxatikiri hau dasibibũ nĩkakĩ ikũwãshanũbũ bebũkiri hatu yui huniki, Joãonã.

⁸ Haskawẽ taea Joãonã, Deusũ Xinaĩ Hãtxatimaki. Hakia ha txanima hãtxa hakiri hau hatu yusĩyunũ Deusũ João yununiki.

⁹ Hanushũ shaba keskatũ hiwekuĩakiri yusĩ hatu unãmai

¹⁰ mai damiwani anu hua hatube hiwea hawẽ yusĩa habũ hawẽ hãtxa nĩkama hatu hawenawakĩ damiwabiani Deusũ Xinaĩ Hãtxati mirimabũ unãma inibuki.

¹¹ Haska inũ, Deusũ Xinaĩ Hãtxati hawenabu anu hukẽ habia hawenabũri hawẽ hãtxa nĩkama habũ beya wama danaĩbũ

¹² hakia hatiritũ hawẽ hãtxa nĩkatã ikũwãkĩ beya waibũ Deusũ Xinaĩ Hãtxatĩ hau Deusũ bakebu ishanũbũ hawẽ kuxipa hatu inãkĩ hatu duawakĩ taewaniki.

¹³ Haska inũ, Deusũ hawẽ bakebu hatu pepa wakinã, txutakĩ akama inũ yurabũ xinãwẽ akama hakia Deusũ hawẽ kuxipawẽ besti hawẽ bakebu wakĩ hatu hiwekuĩmakĩ taewaniki.

¹⁴ Hanua hawẽ Xinaĩ Hãtxati yura kayabi hayanũ ika aĩbu meranu naneima kaĩyã Deusũ bake bestitxai ewatã nuku anua yumetã ewani hiwea hawẽ Epa Deus itsa kuxipa duapahaira nũ uĩpauniki, nuikipa haya inũ txani txakatima hãtxa hayarã.

¹⁵ Haska inũ, hawẽ Xinaĩ Hãtxati Joãonẽ Jesus unãtã João nĩkai beabu hãtxa kuxipawẽ hatu yuikĩ: —“Ha dukũ hiweniwẽ taea ea katxu kaĩbiaimashũ ea binuyushanikiki, shanẽ ibuhairakinã”, akĩ haskakiri ẽ matu yuikubainaii— akĩ Jesuskiri João hãtxashũkũkainiki.

¹⁶ Deusũ dasibi pepa nuku inãtiruwẽ taea nukuwẽ nuikĩ nuku tibi hawẽ aka kuxipa tibi betsa betsapa nuku inãkeakemiski, txakabu katumamarã.

¹⁷ Haskawẽ taeshũ bebũkiri Deusũ Moiséswẽ hawẽ hãtxa nũ ha txibanũ nuku yununiki. Hakia txanima hãtxa haya inũ hawẽ nui abunameti kayabi huirã, hanua nũ binũ Jesus Cristowẽ taea besti huaki.

¹⁸ Ha inũ, natiã tsuabũra Deus uĩnakamabiakẽ hawẽ bake bestitxai Deusbe hãtxanameai Deus ha keskahairari hawẽ Epabe ketashameshũ shabakabi hatũ besti Deuskiri nuku unãmakubainiki.

¹⁹ Haska Naximanika Joãonẽ Jesuskiri hatu unãmani ẽ matu yuiai nĩkakãwẽ. Jerusalém anuabũ João kakaya judeu mae shanẽ ibubũ hau João yuka tapĩtanũbũ Deusbe nukunabu hãtxashunikabu inũ Jacõ bake Levĩ bababũ enabu betsabu habu yunuabu Naximanika João anu beshũ hatũ shanẽ ibubu yukashũkĩ: —Miarã, mĩ tsuamẽ? Mĩ Messias Cristomẽ?— akabu

²⁰ hatu parãma yuikĩ: —Ẽ ea Messias Cristomaki— hatu wa

²¹ —Mĩ tsuaraka, Deus hãtxashunika Elias kanirã, mĩ hamẽ?— akabu —Ẽ hamariki— hatu wa —“Deusũ hãtxa yuishunika kuxipa ea keska hushanikiki”, akĩ Moisés yuinirã, mĩ hamẽkaĩ?— akabu —Ẽ hamariki— hatu wa

²² —Habũ nuku yunuxinabu hari nũ hatu yuitanũ, miarã, mĩ tsuamẽkaĩ nuku yuiwe, mikiri nuku yunuxinabu nũ hatu yuitanunã— akabu

²³ hanushũ Naximanika Joãonẽ hatu yuikĩ: —Haskakiri Deus hãtxashunika Isaíasĩ keneni keskarã: “Hanu tsua hiweabumanushũ hãtxa kuxipawẽ hatu yuikĩ: ‘Nukũ Shanẽ Ibu nai anua matuki bayui ma kemaikiki. Matũ huĩtinĩ xinã pewarikãwẽ, bai kayatapia keska wakinã’ ”, akĩ kenenirã, ẽ haki— hatu wa

^24-25 hanu hau Joãobe hãtxatanũbũ fariseubũ hatu yunuxinabũ ana yuikĩ: —Mĩ Messias Cristomaraka. Mĩ Eliasmaraka. Mĩ Deusũ hãtxa yuishunika betsamaraka. Haskakenã, hawawẽ taeshũ daka mĩ hatu naximakubaini ikai, miki txiti ikabu hatu wakinã?— akabu

^26-27 hanushũ Jesuskiri Joãonẽ hatu yuikĩ: —Ikũ txanima henewẽ besti ẽ hatu naximakubainaii. Hamẽ ea dukũ ẽ kaĩbianikẽ ha huni betsa matube hiwebia mã unãriamarã, hawẽ kuxipawẽ ea binuhairaki. Haskawẽ taea earã, hawẽ tsumapã hawẽ daya ashũmis keska wakĩ ẽ hawẽ hawaumahairatũ eã merabewakĩ hawẽ bitxi tae meshpũ tsitsaushũ ẽ pekashũtirumaki— ikĩ

²⁸ Jordão hene kesha betsauri Betânia anushũ Joãonẽ hatu naximakubaini haria haska hãtxakĩ yuikubainiki.

²⁹ Hanua ushaxini bestẽtã maniabũ Jesus huai txaima betxitã metukĩ Joãonẽ hatu yuikĩ: —Uĩkãwẽ. Deus daewakĩ hatũ txashuwã bake menumisbu keska wai yurabu dasibibũ txakabu hatũ hatu buashũkĩ Deus nuku daewashũti ma huikiki.

³⁰ Hakiri habias matu yuinũ, nĩkakãwẽ: “Ha dukũ hiweni ea katxu kaĩbianishũ ea binushanikiki, shanẽ ibuhairakinã”, iwanã, ẽ matu yuixinaki.

^31-34 Ha inũ, mã Israelbũ ha huni unãkĩ mã xinã betsa washanũbũ matu unãmakĩ henewẽ naximakĩ ẽ matu taewaimaki, ha huni eãri ẽ unãriamabiarã. Hakia ea yununitũ ea shabakabi yuikĩ: “Ha huniki Yushĩ Pepa haki butua haki matsaumea mĩ uĩshanairã, habiatũri Yushĩ Pepawẽ hatu naximashanikiki”, ea waxĩkẽ ikũ ha huniki nai anua deiwã keska Deusũ Yushĩ butua ha huni mamaki baxikuai ẽ uĩmaki. Haskawẽ taeshũ: “Ha huni Deusũ Bakeki”, akĩ ẽ matu yuiaii— akĩ Naximanika Joãonẽ hatu yuitã

³⁵ hanua ana ushaxini Naximanika João hawẽ tsumabu betsa dabebe nishũ

³⁶ Jesus kawanai uĩkĩ nuku yuikĩ: —Uĩkãwẽ. Hatũ Deus sinatai daewanikaki, txashuwã bake menumisbu keskarã— nuku wa

³⁷ nĩkatã ha dabe nũ Joãonẽ tsumabia Jesus txibãbaĩtanũ ika xinaĩ nũ kaya

³⁸ niti itã dabekekaũ nuku uĩkĩ yukakĩ: —Mã hawa benayuai?— nuku wa —Yusĩnaã, mĩ hani hiwea ikai?— nũ wa

³⁹ —Ebe kashũ uĩ bukãwẽ!— nuku wa habe kai hanu hiwea anu nũ habe hikia ma 4:00 hora hikituxitã nũ habe hãtxaya

^40-41 Naximanika Joãonẽ hãtxa nĩkatã Andrẽ Jesus txibãbaina habe hãtxatã hawaira hawẽ betsa Simão Pedro yuinũ ika benabaũkĩ betxitã yuikĩ: —Messias Cristoki nũ nukushuki. Mĩ tsiri uĩ kawe— itã

⁴² hanushũ Jesus anu Andrẽ Simão iyua hanushũ Jesusũ uĩkĩ dais butã butãkĩ yuikĩ: —Miarã, mĩ Jonasĩ bakeki. Mĩ Simãobiakẽ ẽ mia kena dabeya waii. Cefas wakĩ mia kenashãkanikiki— aniki. Cefasrã, nawã hãtxawenã, Pedroki. Pedrorã huni kuĩ hãtxawenã, Mixki Ewapaki.

⁴³ Ana ushaxini Galiléia mae pakea anu Jesus kanũ ika yubakaxina kai Filipeki nukutã Jesusũ yuikĩ: —Tapĩ ebe kakũkaĩwẽ— aka —Peki— ikaini

⁴⁴ ha Filipẽ maerã, Betsaidarã, habianuri Pedro inũ André hiweriakẽ Galiléia anu nũ Jesusbe kai nũ hikikẽ

⁴⁵ Filipẽ hawẽ haibu Natanael benakĩ hawẽ hiwe anu kashũ yuikĩ: —Baa, mia yuinũ, ea nĩkawe. Hakiri Moisés inũ Deusũ hãtxa yuishunikabũ keneniburã, nũ ma haki nukuxinaki, Josẽ bake Jesusrã. Hawẽ mae Nazaréki— aka

⁴⁶ Natanaelĩ yuikĩ: —Ha mae Nazaré anua tsua duapa tashnitirumaki— aka —Ebe kashũ ibubis uĩkĩ unãyuwe— atã iwea

⁴⁷ Natanael Filipebe huai uĩkĩ Jesusũ nuku yuikĩ: —Uĩkãwẽ, ha Israelĩ baba kayabitũ tsua hatu paraĩsmarã— nuku wai

⁴⁸ hawẽ hãtxa nĩkabirã Natanaelĩ Jesus yukakĩ: —Haskakĩ hanishũ ea uĩmisshũ mĩ ea unaĩ?— aka Jesusũ Nataniel yuikĩ: —Filipẽ mia kenariama mibã figueira hi namã tsaushũ mĩ xinaĩ ẽ mia unãshuki— aka

⁴⁹ ikũwãkĩ yuikĩ: —Yusĩnaã, ikũ mĩ Deusũ bake kayabiki, Israelbũ shanẽ ibu dasibi binuarã— aka

^50-51 Jesusũ ana yuikĩ: —“Mibã figueira namã tsaushũ mĩ xinaĩ ẽ mia unãshuki”, akĩ ẽ mia yuiaiwẽ taeshũ mĩ ea ikũwaiĩ. Ana pepa betsa xarabu ẽ binumai mĩ ea uĩshanaii— iwanã, ana yuikĩ: —Txanima ẽ matu yuiaii. Nai bepemanai anua ẽ matũ Hutxi Kayabi Iuwa ea anu Deusũ nai tsumabu inabaĩbaini butubirãbiranaibu uĩkĩ Deusũ kuxipa mã uĩshanaii— akĩ nuku yuiniki, Jesusunã.